စထရာဘော့အလယ်တန်းကစားသမားဘာကိုအား ချဲလ်ဆီး ခေါ်ယူလာ
==================
ချဲလ်ဆီးဟာ စထရာဘော့အလယ်တန်းကစားသမားဗာလန်တင်ဘာကိုအား ၇ နှစ်စာချုပ်ဖြင့် ခေါ်ယူလာပါတယ်။
အသက် ၂၁ နှစ်ရှိ အလယ်တန်းကစားသမားဟာ မော်ဂန်ရော်ဂျာ၊ ဒန်နီဝဲလ်ဘက်၊ အီမန်နူရယ်အီမီဂါ၊ မာဆင့်လာခရွိုက်စ်၊ မာကိုပါလက်စထရာတို့နောက် စတမ်းဖို့ဒ်ဘရစ်ချ်သို့ ရောက်လာတဲ့ ၇ ဦးမြောက်ကစားသမားဖြစ်လာပါတယ်။
အလယ်တန်းကစားသမားဟာ ချဲလ်ဆီးရဲ့ ဟောင်ကောင်ရာသီကြိုလေ့ကျင့်ခန်းအစီအစဉ်နှင့် ပူးပေါင်းလာပါမယ်။ ချဲလ်ဆီးဟာ ဩဂုတ်လ ၅ ရက်နေ့တွင် ဟောင်ကောင်မှာ အီတလီကလပ် ဂျူဗင်တပ်နှင့် ခြေစမ်းပွဲ ကစားလာပါမယ်။
ချဲလ်ဆီးက ဘာကိုအတွက် ပြောင်းရွှေ့ကြေး ဘယ်လောက်ပေးရသလဲဆိုတာ ကြေညာလာခြင်း မရှိပါဘူး။
ဘာကိုဟာ ၂၀၂၆ ကမ္ဘာ့ဖလားပြိုင်ပွဲတွင် ဒုတိယရရှိခဲ့တဲ့ အာဂျင်တီးနားအတွက် ၁ ပွဲကစားခွင့်ရခဲ့သူ ဖြစ်ပြီး အင်္ဂလန်အား ၂-၁ ဖြင့် အနိုင်ရတဲ့ပွဲအပြီးတွင် ဂျူ့ဘယ်လင်ဂမ်ရဲ့ ခေါင်းကို ရိုက်ခြင်းခံခဲ့ရသူလည်း ဖြစ်ပါတယ်။
ဘိုကာဂျူနီယာအကယ်ဒမီထွက်ဟာ ၂၀၂၄ ခုနှစ်တွင် ဘရိုက်တန်သို့ ပေါင် ၇.၉ သန်းဖြင့် ပြောင်းပြီးနောက် တစ်ရာသီသာ ကစားခဲ့ပြီး စထရာဘော့သို့ အငှားဖြင့် ပြောင်းကာ အပြီးသတ်ပြောင်းခဲ့သူ ဖြစ်ပါတယ်။
သူဟာ ယခုနွေရာသီတွင် ချဲလ်ဆီးပိုင်ရှင်တော့ဒ်ဘိုလေးနှင့် Clearlake Capital တို့က ပိုင်ဆိုင်တဲ့ စထရာဘော့မှ ချဲလ်ဆီးသို့ ရောက်လာတဲ့ ဒုတိယမြောက်ကစားသမားလည်း ဖြစ်ပါတယ်။
ယင်းကလပ်နှစ်ခုအကြားတွင် ပြီးခဲ့တဲ့နှစ် နွေရာသီမှစတင်ကာ အပြန်အလှန်အပြောင်းအရွှေ့ ၁၃ ခုအထိ ရှိထားပါတယ်။
