ဘာစီလိုနာက အပြီးသတ်မခေါ်ယူဘဲ ယူနိုက်တက်သို့ ပြန်လည်စေလွှတ်လာမှုနှင့်အတူ အနာဂတ်မရေမရာ ဖြစ်လာတဲ့ ရက်ဖို့ဒ်
=====================
ဘာစီလိုနာဟာ မားကပ်စ်ရက်ဖို့ဒ်ကို အပြီးသတ်ခေါ်ယူလာတော့မှာ မဟုတ်တော့ပါဘူး။
စပိန်ချန်ပီယံဟာ ရက်ဖို့ဒ်ကို ပေါင် ၂၆ သန်းဖြင့် အပြီးသတ်ခေါ်ယူမယ်ဆိုတဲ့အချက်ဖြင့် အငှားဖြင့် ခေါ်ယူခဲ့ပေမဲ့လည်း အင်္ဂလန်စတားအန်တိုနီဂေါ်ဒွန်ကို နယူးကာဆယ်ထံမှ ပေါင် ၆၉.၃ သန်းဖြင့် ခေါ်ယူလိုက်ပြီးနောက် စိတ်ပြောင်းလဲသွားခဲ့တာပါ။
အသက် ၂၈ နှစ်ရှိ ရက်ဖို့ဒ်ဟာ ပြီးခဲ့တဲ့ရာသီတုန်းက ဘာစီလိုနာအတွက် အငှားဖြင့် ကစားစဉ် ၁၄ ဂိုးသွင်းပြီး လာလီဂါဖလား ဆွတ်ခူးအောင် ကူညီနိုင်ခဲ့သူ ဖြစ်ပြီး နူးကမ့်သို့ အပြီးသတ်ပြောင်းရန် စိတ်အားထက်သန်နေခဲ့ပါတယ်။
ဒါပေမဲ့ ဘာစီလိုနာက ရက်ဖို့ဒ်ထက် သုံးနှစ်ခွဲ ပိုငယ်တဲ့ ဂေါ်ဒွန်အား ခေါ်ယူလာမှုနှင့်အတူ ယူနိုက်တက်တိုက်စစ်မှူးရဲ့အိပ်မက်ကလည်း အဆုံးသတ်လာပါတယ်။
ရက်ဖို့ဒ်ဟာ ယူနိုက်တက်နှင့် တစ်နှစ်စာချုပ်ကျန်နေသေးသူတစ်ဦးဖြစ်ပြီး တစ်ပတ်လုပ်ခ ပေါင် ၃၂၅၀၀၀ ရရှိနေပါတယ်။
ယူနိုက်တက်ဟာ ပြီးခဲ့တဲ့နွေတုန်းက ဘယ်တောင်ပံကစားသမားအလီဂျန်ဒရိုဂါနာချိုအား ချဲလ်ဆီးသို့ ရောင်းချထားသလို ဂျာဒွန်ဆန်ချိုကိုလည်း ထွက်ခွာခွင့်ပြုထားပြီးဖြစ်ရာ ယခုနွေတွင် ဘယ်ခြမ်းတိုက်စစ်အားဖြည့်ရန် ရှာဖွေနေပါတယ်။
ရက်ဖို့ဒ်ဟာ ကမ္ဘာ့ဖလားပြိုင်ပွဲအပြီးတွင် သုံးပတ်အနားရဦးမှာ ဖြစ်ပြီး အိုင်ယာလန်တွင် ပြုလုပ်မဲ့ ယူနိုက်တက်ရာသီကြိုလေ့ကျင့်ခန်းအစီအစဉ်သို့ သတင်းပို့ရပါမယ်။
ယူနိုက်တက်ဟာ ဥရောပတွင် ခြေစမ်းပွဲ ၆ ပွဲကစားရန် စီစဉ်ထားပြီး ဒဗ္ဗလင်တွင် တစ်ပတ်ကြာ လေ့ကျင့်ခန်းဆင်းကာ လိဒ်နှင့် ခြေစမ်းလာပါမယ်။
အစောပိုင်းတုန်းက ယူနိုက်တက်နှင့် မိုက်ကယ်ကာရစ်တို့ဟာ ရက်ဖို့ဒ်အား ပြန်လည်ခေါ်ယူရန် အစီအစဉ်မရှိပေမဲ့လည်း ကမ္ဘာ့ဖလားပြိုင်ပွဲတွင် ခြေစွမ်းပြနိုင်ခြင်း၊ ဈေးကွက်အတွင်းတွင် စိတ်ကြိုက်ဘယ်တောင်ပံကစားသမား ရှာတွေ့ခြင်း မရှိလာပါက စိတ်ပြောင်းလာနိုင်ပါသေးတယ်။
