ဗန်ကောက်မြို့၌ အိမ်အကူလုပ်နေရာမှ ကျန်းမာရေးမကောင်း၍ မြန်မာနိုင်ငံပြန်ချင်သူအား အလုပ်သမားသံအရာရှိရုံးကပြန်လည်ပို့ဆောင်ပေးခဲ့
ထိုင်းနိုင်ငံ၊ ဗန်ကောက်မြို့ရှိ အိမ်ရာတစ်ခု၏ နေအိမ်တစ်အိမ်၌ အိမ်အကူအဖြစ်အလုပ်လုပ်ကိုင်နေရာမှ ကျန်းမာရေးမကောင်း၍ မြန်မာနိုင်ငံသို့ပြန်ချင်သူအား ထိုင်းနိုင်ငံဆိုင်ရာ မြန်မာအလုပ်သမားသံအရာရှိရုံးက ကူညီပြန်လည်ပို့ဆောင်ပေးခဲ့ကြောင်း သိရသည်။
အိမ်အကူလုပ်နေသော မြန်မာနိုင်ငံသူသည် ဖုန်းနှင့် အထောက်အထားစာရွက်စာတမ်းများမပါဘဲ မြန်မာသံရုံးသို့လာရောက်၍ ကျန်းမာရေးမကောင်း၍ မြန်မာနိုင်ငံသို့ပြန်လိုသည်ဟု အကူအညီတောင်းခံခဲ့ကြောင်း သိရသည်။
ထို့ကြောင့် ၎င်းအား MOEAA ရုံးတွင် ခေတ္တနေထိုင်ရန် မြန်မာသံရုံးကစီစဉ်ပေးခဲ့ပြီးနောက် MOEAA ၏ရှေ့နေအပါအဝင် သံရုံးမှတာဝန်ရှိသူများက အလုပ်ရှင်နှင့်တွေ့ဆုံပြီး မြန်မာနိုင်ငံသူ၏ ပိုင်ဆိုင်မှုများနှင့် အထောက်အထားစာရွက်စာတမ်းများကိုပြန်လည်ရယူပေးခဲ့ကြကြောင်း သိရသည်။
ထို့နောက် မြန်မာနိုင်ငံသို့ပြန်နိုင်ရန် အလုပ်သမားသံအရာရှိရုံးက လေယာဉ်လက်မှတ်စီစဉ်ပေးပြီး ဇူလိုင် ၁၄ ရက်ညပိုင်းတွင် ဒွန်မောင်းလေဆိပ်သို့ကူညီပို့ဆောင်ပေးရာ မြန်မာနိုင်ငံသူသည် ရန်ကုန်မြို့သို့ဆက်လက်ထွက်ခွာခဲ့ပြီးချောမောစွာရောက်ရှိခဲ့ကြောင်း သိရသည်။
