လှောင်ပြောင်မှုတွေကို လက်ခံကြောင်း အီတလီအသင်းနည်းပြ မန်ချီနီ ပြောကြား
အီတလီလက်ရွေးစင်အသင်းနည်းပြ မန်ချီနီက ဘယ်လ်ဂျီယံအသင်းကို အိမ်ကွင်းမှာ ဝ-၂ ဂိုးနဲ့ အရေးနိမ့်ခဲ့တဲ့ ပွဲအပြီး လှောင်ပြောင်မှုတွေကို လက်ခံကြောင်း ပြောကြားခဲ့ပါတယ်။
မန်ချီနီဟာ အီတလီအသင်းနည်းပြရာထူးထိုင်ခုံကို သုံးနှစ်ကြာမှာ ပြန်ရောက်လာပြီး အခုပွဲက သူ့ရဲ့ပွဲဦးထွက်လည်းဖြစ်တယ်။
အိမ်ကွင်းပရိသတ်တွေဟာ မိနစ် ၂၀ မှာ ပထမဂိုး စပေးလိုက်ရချိန်ကတည်းက လှောင်ပြောင်ခဲ့ပြီး ပွဲအပြီးမှာတော့ လှောင်ပြောင်မှုက ပိုမိုကျယ်လောင်ခဲ့ပါတယ်။
''ကျွန်တော်တို့ အရေးနိမ့်တဲ့အချိန်မှာ ဘယ်သူမှ မပျော်ပါဘူး။ ကျွန်တော်တို့ ရှုံးနိမ့်ရင်တော့ လှောင်ပြောင်မှုတွေ ခံရနိုင်ပါတယ်''လို့ မန်ချီနီက ပြောခဲ့ပါတယ်။
အခုပွဲကို ရောမမြို့က ပရိသတ် ၇၀၀၀၀ ဆံ့ အိုလံပီကိုကွင်းမှာ ကစားခဲ့ပြီး ၄၇၁၅၅ ဦးသာ လာရောက်ကြည့်ရှုခဲ့ပါတယ်။
ကမ္ဘာ့ဖလားလေးကြိမ်ချန်ပီယံ အီတလီအသင်းဟာ နောက်ဆုံး ကမ္ဘာ့ဖလားသုံးကြိမ်ဆက် ခြေစစ်ပွဲမအောင်မြင်ဘဲ ဖြစ်ခဲ့ပါတယ်။
