မြင်းခြံက အေးမြသီတာစျေးမီးလောင်လို့ ငရုတ်၊ကြက်သွန်ပွဲရုံအပါဆိုင်ခန်း ၂၄ ခန်းမီးထဲပါသွား
မန္တလေးတိုင်း၊ မြင်းခြံမြို့နယ်၊ အမှတ်(၇)ရပ်ကွက်ရှိ ဒေသအခေါ် မြောက်ဈေးလို့သိကြတဲ့ အေးမြသီတာဈေးမှာ မီးလောင်မှုဖြစ်ပြီး ဆိုင်ခန်း ၂၄ ခန်းမီးလောင်း ပျက်စီးခဲ့တယ်လို့ မြင်းခြံမြို့နယ်မီးသတ်ဦးစီးဌာနမှ သိရပါတယ်။
မနေ့က စက်တင်ဘာ ၂၇ ရက်နေ့ည ၇ နာရီ ၅၀ မိနစ်မှာ အေးမြသီတာဈေးကြီးရဲ့ စျေးရုံအမှတ် ( ခ) ရုံ မီးလောင်ခဲ့တာဖြစ်ကြောင်း ၊ မီးလောင်မှုကြောင့် ငပိ ၊ငါးခြောက် ၊ ငရုတ်သီး ၊ ကြက်သွန်နီ ပွဲရုံတွေနဲ့ ပရိဘောဂရောင်းဝယ်ရေးဆိုင်တို့ ပျက်စီးခဲ့တာ ဖြစ်ပါတယ်။
" ဆိုင်ခန်းအမှတ် ၃၄ ရဲ့အခန်းထဲက ဆိုလာအင်ဗာတာ အပူလွန်ကဲပြီး မီးလောင်တာပါ။ ၈ နာရီ ၃၃ မိနစ်မှာ မီးငြိမ်းပါတယ်။ " လို့ မြင်းခြံမြို့နယ်မီးသတ်ဌာနမှ တာဝန်ရှိသူက ပြောပါတယ်။
မီးလောင်မှုကြောင့် ငွေကျပ်တရာငါးဆယ့်ခြောက်သိန်းကျပ်ဖိုးဆုံးရှုံးမှုရှိခဲ့ပြီး မီးစတင်လောင်ကျွမ်းစေခဲ့တဲ့ ဆိုင်ခန်း အမှတ် ၃၄ ပိုင်ရှင်ကို မြင်းခြံရဲစခန်းက ပုဒ်မ ၂၈၅ အရ အမှုဖွင့်အရေးယူဆောင်ရွက်ထားတယ်လို့ သိရပါတယ်။
မီးလောင်မှုကိုတော့ မြင်းခြံခရိုင်မီးသတ်စခန်း ၊ မြင်းခြံမြို့နယ်မီးသတ်စခန်း၊ မြင်းခြံနယ်မြေမီးသတ်စခန်း၊ စက်မှုဇုံအရန်မီးသတ်စခန်း၊ သန္ဓေမီးသတ်တပ်ဖွဲ့ဝင်၊ အရန်မီးသတ်တပ်ဖွဲ့ဝင်တွေနဲ့အတူ လူမှုကူညီရေးအသင်းတွေ ပူးပေါင်းပြီး မီးငြိမ်းသတ်ခဲ့တာလို့ သိရပါတယ်။
ဧပြီ ၂၆ ရက်နေ့ ၊ မနက်အစော ၆ နာရီ ၂၅ မိနစ်လောက်ကလည်း ဧရာဝတီတိုင်း ၊ ဓနုဖြူမြို့မစျေးကြီးမှာ မီးလောင်မှုဖြစ်ပွားပြီး ဆိုင်ခန်း ၂၇၁ ခန်းမီးလောင်ပျက်စီးမှု ရှိခဲ့ပါတယ်။
