အကယ်ဒမီ သုံးဆုရှင် ဂီတမှူး အလင်္ကာကျော်စွာ ဦးခင်မောင်ကြီး ကွယ်လွန်
ရုပ်ရှင်တေးဂီတနယ်ပယ်မှာ ထင်ရှားတဲ့ အကယ်ဒမီ သုံးဆုရှင် ဝါရင့် ဂီတမှူး အလင်္ကာကျော်စွာ ဦးခင်မောင်ကြီး အသက် (၇၁) နှစ်ဟာ ဒီကနေ့ အောက်တိုဘာ ၆ ရက်၊ မနက် ၁၂ နာရီ ၂၅ မိနစ်မှာ ကွယ်လွန်သွားပြီလို့ မိသားစုဝင်တွေက အသိပေးထားပါတယ်။
“ကျွန်တော့်အဖေ ဦးခင်မောင်ကြီး အားလုံးကို နှုတ်ဆက် ထွက်ခွာသွားပါပြီ။ ချစ်ခင်ကြတဲ့ မိတ်ဆွေ အပေါင်းအသင်းများကို လေးစားစွာ အသိပေး အပ်ပါတယ်” လို့ သားဖြစ်သူ၊ Lucky Hand အဖွဲ့ရဲ့ ဂီတာတီးခတ်သူ ကိုအောင်သူက သူ့ရဲ့ လူမှုကွန်ရက် စာမျက်နှာမှာ ရေးသားထားပါတယ်။
ဦးခင်မောင်ကြီးဟာ ရုပ်ရှင်ဇာတ်ကား များစွာအတွက် နောက်ခံတေးဂီတနဲ့ တေးသံစဉ်တွေ ဖန်တီးခဲ့သူဖြစ်ပြီး ၂၀၀၂ ခုနှစ်မှာ “ငါ သူတပါး ယောင်္ကျား မိန်းမ“ ဇာတ်ကား၊ ၂၀၀၅ ခုနှစ်မှာ “ကျန်စစ်မင်း” ဇာတ်ကား၊ ၂၀၁၄ ခုနှစ်မှာ “ကောင်းကျိုးကိုယ်၌ တည်စေမင်း” ဇာတ်ကားတွေနဲ့ အကောင်းဆုံးရုပ်ရှင် တေးဂီတ အကယ်ဒမီဆုတွေ ရရှိခဲ့ပါတယ်။
မြန်မာ့ရုပ်ရှင် တေးဂီတလောကမှာ နှစ်ပေါင်းများစွာ ပါဝင်ဖြတ်သန်းခဲ့ပြီး ထူးချွန်စွာ ဖန်တီး ဆန်းသစ်နိုင်မှုကြောင့် အခု ၂၀၂၆ ခုနှစ်မှာ အလင်္ကာကျော်စွာဘွဲ့ကို ချီးမြှင့်ခံခဲ့ရသူ ဖြစ်ပါတယ်။
ဦးခင်မောင်ကြီးဟာ ဂီတမျိုးရိုးမှ ဆင်းသက်လာသူဖြစ်ပြီး ဖခင်ဖြစ်သူမှာ “ဂီတလုလင်” အဖွဲ့မှ ဒရမ်တီးခတ်သူ ဦးမြင့်ဆွေလေး ဖြစ်တယ်လို့ သိရပါတယ်။
Photo - CJ
