စပိန်ကို ကမ္ဘာ့ဖလားဆီမီးဖိုင်နယ်တွင် ရှုံးနိမ့်ပြီးနောက် ပြင်သစ်ရဲ့ နည်းဗျူဟာပိုင်းကို ကိုင်လီယန်ဘက်ပေး ဝေဖန်လာ
====================
ကိုင်လီယန်ဘက်ပေးဟာ စပိန်ကို ကမ္ဘာ့ဖလားဆီမီးဖိုင်နယ်တွင် ရှုံးနိမ့်ပြီးနောက် ပြင်သစ်နည်းပြဒီဒီယာဒက်ချမ့်ရဲ့ နည်းဗျူဟာပိုင်းအပေါ် ဝေဖန်မှု ပြုလုပ်လာပါတယ်။
ပြင်သစ်အသင်းခေါင်းဆောင်က နည်းပြဘက်ကသာ တိကျကောင်းမွန်တဲ့ ညွှန်ကြားမှု ရှိခဲ့ပါက စပိန်နှင့် ကမ္ဘာ့ဖလားဆီမီးဖိုင်နယ်ပွဲစဉ်တွင် ကွဲပြားအောင် လုပ်ဆောင်နိုင်ခဲ့မယ်လို့ ပြောကြားလာတာလည်း ဖြစ်ပါတယ်။
ဒဲလ်လက်စ်တွင် စပိန်ကို ၂-၀ ဂိုးဖြင့် ရှုံးနိမ့်ခဲ့တဲ့ ပြင်သစ်ဟာ ကမ္ဘာ့ဖလားတတိယနေရာလုပွဲအဖြစ် ယနေ့ည အင်္ဂလန်နှင့် အာဂျင်တီးနားတို့ရဲ့ ဆီမီးဖိုင်နယ်ပွဲစဉ်မှ ရှုံးနိမ့်တဲ့အသင်းနှင့် ထပ်မံ ရင်ဆိုင်ကစားရပါဦးမယ်။
ဘက်ပေးက "စပိန်နဲ့ပွဲမှာ ကျွန်တော်တို့ အလယ်တန်းမှာ ၂ ဦးကို ၃ ဦးနဲ့ ရင်ဆိုင်ခဲ့ရတယ်။ အရမ်းခက်ခဲတယ်။ ဖေဘီယန်(ရုဇ်)နဲ့ ရိုဒရီတို့ ကစားဖို့ အချိန်တွေ အများကြီး ရသွားတယ်။ Press ပိုင်းမှာလည်း အဆက်အသွယ်လုပ်မှု အားနည်းတယ်။ ကျွန်တော်တို့ Press ပိုင်းမှာ တစ်ဦးချင်းလိုက်ကစားသင့်တယ်။ သူတို့ကို ကျွန်တော်တို့နဲ့အတူ ပြေးအောင် လုပ်ရမယ်"လို့ ပြောကြားသွားပါတယ်။
ကိုင်လီယန်ဘက်ပေးဟာ ကမ္ဘာ့ဖလားရွှေဖိနပ်ဆုစာရင်းအား အာဂျင်တီးနားစူပါစတားလီယွန်နယ်မက်ဆီနှင့်အတူ ၈ ဂိုးဖြင့် ဦးဆောင်ထားနိုင်ပါတယ်။
ဘက်ပေးဟာ စပိန်ကို ရှုံးနိမ့်ပြီးနောက် မည်သည်ကစားသမားနှင့်မျှ လက်ဆွဲနှုတ်ဆက်ခြင်း မပြုလုပ်ဘဲ ကွင်းအတွင်းမှ ထွက်ခွာခဲ့ပါတယ်။
ဆက်လက်ပြီး ၎င်းက "ကျွန်တော်တို့ ကစားချင်သလို မကစားခဲ့ရဘူး။ နည်းဗျူဟာပိုင်းပါ။ နည်းဗျူဟာပိုင်းပါ။ ကမ္ဘာ့ဖလားဆီမီးဖိုင်နယ်မှာ ကိုယ်ကစားချင်သလို မကစားနိုင်ဘူးဆိုရင် အနိုင်ရမှာ မဟုတ်ပါဘူး။ စပိန်က သူတို့ရဲ့ ပွဲအစီအစဉ်ကို လေးစားတယ်။ သူတို့ ကစားနေကြအတိုင်း ကစားတယ်။ သူတို့ ဘောလုံးကိုရော ပွဲရှိန်ကိုရော ထိန်းတယ်။ ကျွန်တော်တို့ရဲ့အစီအစဉ်က သူတို့ကွင်းဘက်ခြမ်းမှာ Press လုပ်ပြီး သူတို့ရမ်သမ်အတိုင်း မကစားနိုင်အောင် လုပ်ဖို့ပါ"လို့ ပြောကြားသွားပါတယ်။
ဒီဒီယာဒက်ချမ့်ဟာ ကမ္ဘာ့ဖလားပြိုင်ပွဲအပြီးတွင် ပြင်သစ်နည်းပြရာထူးမှ ထွက်ခွာမယ်လို့ ကြေညာထားသူ ဖြစ်ပြီး ဂန္ထဝင်ကစားသမားဇီဒန်းက ဆက်ခံလာပါမယ်။
