REZ စီမံချက်အတွက် မိုးစပါးစိုက်ပျိုးစရိတ်ချေးငွေများ စတင်ထုတ်ပေး၊ တောင်သူများ တစ်ဧက ကျပ် ၇ သိန်းခွဲအထိ ရရှိမည်
ပြည်ပပို့ကုန် ဆန်စပါးစိုက်ပျိုးရေးဇုန် (Rice Export Zone – REZ) စီမံချက်အောက်တွင် ပါဝင်ဆောင်ရွက်မည့် တောင်သူလယ်သမားများအတွက် မိုးစပါးစိုက်ပျိုးထုတ်လုပ်မှု ချေးငွေများကို ဆန်ပို့ကုန်ကုမ္ပဏီများက စတင်ထုတ်ပေးလျက်ရှိကြောင်း သိရသည်။
REZ စီမံချက်ကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ စိုက်ပျိုးရေးဦးစီးဌာနနှင့် မြန်မာနိုင်ငံဆန်စပါးအသင်းချုပ်တို့၏ အစိုးရ-ပုဂ္ဂလိက ပူးပေါင်းဆောင်ရွက်မှုဖြင့် အကောင်အထည်ဖော်သွားမည်ဖြစ်ပြီး ၂၀၂၆-၂၀၂၇ ခုနှစ် မိုးစပါးရာသီအတွင်း နေပြည်တော်ကောင်စီနယ်မြေ၊ ဧရာဝတီတိုင်းဒေသကြီး၊ ပဲခူးတိုင်းဒေသကြီးနှင့် ရန်ကုန်တိုင်းဒေသကြီးတို့ရှိ လယ်ယာမြေဧက ၃၅၀,၀၀၀ အထိ အကောင်အထည်ဖော် ဆောင်ရွက်သွားမည်ဖြစ်သည်။
စီမံချက်အရ ဆန်ပို့ကုန်ကုမ္ပဏီများက သက်ဆိုင်ရာဒေသရှိ တောင်သူများအား ကနဦးစိုက်ပျိုးစရိတ်ချေးငွေများနှင့် စိုက်ပျိုးရေးသွင်းအားစုများကို ထောက်ပံ့ပေးလျက်ရှိသည်။
ဇူလိုင် ၅ ရက်တွင် ဧရာဝတီတိုင်းဒေသကြီး၊ ကျောင်းကုန်းမြို့နယ်ရှိ GBS လယ်ယာဝန်ဆောင်မှုစခန်း၌ Good Brother's Co., Ltd က စိုက်ပျိုးစရိတ်ချေးငွေနှင့် သွင်းအားစုများ ထောက်ပံ့ပေးအပ်သည့် အခမ်းအနားကို ကျင်းပခဲ့ပြီး ဧရာဝတီတိုင်းဒေသကြီး ဝန်ကြီးချုပ် ဦးအေးကျော်၊ တိုင်းဒေသကြီးအစိုးရအဖွဲ့ဝင်များ၊ တိုင်းဒေသကြီးလွှတ်တော်ဥက္ကဋ္ဌနှင့် မြန်မာနိုင်ငံဆန်စပါးအသင်းချုပ်ဥက္ကဋ္ဌတို့ တက်ရောက်အားပေးခဲ့ကြသည်။
REZ စီမံချက်အရ တောင်သူများသည် စပါးစိုက်ပျိုးထုတ်လုပ်မှု ချေးငွေအဖြစ် တစ်ဧကလျှင် မြန်မာ့လယ်ယာဖွံ့ဖြိုးရေးဘဏ်မှ ကျပ် ၃ သိန်း၊ ပို့ကုန်ကုမ္ပဏီများမှ ကျပ် ၂ သိန်းနှင့် နိုင်ငံစီးပွားမြှင့်တင်ရေးရန်ပုံငွေမှ ကျပ် ၂ သိန်းခွဲ စုစုပေါင်း ကျပ် ၇ သိန်းခွဲအထိ ရရှိမည်ဖြစ်သည်။
လက်ရှိတွင် ကုမ္ပဏီ ၆၁ ခုက မြို့နယ် ၅၅ မြို့နယ်ရှိ မိုးစပါးစိုက်ဧက ၃၁၃,၉၃၇ ဧကအတွက် ကုမ္ပဏီများ၏ တာဝန်ယူထုတ်ပေးရမည့် စိုက်ပျိုးစရိတ်ချေးငွေများကို ကွင်းဆင်းထုတ်ချေးပေးလျက်ရှိကြောင်း သိရသည်။
ထို့ပြင် REZ စီမံချက်တွင် ပါဝင်ဆောင်ရွက်လိုသည့် ကုမ္ပဏီများနှင့် တောင်သူများကို မြန်မာနိုင်ငံဆန်စပါးအသင်းချုပ်က ဆက်လက်ဖိတ်ခေါ်ထားပြီး ပါဝင်မည့် စိုက်ခင်းဧရိယာမှာ အနည်းဆုံး တစ်ဆက်တည်း ဧက ၃၀၀ ရှိရမည်ဖြစ်ကြောင်း သိရသည်။
