အမြန်လမ်းမှာ ခရီးသည်တင် Express ကားမောင်းရင်း Tiktok ဆော့တဲ့ ယာဥ်မောင်းကို အရေးယူပြီး ယာဥ်လိုင်းကို နောက်ထပ်မဖြစ်ဖို့ အသိပေး

ရန်ကုန် - မန္တလေး အမြန်လမ်းမကြီးကို ဖြတ်သန်းအသုံးပြုပြီး ရန်ကုန် - မော်လမြိုင် ပြေးဆွဲနေတဲ့ ရွှေလင်းယုန် Express ကားမောင်းနှင်နေချိန် Tiktok ဆိုရှယ်မီဒီယာကို အသုံးပြုပြီး တေးသရုပ်ဖော် ဗွီဒီယိုရိုက်ကူး live လွှင့်ခြင်းနဲ့ ပို့စ်တင်တာတွေ အကြိမ်ကြိမ်ပြုလုပ်ခဲ့တဲ့ ယာဥ်မောင်းကို ဥပအေရ အရေးယူဖို့နဲ့ ယာဥ်လိုင်းပြေးဆွဲနေချိန် ဒီလိုဖြစ်စဥ်တွေ ထပ်မံမဖြစ်ပွားစေဖို့ သတိပေးထားတယ်လို့ အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့ က ထုတ်ပြန်ထားပါတယ်။

အဲ့ဒီယာဥ်မောင်းတင်ထားတဲ့ Tik Tok ဗွီဒီယိုတွေရဲ့ comment box မှာ Tik Tok သုံးစွဲတဲ့ အများပြည်သူတွေက ကားမောင်း ရင်း Tik Tok ရိုက်ကူးခြင်းဟာ ခရီးသည်တွေအတွက်အသက်အန္တရာယ်ဖြစ်စေနိုင်ပြီး အလွန်ဆင်ခြင်မှုကင်းမဲ့တဲ့ အပြုအမူဖြစ်လို့ မပြုလုပ်သင့်ကြောင်း Comments (မှတ်ချက်)များ ရေးသားခဲ့ပေမယ့် ပို့စ်ပိုင်ရှင် ယာဉ်မောင်းက လက်မခံဘဲအလွန်ရိုင်းပြစွာ တုန့်ပြန်ရေးသားခဲ့တာတွေရှိခဲ့တယ်လို့ သိရပါတယ်။

အဲ့ဒီလို ပြုမှုဆောင်ရွက်မှုတွေဟာ အမြန်လမ်းမကြီးသုံးစွဲနေတဲ့ခရီးသွားပြည်သူအားလုံးအတွက် အလွန်အန္တရာယ်ကြီးသောကိစ္စဖြစ်လို့ 2G-5403 ယာဉ်ကို Telematic ကဒ် ဖြုတ်သိမ်းပြီး အမြန်လမ်းအသုံးပြုခွင့် ပိတ်သိမ်းခြင်း၊ ရွှေလင်းယုန်ယာဥ်လိုင်းကိုလည်း ဒီလိုဖြစ်စဥ်တွေထပ်မံဖြစ်ပွားခဲ့ရင် ယာဥ်လိုင်းတစ်ခုလုံး အမြန်လမ်းသုံးစွဲခွင့်ပိတ်သိမ်းအရေးယူမယ့်အကြောင်းနဲ့ ပြင်း ထန်စွာသတိပေးခြင်း၊ စည်းကမ်းမလိုက်နာတဲ့ ယာဥ်မောင်းကိုလည်း တရားဥပဒေအရ ဆက်လက်အရေးယူဖို့ အမြန်လမ်းမကြီးရဲတပ်ဖွဲ့ကို တိုင်ကြားထားတယ်လို့ သိရပါတယ်။

အမြန်လမ်းအသုံးပြုတဲ့ ယာဉ်မောင်းတွေအနေနဲ့ ယာဉ်မောင်းနှင်နေချိန် ဖုန်းပြောခြင်း၊ စာတို SMS ပို့ခြင်း၊ Tik Tok ရိုက်ကူးခြင်း၊ လူမှုကွန်ရက်/အင်တာနက်သုံးခြင်း၊ ရုပ်ရှင်ကြည့်ခြင်း၊ ကွမ်းထွေးခြင်း စတဲ့ စိတ်အာရုံပျံ့လွင့်နိုင်တဲ့ အပြုအမူတွေကို (လုံးဝ)မလုပ်ကြရန်၊ မိမိယာဉ်ရဲ့ ကြံ့ခိုင်မှုကို လမ်းပေါ်မရောက်မီ သေချာစွာ စစ်ဆေးကြရန်လိုအပ်ပြီး မိုးရွာနေချိန်/ ညအချိန်များ တွင် အရှိန်လျှော့ချ မောင်းနှင်ကြဖို့နဲ့ ယာဉ်အမျိုးအစားအလိုက် သတ်မှတ်အမြန်နှုန်းထက် ပို၍မောင်းနှင်ခြင်း မပြုလုပ်ကြဖို့ အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့ ကသတိပေးထားပါတယ်။