ရေကြီးရေလျှံမှုအန္တရာယ် ကြိုတင်ကာကွယ်ရေးနည်းလမ်းများကို UNICEF Myanmar အသိပေး
ရေကြီးရေလျှံမှုများသည် ရုတ်တရက်ဖြစ်ပွားနိုင်သော်လည်း ကြိုတင်ပြင်ဆင်ထားခြင်းဖြင့် အသက်အန္တရာယ်နှင့် ပစ္စည်းဥစ္စာထိခိုက်ဆုံးရှုံးမှုများကို လျှော့ချနိုင်ကြောင်း UNICEF Myanmar က အသိပေးထားသည်။
အထူးသဖြင့် ကလေးငယ်များနှင့် ကလေးရှိသည့် မိသားစုများအတွက် ရေကြီးရေလျှံမှုသည် အသက်အန္တရာယ်သာမက နေထိုင်မှုဘဝအပေါ်ပါ ကြီးမားသည့် သက်ရောက်မှုများ ဖြစ်စေနိုင်သဖြင့် ရေမကြီးမီ၊ ရေကြီးနေစဉ်နှင့် ရေကြီးပြီးနောက် လိုက်နာဆောင်ရွက်သင့်သည့် အချက်များကို ကြိုတင်သိရှိထားရန် အရေးကြီးကြောင်း ဖော်ပြထားသည်။
UNICEF Myanmar က မိသားစုအရေးပေါ်အစီအစဉ်ကို ကြိုတင်ရေးဆွဲထားရန်၊ မရှိမဖြစ်လိုအပ်သည့် ပစ္စည်းများပါဝင်သော အရေးပေါ်အိတ်ကို အသင့်ပြင်ဆင်ထားရန်နှင့် အရေးကြီးစာရွက်စာတမ်းများကို ရေမစိုစေရန် လုံခြုံစွာ သိမ်းဆည်းထားရန် အကြံပြုထားသည်။
ထို့ပြင် သက်ဆိုင်ရာတာဝန်ရှိသူများက ရွှေ့ပြောင်းရန် အသိပေးလာပါက ကုန်းမြင့်ပိုင်းသို့ ချက်ချင်းပြောင်းရွှေ့ရန်၊ ကလေးငယ်များကို ရေကြီးနေသည့်နေရာများနှင့် ဝေးကွာစွာထားရှိရန်နှင့် အရေးပေါ်အခြေအနေ ကျော်လွန်ပြီးနောက် ကလေးများ၏ စိတ်ပိုင်းဆိုင်ရာအခြေအနေကို ဂရုစိုက်ကာ လိုအပ်သည့် အားပေးနှစ်သိမ့်မှုများ ပေးအပ်ရန်လည်း တိုက်တွန်းထားသည်။
ရေကြီးရေလျှံနေချိန်တွင် ရေသည် မြင်ရသည်ထက် ပိုမိုနက်ရှိုင်းနိုင်ပြီး ရေစီးသန်ကာ ညစ်ညမ်းမှုများလည်း ပါဝင်နိုင်သဖြင့် ယုံကြည်စိတ်ချရသည့် မိုးလေဝသသတိပေးချက်များကို အမြဲစောင့်ကြည့်ပြီး သက်ဆိုင်ရာတာဝန်ရှိသူများ၏ လမ်းညွှန်ချက်များကို လိုက်နာကြရန် UNICEF Myanmar က အသိပေးထားသည်။
