ခန့်အပ်ခြင်းခံရပြီး ၁၈ ရက်အကြာတွင်ပင် ကမ္ဘာ့ဖလားပြိုင်ပွဲဝင်အသင်းနည်းပြ နုတ်ထွက်လာ
===================
ကမ္ဘာ့ဖလားမန်နေဂျာတစ်ဦးဟာ အသင်းရဲ့ နည်းပြအဖြစ် ခန့်အပ်ခြင်းခံရပြီး ၁၈ ရက်အကြာတွင်ပင် နည်းပြရာထူးမှ နုတ်ထွက်လာပါတယ်။
အသက် ၅၇ နှစ်ရှိ နည်းပြဟာ ကမ္ဘာ့ဖလားအုပ်စုအဆင့်မှ ထွက်ခွာရပြီးနောက် ရာထူးမှ နုတ်ထွက်လာတာလည်း ဖြစ်ပါတယ်။
ဟာဗီးရီနတ်ဟာ တူနီးရှားနည်းပြရာထူးမှ နုတ်ထွက်လာတာပါ။
သူဟာ ဆာဘရီလာမိုချီ ထုတ်ပယ်ခြင်းခံရပြီးနောက် ဇွန်လ ၁၆ ရက်နေ့ကမှ တူနီးရှားနည်းပြအဖြစ် ကမ္ဘာ့ဖလားပြိုင်ပွဲ ကျင်းပနေစဉ်အတွင်း ခန့်အပ်ခြင်းခံခဲ့ရတာပါ။
သူဟာ ၂၀၁၈ ကမ္ဘာ့ဖလားပြိုင်ပွဲတုန်းက မော်ရိုကိုနှင့်လည်းကောင်း၊ ၂၀၂၂ ကမ္ဘာ့ဖလားတုန်းက ဆော်ဒီနှင့်လည်းကောင်း ယှဉ်ပြိုင်ပြီးနောက် တတိယမြောက် ကမ္ဘာ့ဖလားကိုင်တွယ်ခွင့်ရလာတာပါ။
ဒါပေမဲ့ တူနီးရှားမှာ ကမ္ဘာ့ဖလားအုပ်စု(F) တွင် ၃ ပွဲလုံး ရှုံးနိမ့်ကာ အုပ်စုအဆင့်မှပင် စောစောစီးစီး ထွက်ခဲ့ရပါတယ်။
လာမူချီဟာ အုပ်စုအဖွင့်ပွဲတွင် ဆွီဒင်ကို ၅-၁ ဖြင့် ရှုံးနိမ့်ပြီးနောက် ထုတ်ပယ်ခြင်းခံခဲ့ရတာပါ။
ယင်းနောက် ရီနတ် ခန့်အပ်ခြင်းခံခဲ့ရပြီး ကမ္ဘာ့ဖလားအုပ်စု ၂ ပွဲကို ကိုင်တွယ်ခဲ့ပေမဲ့လည်း ဂျပန်ကို ၄-၀ ဖြင့်လည်းကောင်း၊ နယ်သာလန်ကို ၃-၁ ဖြင့်လည်းကောင်း ထပ်မံ ရှုံးနိမ့်ခဲ့ပါတယ်။
ဂျပန်ကို ရှုံးနိမ့်တဲ့ပွဲအပြီးတွင် ရီနတ်က တူနီးရှားဘောလုံးအဖွဲ့ချုပ်နှင့် ကာလတိုစာချုပ်သာ ချုပ်ဆိုထားခြင်းမျှသာဖြစ်ကြောင်း ဖွင့်ဟခဲ့ဖူးပါတယ်။
