မိသားစုကို အချိန်ပေးရန်အတွက် ပရီးမီးယားလိဂ်တန်းတက် အစ္စဝှစ်ချ်နည်းပြရာထူးမှ မက်ကန်နာ နုတ်ထွက်လာ
======================

ကီရန်မက်ကန်နာဟာ ပရီးမီးယားလိဂ်သို့ တန်းပြန်တက်နိုင်အောင် စွမ်းဆောင်ပေးနိုင်ခဲ့ပြီး ရက်သတ္တပတ်အနည်းငယ်အကြာတွင်ပင် အစ္စဝှစ်ချ်နည်းပြရာထူးမှ နုတ်ထွက်လာပါတယ်။
အသက် ၄၀ နှစ်ရှိ မက်ကန်နာဟာ ၂၀၂၁ ခုနှစ်တွင် အစ္စဝှစ်ချ်အား စတင်ကိုင်တွယ်ပြီးနောက် ပြီးခဲ့တဲ့ လေးရာသီအတွင်းတွင် သုံးကြိမ်တိုင်တိုင် တန်းတက်နိုင်အောင်စွမ်းဆောင်ပေးနိုင်ခဲ့သူလည်း ဖြစ်ပါတယ်။ သူဟာ ယင်းတန်းတက် ၃ ကြိမ်မှ ၂ ကြိမ်အား ပရီးမီးယားလိဂ်သို့ တက်ရောက်နိုင်အောင် စွမ်းဆောင်နိုင်ခဲ့တာပါ။
မက်ကန်နာဟာ မေလတုန်းက ချန်ပီယံရှစ်တွင် အစ္စဝှစ်ချ်ကို အဆင့် ၂ နေရာမှာ ရပ်တည်နိုင်အောင် ဦးဆောင်နိုင်ခဲ့ပြီးနောက် ပရီးမီးယားလိဂ်သို့ ထပ်မံပို့ဆောင်နိုင်ခဲ့ပါတယ်။
လက်ရှိအချိန်တွင် လစ်လပ်နေတဲ့ အစ္စဝှစ်ချ်နည်းပြရာထူးအတွက် စထရာဘော့နည်းပြဂယ်ရီအိုနေးလ်က ထိပ်ဆုံးမှ ရေပန်းစားနေပါတယ်။
အသက် ၄၃ နှစ်ရှိ ဝုဗ်နည်းပြဟောင်းဟာ ကစားသမားဘဝတုန်းက အစ္စဝှစ်ချ်ရဲ့ အကြီးမားဆုံးပြိုင်ဘက် နော့ဝှစ်ချ်တွင် ကစားခဲ့သူ ဖြစ်ပေမဲ့ အစ္စ္ဝှစ်ချ်ရဲ့ နည်းပြရာထူးအတွက် လျာထားစာရင်းတွင် ပါဝင်နေပါတယ်။
မက်ကန်နာဟာ လစ်လပ်နေတဲ့ ဖူလ်ဟမ်နည်းပြရာထူးအတွက် နာမည်ကြီးနေပေမဲ့လည်း တကယ်တမ်း အစ္စဝှစ်ချ်နည်းပြရာထူးမှ ထွက်ခွာလာမှုက မိသားစုကို အချိန်ပေးရန်နှင့် ဘောလုံးနှင့် ခေတ္တအဝေးတွင် နေထိုင်ရန် ဖြစ်ပါတယ်။
မက်ကန်နာက "အခုအချိန်က ဘေးထွက်နေရမယ့်အချိန်လို့ ထင်ပါတယ်။ ကြီးမားတဲ့ တိုးတက်မှုတွေ ဖြစ်အောင် လုပ်နိုင်ခဲ့လို့ ဂုဏ်ယူပါတယ်။ ကြီးမားတဲ့မျှော်လင့်ချက် ရှိနေတဲ့အပြင် ကလပ်အနာဂတ်အတွက်လည်း အကောင်းမြင်စရာတွေ ရှိနေပါတယ်။ ပြီးခဲ့တဲ့ ငါးရာသီလုံး ဒီရာထူးမှာ အများကြီး ပေးဆပ်ခဲ့ပြီးတဲ့နောက် စီမံခန့်ခွဲမှုအလုပ်ကနေ နားဖို့ ဆုံးဖြတ်လိုက်ပါပြီ။ မိသားစုကို အချိန်ပေးပါမယ်။ မိသားစုက ကျွန်တော့်နည်းပြဘဝ ခြေလှမ်းတိုင်းမှာ ပါဝင်ခဲ့ကြသူတွေပါ"လို့ ပြောကြားသွားပါတယ်။
မက်ကန်နာဟာ ၂၀၂၁ ခုနှစ် ဒီဇင်ဘာလတွင် ယူနိုက်တက်ပထမအသင်းနည်းပြရာထူးမှ ထွက်ခွာကာ လိဂ် ၁ တွင် ကျင်လည်နေတဲ့ အစ္စဝှစ်ချ်အား ကိုင်တွယ်ခဲ့ပါတယ်။
ယင်းနောက် သူဟာ နောက်တစ်ရာသီတွင် အစ္စဝှစ်ချ်အား ပထမဆုံး ရာသီပြည့်ကိုင်တွယ်ချိန်မှာတော့ ချန်ပီယံရှစ်သို့ တန်းတက်နိုင်အောင် ဦးဆောင်နိုင်ခဲ့ပါတယ်။
သူဟာ ၂၀၂၄ ခုနှစ်တုန်းက အစ္စဝှစ်ချ်ကို ၂ ရာသီဆက် တန်းတက်နိုင်အောင် စွမ်းဆောင်ပေးပြီးနောက် မန်စီးတီးနည်းပြဂွါဒီယိုလာ၊ အာဆင်နယ်နည်းပြအာတီတာတို့ကို ကျော်ဖြတ်ကာ LMA တစ်နှစ်တာအကောင်းဆုံးနည်းပြဆုကိုပါ ရယူနိုင်ခဲ့ပါတယ်။
မက်ကန်နာဟာ လန်ဒန်တွင် မွေးဖွားပြီး မြောက်အိုင်ယာလန်တွင် ကြီးပြင်းလာခဲ့သူ ဖြစ်ပြီး အစ္စဝှစ်ချ်နှင့် ၂ နှစ်စာချုပ်အား ဖျက်သိမ်းခဲ့တာပါ။
သူဟာ အစ္စဝှစ်ချ်အား ၂၂၂ ပွဲ ကိုင်တွယ်ခဲ့ရာမှာ နိုင်ပွဲ ၁၀၅ ပွဲ ရရှိအောင် စွမ်းဆောင်နိုင်ခဲ့ပါတယ်။