မြန်မာ-လာအို တပ်မတော်နှစ်ရပ်ကြား ပူးပေါင်းဆောင်ရွက်မှုများ ပိုမိုတိုးမြှင့်ရေး ဆွေးနွေး

မြန်မာနှင့် လာအို တပ်မတော်နှစ်ရပ်ကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ ပိုမိုတိုးမြှင့်ဆောင်ရွက်သွားရေးကို တပ်မတော်ကာကွယ်ရေးဦးစီးချုပ် ဗိုလ်ချုပ်ကြီး ရဲဝင်းဦးနှင့် လာအိုပြည်သူ့တပ်မတော် စစ်ဦးစီးဌာန ဒုတိယအကြီးအကဲ Major General Vanhthong Boudtavong တို့ ဇွန် ၉ ရက်က တွေ့ဆုံဆွေးနွေးခဲ့ကြောင်း သိရသည်။

တွေ့ဆုံစဉ် ဗိုလ်ချုပ်ကြီး ရဲဝင်းဦးက တပ်မတော်အနေဖြင့် နိုင်ငံတော်အစိုးရ၏ ဦးဆောင်မှုဖြင့် ဒို့တာဝန်အရေးသုံးပါးကို ကာကွယ်စောင့်ရှောက်လျက်ရှိကြောင်း ပြောကြားခဲ့သည်။

ထို့ပြင် မြန်မာနိုင်ငံ၏ လက်ရှိဖြစ်ပေါ်တိုးတက်မှုအခြေအနေများ၊ ဒီမိုကရေစီနည်းကျ ရွေးချယ်ခံထားရသည့် အစိုးရ၏ လုပ်ဆောင်ချက်များ၊ နိုင်ငံဖွံ့ဖြိုးတိုးတက်ရေးဆောင်ရွက်ချက်များနှင့် နိုင်ငံတကာဆက်ဆံရေးကဏ္ဍတွင် တက်ကြွ၍ ဘက်မလိုက်သော နိုင်ငံခြားရေးမူဝါဒအတိုင်း အိမ်နီးချင်းနိုင်ငံများ၊ အာဆီယံအဖွဲ့ဝင်နိုင်ငံများနှင့် ဟန်ချက်ညီစွာ ဆက်ဆံဆောင်ရွက်နေမှုများကိုလည်း ဆွေးနွေးခဲ့ကြသည်။

နှစ်ဖက်တာဝန်ရှိသူများသည် မြန်မာ-လာအို နှစ်နိုင်ငံနှင့် တပ်မတော်နှစ်ရပ်ကြား ချစ်ကြည်ရင်းနှီးသော ဆက်ဆံရေး၊ စစ်ဘက်ပူးပေါင်းဆောင်ရွက်ရေး၊ သံတမန်ဆက်ဆံရေးနှင့် အာဆီယံအဖွဲ့ဝင်နိုင်ငံများအကြား ဆက်ဆံရေး တိုးတက်ကောင်းမွန်လာရေးဆိုင်ရာ ကိစ္စရပ်များကိုလည်း ဆွေးနွေးခဲ့ကြသည်။

ထို့အပြင် CLMV အဖွဲ့ဝင်နိုင်ငံများဖြစ်သည့် ကမ္ဘောဒီးယား၊ လာအို၊ မြန်မာနှင့် ဗီယက်နမ်နိုင်ငံများအကြား ဒေသတွင်း ဖွံ့ဖြိုးတိုးတက်ရေးအတွက် ပူးပေါင်းဆောင်ရွက်နေမှုများ၊ မဟာမဲခေါင်ဒေသခွဲ ပူးပေါင်းဆောင်ရွက်ရေးနှင့် ဧရာဝတီ-ကျောက်ဖရား-မဲခေါင် စီးပွားရေးပူးပေါင်းဆောင်ရွက်မှု မဟာဗျူဟာ (ACMECS) ဆိုင်ရာကိစ္စရပ်များကိုလည်း အမြင်ချင်းဖလှယ်ဆွေးနွေးခဲ့ကြကြောင်း သိရသည်။

ယင်းအပြင် နှစ်နိုင်ငံတပ်မတော်နှစ်ရပ်ကြား ချစ်ကြည်ရေးခရီးစဉ်များ၊ ယဉ်ကျေးမှုနှင့် အားကစားအဖွဲ့များ အပြန်အလှန်စေလွှတ်မှု၊ သင်တန်းသားများ ဖလှယ်ရေးအစီအစဉ်များ၊ မဲခေါင်မြစ်လုံခြုံရေးအပါအဝင် နယ်စပ်ဒေသ လုံခြုံရေးနှင့် တည်ငြိမ်အေးချမ်းရေးဆိုင်ရာ ပူးပေါင်းဆောင်ရွက်မှုများကို တိုးမြှင့်ဆောင်ရွက်သွားရေးအတွက်လည်း ဆွေးနွေးခဲ့ကြသည်။

ထို့နောက် မန္တလေးငလျင်ကြောင့် ဖြစ်ပေါ်ခဲ့သည့် ထိခိုက်ပျက်စီးဆုံးရှုံးမှုများအပေါ် လာအိုနိုင်ငံက လူသားချင်းစာနာထောက်ထားမှုအကူအညီများ၊ ကယ်ဆယ်ရေးအဖွဲ့များနှင့် ထောက်ပံ့ပစ္စည်းများ စေလွှတ်ကူညီပေးခဲ့သည့်အတွက် ကျေးဇူးတင်ရှိကြောင်း မြန်မာဘက်က ပြောကြားခဲ့ကြောင်း သိရသည်။