ကျောက်တော်မှာ လေကြောင်းတိုက်ခိုက်ခံရလို့ ၃၃ ယောက်သေ၊ ၃၆ ယောက်ဒဏ်ရာရ
ရခိုင်ပြည်နယ် ၊ ကျောက်တော်မြို့မှာ ဒီကနေ့ စက်တင်ဘာ ၂၈ ရက် ၊ နေ့လယ် ၁၂ နာရီကျော်က လေကြောင်းကနေဗုံးကြဲတိုက်ခိုက်ခံရပြီး ၃၃ ယောက် သေဆုံးကာ ၊ ၃၆ ယောက်ထိခိုက်ဒဏ်ရာရရှိခဲ့တယ်လို့ ကနဦးသိရပါတယ်။
ကစ္ဆပနဒီတံတားအနီးဝန်းကျင်နဲ့ အိန္ဒိယဈေးဝန်းကျင်ကို ဗုံးကြဲတိုက်ခိုက်ခံရတာဖြစ်ပြီး သေဆုံးသူတွေထဲမှာ အမျိုးသား ၊ အမျိုးသမီး ပါဝင်ပြီး ဒဏ်ရာရသူတွေထဲမှာ ပြင်းထန်သူတွေပါတဲ့အတွက် သေဆုံးမှု ထပ်တိုးလာနိုင်တယ်လို့ လတ်တလောသိရပါတယ်။
" လောလောဆယ် အလောင်းက ၃၃ လောင်းတွေ့ထားတယ်။ဒဏ်ရာရသူ ၃၆ ယောက်ရှိတယ်။ မီးထဲပါသွားသူတချို့ရှိနေသေးတယ်။ လောလောဆယ် ဒီလောက်တော့အတည်ပြုလို့ရပါတယ်။" လို့ စစ်ရေးသတင်း ရင်းမြစ်က ပြောပါတယ်။
ကျောက်တော်လေကြောင်းတိုက်ခိုက်ခံရတဲ့အခြေအနေနဲ့ပတ်သက်ပြီး ထိခိုက် ၊သေဆုံးသူများကြောင်း AA ကလည်း ကနဦး သတင်းထုတ်ပြန်ထားပြီး အသေးစိတ်ကိုတော့ ထပ်မံထုတ်ပြန်ပေးသွားမယ်လို့ သိရပါတယ်။
ရခိုင်ပြည်နယ်မှာ ဒီစက်တင်ဘာ ၁၇ ရက်မှ ၂၇ ရက်အထိ ၁၁ ရက်အတွင်းမှာ လေကြောင်းနဲ့ လက်နက်ကြီးတိုက်ခိုက်မှုကြောင့် ခြောက်ယောက်သေဆုံးပြီး ၁၆ ယောက် ထိခိုက်ဒဏ်ရာ ရရှိခဲ့တယ်လို့ AA ထုတ်ပြန်ထားပါတယ်။
အစိုးရကတပ်က ၄၉၂၆ စစ်ဆင်ရေးစတင်တဲ့ စက်တင်ဘာ ၄ ရက်ကစပြီး ရခိုင်ပြည်နယ်ကို လေကြောင်းတိုက်ခိုက်မှုတွေ ဆက်တိုက်လုပ်လာတဲ့အပြင် လက်နက်ကြီးပစ်ခတ်မှု ၊ မြေပြင်စစ်ကြောင်းထိုးတိုက်ခိုက်မှုကြောင့် စစ်ရေးတင်းမာနေပါတယ်။
