ပြီးပြည့်စုံတဲ့ ချန်ပီယံလိဂ်ည ဖြစ်ခဲ့ကြောင်း ကာရစ် ပြောကြား
မန်ယူနည်းပြ ကာရစ်က ဆာဘာအသင်းကို (၄-၀)ဂိုးနဲ့ အနိုင်ရရှိခဲ့ခြင်းအတွက် ပြီးပြည့်စုံတဲ့ ချန်ပီယံလိဂ်ည ဖြစ်ခဲ့ကြောင်း ပြောကြားခဲ့ပါတယ်။
မန်ယူအသင်းဟာ ၂၀၂၄-၂၅ နဲ့ ၂၀၂၅-၂၆ ရာသီတွေမှာ ချန်ပီယံလိဂ်ယှဉ်ပြိုင်ခွင့် မရခဲ့တာကြောင့် ဆာဘာနဲ့ပွဲက ၂၀၂၃ ဒီဇင်ဘာလနောက်ပိုင်း ပထမဆုံးယှဉ်ပြိုင်ခွင့်ရတဲ့ ချန်ပီယံလိဂ်ပွဲစဉ် ဖြစ်ခဲ့ပါတယ်။
ဒီပွဲမှာ မန်ယူအသင်းက ချန်ပီယံလိဂ်ပြိုင်ပွဲ ပထမဆုံးယှဉ်ပြိုင်ခွင့်ရရှိလာခဲ့တဲ့ အဇာဘိုင်ဂျန်ကလပ် ဆာဘာအသင်းကို ဂိုးပြတ်အနိုင်ယူခဲ့တာပါ။
(၄)ဂိုးသွင်းယူနိုင်ခဲ့သလို၊ Clean Sheet လည်း ရရှိခဲ့တာကြောင့် ပြီးပြည့်စုံတဲ့ည ဖြစ်ခဲ့သလားလို့ ပွဲအပြီး မေးမြန်းမှုကို ကာရစ်က ''ကျွန်တော် အဲဒီလို ထင်ပါတယ်။ ဒါက ကျွန်တော်တို့ လိုချင်ခဲ့တဲ့အရာပါ။ တစ်ဦးချင်းရော အသင်းလိုက်ပါ ပွဲအစကနေ အဆုံးအထိ ကောင်းမွန်စွာ စွမ်းဆောင်နိုင်ခဲ့တယ်လို့ ထင်ပါတယ်။ ကျွန်တော်တို့ တကယ်ကောင်းကောင်း ကစားနိုင်ခဲ့ပြီး ကစားသမားအားလုံးကို အသိအမှတ်ပြုပါတယ်'' လို့ ပြောကြားခဲ့ပါတယ်။
မန်ယူအသင်းက ဆာဘာကို ပထမပိုင်းမှာကတည်းက သုံးဂိုးပြတ်အနိုင်ရနေခဲ့တာကြောင့် တီလေမန်းစ်ကို စောစောစီးစီးအနားပေးခဲ့ပြီး လာမယ့် မန်ချက်စတာဒါဘီပွဲစဉ်အတွက် ပြင်ဆင်ခဲ့ကြောင်းလည်း မီဒီယာတချို့က ဖော်ပြခဲ့ပါတယ်။
ကာရစ်ဟာ မန်ယူအသင်းကို ယာယီနည်းပြအဖြစ် ကိုင်တွယ်ခဲ့တဲ့ ၂၀၂၁-၂၂ ရာသီ ချန်ပီယံလိဂ်ပြိုင်ပွဲမှာလည်း ဗီလာရီးယဲလ်ကို (၂-၀)ဂိုးနဲ့ အနိုင်ရခဲ့တာကြောင့် ချန်ပီယံလိဂ်ပြိုင်ပွဲမှာ နိုင်ပွဲဆက်အောင် စွမ်းဆောင်ထားနိုင်ကြောင်းလည်း ဖော်ပြခဲ့ကြပါတယ်။
