ခြိမ်းခြောက်မှုများကြောင့် ဗြိတိန်လေတပ်စခန်းမှ B-1 ဗုံးကြဲလေယာဉ်များ ရွှေ့ပြောင်းခဲ့ဟု ထရမ့် ပြော

အီရန်နှင့် ဆက်စပ်မှုရှိနိုင်သည်ဟု ယူဆရသည့် ခြိမ်းခြောက်မှုအချို့ကြောင့် ဗြိတိန်နိုင်ငံရှိ RAF Fairford လေတပ်စခန်းမှ အမေရိကန် B-1 ဗုံးကြဲလေယာဉ်များကို ရွှေ့ပြောင်းခဲ့ကြောင်း အမေရိကန်သမ္မတ ဒေါ်နယ်ထရမ့်က တနင်္လာနေ့တွင် ပြောကြားခဲ့သည်။

RAF Fairford လေတပ်စခန်းသည် လုံခြုံမှုရှိကြောင်း ဗြိတိန်အစိုးရဘက်က ပြောကြားထားသော်လည်း အမေရိကန်ဘက်က ယင်းစခန်းမှ ဗုံးကြဲလေယာဉ်များ ထွက်ခွာသွားပြီဖြစ်ကြောင်း အတည်ပြုထားသည်။

“ခြိမ်းခြောက်မှုတချို့ရှိခဲ့ပါတယ်” ဟု ထရမ့်က အိမ်ဖြူတော်၌ သတင်းထောက်များအား ပြောကြားခဲ့ပြီး လေယာဉ်များကို အခြားနေရာသို့ ရွှေ့ပြောင်းခဲ့ခြင်းဖြစ်ကြောင်း ဆိုသည်။

စက်တင်ဘာ ၂၇ ရက်က အင်္ဂလန်အနောက်တောင်ပိုင်းရှိ အဆိုပါလေတပ်စခန်းအနီးတွင် ဗင်ကားအများအပြားနှင့်အတူ လူတစ်စု၏ သံသယဖြစ်ဖွယ် လှုပ်ရှားမှုများကို ဒေသခံတစ်ဦးက သတင်းပေးခဲ့ပြီးနောက် ရဲတပ်ဖွဲ့က စုံစမ်းစစ်ဆေးမှုများ ပြုလုပ်ခဲ့သည်။

ယင်းဖြစ်စဉ်နှင့်ပတ်သက်၍ အကြမ်းဖက်မှုတိုက်ဖျက်ရေးဆိုင်ရာ စုံစမ်းစစ်ဆေးမှုများ ပြုလုပ်ခဲ့ပြီး သံသယရှိသူ ငါးဦးနှင့် နောက်ပိုင်းတွင် ထိန်းသိမ်းခဲ့သည့် ဗြိတိန်-အီရန်နိုင်ငံသားတစ်ဦးတို့ကို အာမခံဖြင့် ပြန်လွှတ်ပေးခဲ့ကြောင်း သိရသည်။

စုံစမ်းစစ်ဆေးသူများက ဗင်ကားများအတွင်း ပေါက်ကွဲစေတတ်သည့် ပစ္စည်းများ မတွေ့ရှိခဲ့သော်လည်း ဓာတ်ဆီအချို့ကို တွေ့ရှိသိမ်းဆည်းခဲ့ကြောင်း အကြမ်းဖက်မှုတိုက်ဖျက်ရေးရဲတပ်ဖွဲ့က ထုတ်ပြန်ထားသည်။

တစ်ဖက်တွင် Wall Street Journal က ဥရောပနှင့် အမေရိကန်အရာရှိများကို ကိုးကား၍ အီရန်တော်လှန်ရေးအစောင့်တပ်ဖွဲ့ (IRGC) က ဒရုန်းအသုံးပြုတိုက်ခိုက်ရန် ညွှန်ကြားခဲ့သည်ဟု သတင်းဖော်ပြထားပြီး အဆိုပါအစီအစဉ်သည် စခန်းရှိ အမေရိကန်လေယာဉ်မှူးများအပါအဝင် ဝန်ထမ်းများကို ပစ်မှတ်ထားရန် ရည်ရွယ်ခဲ့သည်ဟု ဆိုသည်။

အဆိုပါသတင်းနှင့်ပတ်သက်၍ ထရမ့်က အသေးစိတ်မှတ်ချက်ပေးရန် ငြင်းဆိုခဲ့သော်လည်း ယင်းကဲ့သို့ လုပ်ဆောင်ခဲ့ပါက “ကြီးမားသည့် အကျိုးဆက်များ” ရှိလာမည်ဟု သတိပေးခဲ့သည်။

ခြိမ်းခြောက်မှု ပြုလုပ်သူများကို အမေရိကန်ဘက်က သိရှိထားပြီး ၎င်းတို့သည် အီရန်နှင့် ဆက်စပ်မှုရှိနိုင်ကြောင်း ထရမ့်က ပြောကြားခဲ့သည်။

Ref: ဂျေတီ