"အခုနောက်ပိုင်းကတော့ ရေနည်းနည်း ပြန်ကျလာပြီ။ ကယ်ဆယ်ရေးစခန်းတွေကနေ အိမ်တွေတော့ ပြန်မရောက်ကြသေးဘူး"
"အခုနောက်ပိုင်းကတော့ ရေနည်းနည်း ပြန်ကျလာပြီ။ ကယ်ဆယ်ရေးစခန်းတွေကနေ အိမ်တွေတော့ ပြန်မရောက်ကြသေးဘူး"
ငဝန်မြစ်ရေ မြင့်တက်ပြီး တာပေါက်မှုကြောင့် ဧရာဝတီတိုင်းဒေသကြီး လေးမျက်နှာမြို့အပါအဝင် ကျေးရွာအများအပြားတွင် ရေကြီးရေနစ်မြုပ်မှုများ ဖြစ်ပွားလျက်ရှိသည်။ ရေကြီးမှုကြောင့် လေးမျက်နှာမြို့နယ်တွင် လူဦးရေ သုံးသောင်းနီးပါးခန့် ရေဘေးသင့်ခဲ့ပြီး လယ်မြေသုံးသောင်းနီးပါးခန့် ရေနစ်မြုပ်ခဲ့သည်။
ရေကြီးမှုအခြေအနေများနှင့်ပတ်သက်ပြီး ဧရာဝတီတိုင်းဒေသကြီးရှိ Eleven Media Group မှ သတင်းထောက် ကိုအောင်ကျော်မျိုးနှင့် ဆက်သွယ်မေးမြန်းထားသည်များကို ဖော်ပြအပ်ပါသည်။
မေး - အခု လက်ရှိ ရေကြီးရေလွှမ်းမှု အခြေအနေလေးက ဘယ်လိုရှိလဲဗျ။
ဖြေ - လက်ရှိကတော့ ကနဦးအနေနဲ့ကတော့ တာကျိုးတယ်။ တာကျိုးပေါက်ကနေပြီးတော့ ရေဝင်လာတယ်ပေါ့။ ဝင်လာပြီးတော့ တာကျိုးပေါက်နဲ့ ဆက်စပ်နေတဲ့ ရွာပေါ့နော်၊ ဆက်စပ်နေတဲ့ ရွာတွေကို ဝင်တယ်။ ပြီးသွားရင် တာကျိုးပေါက်နဲ့ မြို့နဲ့ကလည်း အရမ်းကြီး လှမ်းနေတာမျိုး မဟုတ်ဘူး။ တစ်မိုင်ခွဲ၊ နှစ်မိုင်လောက်ပဲ ရှိမယ်။ အဲတော့ အဲဒီမြို့ထဲကိုပါ ဆက်ပြီးတော့ မြို့ဧရိယာထဲ အထိပါ ရေတွေ ဝင်လာတော့ စာသင်ကျောင်းတို့၊ ဆေးရုံတို့ အပါအဝင် နေအိမ်တွေရော ရုံးဌာနတွေရော အကုန်လုံး ရေကြီးနစ်မြုပ်တာပေါ့။ ပြီးလို့ရှိရင် စိုက်ဧကပေါင်း များစွာ ရေနစ်မြုပ်တယ်။ နစ်မြုပ်ပြီးသွားတော့ ဆက်စပ်နေတဲ့ နေရာတွေဖြစ်တဲ့ အိုင်သပြုဘက်တို့ဘာတို့၊ အဲဒီ အိုင်သပြုဘက်ကိုပါ ဆက်ပြီးတော့ ရေကဆင်းသွားတာပေါ့နော်။ အဲ အခုဆိုလို့ရှိရင်တော့ ငသိုင်းချောင်းဘက်အထိပါ ငသိုင်းချောင်းမြို့ဘက်အထိပါ ရေက ရောက်နေပြီလို့ ပြောလို့ရတယ်။ ဒီဘက် ဟင်္သာတဘက် အခြမ်းကို စီးဆင်းမှုကတော့ ကျွန်တော်တို့ တလုပ်ထော် အနီးစပ်ဆုံး ရှိနေပေမယ့် တလုပ်ထော်အထိတော့ မရောက်သေးဘူး။ ကြားမှာ လယ်ကွင်းတွေဘက်အခြမ်းအထိပဲ စီးဆင်းတဲ့ အခြေအနေရှိတဲ့ သဘောမျိုးပဲ ရှိတယ်ဗျ။
