ပရီးမီးယားလိဂ်အဖွင့်ပွဲအဖြစ် ချန်ပီယံ အာဆင်နယ်နှင့် ရင်ဆိုင်ရမဲ့ ချန်ပီယံရှစ်ချန်ပီယံကိုဗင်ထရီ
====================
၂၀၂၆-၂၇ ပရီးမီးယားလိဂ်ရာသီသစ်အတွက် ပွဲပြက္ခဒိန်ရေးဆွဲမှု ပြုလုပ်ခဲ့ရာ တန်းတက် ကိုဗင်ထရီဟာ အဖွင့်ပွဲအဖြစ် ချန်ပီယံ အာဆင်နယ်နှင့် ရင်ဆိုင်ကစားရပါမယ်။
ဖရန့်လမ်းပတ်ဦးဆောင်တဲ့ ကိုဗင်ထရီဟာ ချန်ပီယံရှစ်ချန်ပီယံအဖြစ် ပရီးမီးယားလိဂ်သို့ တန်းတက်လာခဲ့တာဖြစ်ပြီး ၂၅ နှစ်အတွင်း ပထမဆုံးပရီးမီးယားလိဂ်ပွဲစဉ်အဖြစ် ဩဂုတ်လ ၂၁ ရက်နေ့ သောကြာနေ့တွင် ၂၀၀၄ ခုနှစ်နောက်ပိုင်း ပထမဆုံးပရီးမီးယားလိဂ်ဖလား ဆွတ်ခူးထားတဲ့ အာတီတာရဲ့ အာဆင်နယ်နှင့် ရင်ဆိုင်ရမှာလည်း ဖြစ်ပါတယ်။
ပလေးအော့ဖ်မှ တဆင့် ပရီးမီးယားလိဂ်သို့ တန်းတက်လာတဲ့ ဟားလ်စီးတီးမှာလည်း ဩဂုတ်လ ၂၂ ရက်နေ့ စနေနေ့တွင် ယူနိုက်တက်ကို ဧည့်ခံကစားကစားရမှာ ဖြစ်ပြီး တန်းတက်အစ္စဝှစ်ချ်မှာလည်း ယင်းနေ့တွင်ပင် ဆန်းဒါးလန်းနှင့် ရင်ဆိုင်ကစားရပါမယ်။
ဂွါဒီယိုလာခေတ်အလွန် မန်စီးတီးဟာ ဩဂုတ်လ ၂၃ ရက်နေ့ တနင်္ဂနွေနေ့တွင် နည်းပြသစ်မာကိုရို့စ်ဦးဆောင်လာမဲ့ ဘုန်းမောက်အား ဧည့်ခံကစားရပါမယ်။
အထုတ်ခံရတဲ့ အန်းဆလော့နေရာတွင် အစားထိုးခန့်အပ်ခြင်းခံခဲ့ရတဲ့ အန်ဒိုနီအိုင်ရာအိုလာဦးဆောင်လာမဲ့ လီဗာပူးမှာလည်း ယင်းနေ့တွင်ပင် နယူးကာဆယ်အား အဝေးကွင်းမှာ ရင်ဆိုင်ကစားရပါမယ်။
ဇာဗီးအလွန်ဆို ဦးဆောင်လာမဲ့ ချဲလ်ဆီးက ဩဂုတ်လ ၂၄ ရက်နေ့ တနင်္လာနေ့တွင် နည်းပြသစ်ဖြင့် ဦးဆောင်လာမဲ့ ဖူလ်ဟမ်ကို အဝေးကွင်းမှာ ရင်ဆိုင်ကစားရပါမယ်။
ပရီးမီးယားလိဂ်ရာသီသစ်ကို ၂၀၂၆ ကမ္ဘာ့ဖလားပြိုင်ပွဲအပြီး ၃၄ ရက်အကြာ ဩဂုတ်လ ၂၁ ရက်နေ့ သောကြာနေ့မှာ စတင်လာမှာလည်း ဖြစ်ပါတယ်။
ပရီးမီးယားလိဂ်ရာသီသစ်ကို ချန်ပီယံလိဂ်ဗိုလ်လုပွဲမတိုင်မီ ၆ ရက်အလို ၂၀၂၇ ခုနှစ်၊ မေလ ၃၀ ရက်နေ့တွင် အဆုံးသတ်လာပါမယ်။
၂၀၂၆-၂၇ ရာသီသစ်စတင်မှုမှာ ကမ္ဘာ့ဖလားပြိုင်ပွဲရဲ့ ရိုက်ခတ်မှုကြောင့် ပုံမှန်ထက် နောက်ကျလာသလို ပုံမှန်ထက် ရာသီသိမ်းနောက်ကျလာတာပါ။
ပွဲစဉ် ၃၃ ပွဲကို ပုံမှန်အတိုင်း ရက်သတ္တပတ်အကုန်တွင် ကစားလာမှာ ဖြစ်ပြီး ပွဲစဉ် ၅ ခုကိုမူ ကြားရက်တွင် ကစားလာပါမယ်။
ပရီးမီးယားလိဂ်က ဥရောပပွဲစဉ်များနှင့် မညှိစွန်းစေရန်အတွက် ရာသီသစ်ပြက္ခဒိန်အား အတတ်နိုင်ဆုံး ရေးဆွဲထားကြောင်း ဆိုထားပါတယ်။
လာမဲ့ရာသီတွင် ပရီးမီးယားလိဂ်ကလပ်မှ ၉ သင်းအထိ စံချိန်တင် ဥရောပဝင်ခွင့် ရရှိထားပါတယ်။
အာဆင်နယ၊ မန်စီးတီး၊ ယူနိုက်တက်၊ ဗီလာ၊ လီဗာပူးတို့က ချန်ပီယံလိဂ်ဝင်ခွင့် ရထားပြီး ဘုန်းမောက်၊ ဆန်းဒါးလန်း၊ ခရစ္စတယ်ပဲလေ့စ်တို့က ယူရိုပါလိဂ်ဝင်ခွင့်ရရှိထားကာ ဘရိုက်တန်က ကွန်ဖရင့်လိဂ်ဝင်ခွင့် ရထားပါတယ်။
ခရစ္စမတ်နှင့် ဘောက်ဆင်ဒေးကာလအတွင်းတွင် ကလပ်များဟာ နာရီ ၆၀ အတွင်း နှစ်ပွဲကစားလာရမှာ မဟုတ်ပါဘူး။
ပြီးခဲ့တဲ့ရာသီတုန်းက ယူနိုက်တက်က နယူးကာဆယ်ကို ၁-၀ ဖြင့် အနိုင်ရတဲ့ ပွဲတစ်ပွဲတည်းသာ ဘောက်ဆင်ဒေးတွင် ပွဲကစားခဲ့ပေမဲ့ ယခုရာသီမှာတော့ ပွဲအားလုံးကို ဒီဇင်ဘာလ ၂၆ ရက်နေ့ စနေနေ့တွင် ကစားလာပါမယ်။
