မိခင်ဖြစ်သူနှင့် ဆုံစည်းနိုင်တော့မဲ့ ကိတ်ဗာဒီသူရဲကောင်းဗိုဇင်ညာ
=====================
ကိတ်ဗာဒီဂိုးသမားဗိုဇင်ညာဟာ လာမဲ့ တနင်္ဂနွေနေ့ ဥရုဂွေးနှင့် ကမ္ဘာ့ဖလားပွဲစဉ်မတိုင်မီ မိခင်ဖြစ်သူနှင့် ဆုံစည်းနိုင်တော့မှာ ဖြစ်ပါတယ်။
အသက် ၄၀ နှစ်ရှိ ဗိုဇင်ညာဟာ တနင်္လာနေ့တုန်းက စပိန်နှင့်ပွဲစဉ်တွင် ကိတ်ဗာဒီအား အဖိုးတန် ရမှတ်တစ်မှတ် ရရှိအောင် စွမ်းဆောင်ကာ ပွဲစဉ်အလိုက် အကောင်းဆုံးကစားသမားဆုကို ရယူနိုင်ခဲ့ပါတယ်။
စပိန်နှင့်ပွဲအပြီးတွင် ဗိုဇင်ညာက အမေရိကန်ဗီဇာရရှိရေး ငွေကုန်ကျမှု အလွန်များပြားမှုကြောင့် မိခင်ဖြစ်သူ ကမ္ဘာ့ဖလားပြိုင်ပွဲသို့ ကိုယ်တိုင် လာရောက်အားပေးနိုင်ခြင်း မရှိကြောင်း ဖွင့်ဟခဲ့ပါတယ်။
ယခုအခါမှာတော့ ဗိုဇင်ညာရဲ့မိခင် အန်နာကန်ဒီဒါအီဗိုရာက မိုင်ယာမီသို့ သွားရောက်ဖို့ အားလုံး အလျှင်အမြန် စီစဉ်ထားနိုင်ပြီဖြစ်ကြောင်း အတည်ပြုလာပါတယ်။
အန်နာကန်ဒီဒါအီဗိုရာက "ကျွန်မ အရမ်းပျော်တယ်။ အရမ်း မြန်မြန်ဆန်ဆန် ဖြစ်သွားတာ။ ဒါပေမဲ့ ဘယ်လိုပဲ ဖြစ်ဖြစ် ကျွန်မ ပျော်တယ်။ ကျွန်မသား ကမ္ဘာ့ဖလားကစားနေတာ ကြည့်ရတော့မယ်။ ဘုရားသခင်ဆန္ဒအတိုင်းပါပဲ။ သူ့ကို အားပေးသွားမယ်။ သူ့ကို သတ္တိနဲ့ သန်စွမ်းမှုတွေ ပေးသွားမယ်။ ပွဲပြီးရင် ဖက်သွားမယ်"လို့ ပြောကြားသွားပါတယ်။
အမေရိကန်အောက်လွတ်တော်ဒီမိုကရက်တစ်ခေါင်းဆောင်ဟာကမ်းဂျက်ဖရီးစ်ဟာ ဗိုဇင်ညာရဲ့မိခင်အတွက် အမေရိကန်ဗီဇာကြေး ဖယ်ရှားပေးကာ ခရီးသွားလာရေး စီစဉ်ပေးခဲ့ကြောင်း အတည်ပြုသွားပါတယ်။
ဂျက်ဖရီးစ်က " ဘယ်မိခင်မှ ကိုယ်ကလေး သမိုင်းမှတ်တမ်းရေးနေတာ မြင်ခွင့် မဆုံးရှုံးစေရဘူး"လို့ X တွင် ရေးသားသွားပါတယ်။
ကိတ်ဗာဒီဟာ ကမ္ဘာ့ဖလားပြိုင်ပွဲဝင် အသင်းများထဲတွင် အမေရိကန်ပြည်ဝင်ခွင့်အတွက် ဗီဇာကြေး ပေါင် ၁၁၀၀၀ အာမခံကြေးပေးသွင်းရမဲ့ နိုင်ငံ ၅ နိုင်ငံထဲမှ တစ်ခု ဖြစ်ပါတယ်။ ဒါကြောင့်လည်း ကိတ်ဗာဒီပရိသတ်များအနေဖြင့် ဗီဇာအာမခံကြေးငွေ ပေးသွင်းပြီးမှသာ အမေရိကန်သို့ သွားရောက်နိုင်ပါမယ်။ ဒါပေမဲ့ အမေရိကန်မှ ပြန်လာချိန်မှာတော့ ယင်းငွေများကို ပြန်လည် ရရှိပါမယ်။
ဗိုဇင်ညာဟာ စပိန်နှင့်ပွဲတွင် အထူးလက်စွမ်းပြကာကွယ်မှုများ ပြုလုပ်ပြီးနောက် ပွဲကစားနေချိန်အတွင်းတွင်ပင် အင်စတာဂရမ်အကောင့်တွင် ပရိသတ် ၁.၅ သန်းကျော် ရရှိခဲ့သူ ဖြစ်ပါတယ်။
အသက် ၄၀ နှစ်ရှိ ဗိုဇင်ညာဟာ ကိတ်ဗာဒီအတွက် ၉၁ ပွဲကစားထားသူ ဖြစ်ပြီး ပေါ်တူဂီဒုတိယတန်းကလပ် ချာဗက်စ်တွင် ကစားနေသူ ဖြစ်ပါတယ်။
