တောင်ကြီး - ဟိုပုံးလမ်းပေါ် ကျောက်တုံးကြီးလိမ့်ကျပြီး အဆောက်အအုံနဲ့ မော်တော်ယာဥ် ထိခိုက်ပျက်စီး
ရှမ်းပြည်နယ်၊ တောင်ကြီးမြို့ရှိ တောင်ကြီး - ဟိုပုံးသွား ပြည်ထောင်စုကားလမ်းမပေါ်ကို မနေ့ စက်တင်ဘာ ၁၉ ရက်၊ ည ၁၀ နာရီခွဲဝန်းကျင်က ကျောက်တုံးကြီး လိမ့်ကျလာတာကြောင့် အဆောက်အအုံနဲ့ မော်တော်ယာဥ်တွေ ထိခိုက်ပျက်စီးခဲ့ပြီး လမ်းပိတ်ဆို့မှုတွေ ဖြစ်ပေါ်ခဲ့တယ်လို့ ဒေသခံတွေက ပြောပါတယ်။
တောင်ကြီးမြို့ရှိ ရှမ်းပြည်နယ် သတ္တုတွင်းဦးစီးဌာနရုံးရဲ့ အနောက်ဘက် ရွှေမုဋ္ဌောတောင်ပေါ်ကနေ အလျား ၄၁ ပေ၊ အနံ ပေ ၂၀၊ အမြင့် ၁၂ ပေ အရွယ်အစားရှိတဲ့ ကျောက်တုံးကြီး လိမ့်ကျခဲ့တာလို့ သိရပါတယ်။
“အဲဒီနေရာက တောင်ကြီးကနေ ဟိုပုံးဘက်အထွက် BOC ဓာတ်ဆီဆိုင်ဘေးမှာပါ။ သတ္တုတွင်းဦးစီးဌာနရဲ့ တထပ် အဆောက်အအုံကို အရှိန်နဲ့ ဝင်တိုက်မိတယ်။ ဆီဆိုင်ခြံစည်းရိုးလည်း ပျက်စီးတယ်။ ကားနှစ်စီးလည်း ပိကုန်တယ်။ လူထိခိုက်တာတော့ မရှိဘူး” လို့ ဒေသခံတယောက်က ပြောပါတယ်။
ကျောက်တုံးကြီး လိမ့်ကျမှုနဲ့အတူ မြေသား၊ ရွှံ့နဲ့ ကျောက်ခဲ၊ ကျောက်စရစ်တွေ ပြည်ထောင်စုလမ်းမကြီးပေါ် ကျရောက်ကာ လမ်းပိတ်ဆို့မှု ယာယီ ဖြစ်ပေါ်ခဲ့ပေမယ့် သက်ဆိုင်ရာ တာဝန်ရှိသူတွေက ညတွင်းချင်း စက်ယန္တရားတွေနဲ့ ဖယ်ရှားခဲ့တာကြောင့် ည ၁၂ နာရီဝန်းကျင်မှာ လမ်းပြန်ပွင့်သွားခဲ့တယ်လို့ သိရပါတယ်။
“မိုးရွာတာများပြီး မြေသားတွေအိကျလာလို့ ကျောက်တုံးကြီး ပြုတ်ကျလာတာ။ အသံကြီးကို အရင်ကြားရတာ။ ပြီးမှ ကျောက်တုံးကြီးကျလာတာ။ တောင်ပေါ်မှာ နေတဲ့သူတွေက ဘုရားဖြူဘက်က ထင်းကိုခုတ်တာ။ သစ်ပင်ကြီးတွေကို နေ့တိုင်းခုတ်နေတာ နှစ်နဲ့ချီနေပြီ။ အဲဒါကြောင့် ဒီလို သဘာဝဘေးတွေ ဖြစ်လာတာ။ အဲဒီ သစ်ပင်တွေ မရှိတော့တာတွေကြောင့်ပဲ ရေတွေကြီး၊ ကမ်းတွေပြို၊ မြေတွေပြို ဖြစ်နေတာ” လို့ ဒေသခံက ပြောပါတယ်။
ပြီးခဲ့တဲ့ ၂၀၂၅ ခုနှစ်၊ မတ်လ ၂၈ ရက်နေ့ကလည်း ငလျင်လှုပ်ခတ်မှုကြောင့် အဲဒီနေရာအနီးက ကားလေးဝင်းထဲကို ကျောက်တုံးကြီးတတုံး လိမ့်ကျခဲ့ဖူးပြီး အခုလိမ့်ကျလာတဲ့ ကျောက်တုံးကြီးကတော့ အရင်နှစ်ကထက် အရွယ်အစား ပိုမိုကြီးမားတယ်လို့ သိရပါတယ်။
လက်ရှိမှာ ဒေသခံတွေဟာ မိုးရာသီကာလအတွင်း အဲဒီ တောင်ခြေတလျှောက် မြေပြိုမှုနဲ့အတူ ကျောက်တုံးတွေ ထပ်မံ လိမ့်ကျလာမယ့် အန္တရာယ်ကို စိုးရိမ်နေကြပြီး သက်ဆိုင်ရာဌာနက စစ်ဆေးမှုတွေ ပြုလုပ်ပေးကြဖို့ လိုလားနေကြပါတယ်။
ဒါအပြင် ဘူမိဗေဒ ပညာရှင်တွေကလည်း အခုလို ဖြစ်စဉ်တွေနဲ့ ပတ်သက်လို့ ရေရှည် အန္တရာယ်ကင်းရှင်းရေးနဲ့ ကြိုတင်ကာကွယ်မှုတွေ လုပ်ဆောင်နိုင်ဖို့အတွက် ဘယ်နေရာတွေမှာ ကျောက်တောင် ပြိုကျနိုင်ခြေ အများဆုံးရှိနေလဲဆိုတာကို သိရှိနိုင်မယ့် ကျောက်တောင် ပြိုကျနိုင်ခြေပြမြေပုံ (Rockfall Hazard Map) တွေကို သက်ဆိုင်ရာဌာနတွေက ကွင်းဆင်းတိုင်းတာပြီး စနစ်တကျ ရေးဆွဲ ပြင်ဆင်ထားသင့်တယ်လို့ တိုက်တွန်းထားပါတယ်။
