အင်ဒါဆင်အတွက် မန်စီးတီးရဲ့ အဖွင့် ကမ်းလှမ်းမှုအား ပယ်ချကာ စံချိန်တင်ပြောင်းရွှေ့ကြေး ရရှိရေး ဈေးကိုင်လာတဲ့ နော်တင်ဟမ်ဖောရက်စ်
=====================
မန်စီးတီးရဲ့ အီးလီးယော့အင်ဒါဆင်အား ခေါ်ယူရေး အဖွင့်ကမ်းလှမ်းမှုကို နော်တင်ဟမ်ဖောရက်စ်က ပယ်ချလာပါတယ်။
နော်တင်ဟမ်ဖောရက်စ်ဟာ အင်ဒါဆင်အတွက် ဗြိတိန်စံချိန်တင် ပြောင်းရွှေ့ကြေး ပေါင် ၁၁၅ သန်း ရရှိလိုနေမှုနှင့်အတူ မန်စီးတီးရဲ့ ကနဦး ကမ်းလှမ်းမှုအား ပယ်ချလာတာလည်း ဖြစ်ပါတယ်။
အင်ဒါဆင်ဟာ ၃ နှစ်စာချုပ်ကျန်နေသေးသူ ဖြစ်ပြီး ထွက်ခွာလာမည်ဆိုပါကလည်း နော်တင်ဟမ်ဖောရက်စ်ဘက်က မြင့်မားတဲ့ ပြောင်းရွှေ့ကြေး ရရှိလိုနေတာပါ။
ပဲလေ့စ်ဟာ အင်ဒါဆင်အတွက် အန်ဇိုဖာနန်ဒက်ဇ်၊ မွိုက်စ်ကိုင်စီဒို၊ ဒီကလန်ရိုက်တို့ရဲ့ ပြောင်းရွှေ့ကြေးမျိုး ရရှိလိုနေတာပါ။
ယူနိုက်တက်ကလည်း အသက် ၂၃ နှစ်ရှိ အင်္ဂလန်လက်ရွေးစင်စတားကို ခေါ်ယူရေး စိတ်ဝင်စားနေပေမဲ့လည်း ဖောရက်စ်ဘက်က မြင့်မားတဲ့ ပြောင်းရွှေ့ကြေး တောင်းဆိုမှုကြောင့် နောက်ဆုတ်ထားပြီး ဖြစ်ပါတယ်။
ယူနိုက်တက်ဟာ ကွင်းလယ်အတွက် အတ္တလန္တာမှ ဘရာဇီးကွင်းလယ်ကစားသမားအီဒါဆင်ကို ပေါင် ၃၉ သန်းဖြင့် ခေါ်ယူရေး သဘောတူညီမှု ရရှိထားပြီး ဖြစ်ပါတယ်။
မန်စီးတီးဟာ အသင်းကို ၁၀ နှစ်ကြာ ကိုင်တွယ်ပြီးနောက် ထွက်ခွာသွားတဲ့ ဂွါဒီယိုလာနေရာတွင် လက်ထောက်နည်းပြဟောင်းအန်ဇိုမာရက်စ်ကာကို ခန့်အပ်လာဖို့ ရှိနေပါတယ်။
တကယ်လို့များ မန်စီးတီးသာ အင်ဒါဆင်ကို ပေါင် ၁၁၅ သန်းဖြင့် ခေါ်ယူလာပါက ကလပ်သမိုင်းတွင် ပြောင်းရွှေ့ကြေးအမြင့်မားဆုံးပေးရတဲ့ ကစားသမားဖြစ်လာပါမယ်။ လက်ရှိအချိန်တွင် မန်စီးတီးရဲ့ စံချိန်တင်ပြောင်းရွှေ့ကြေးရှင်အဖြစ် ဂျက်ဂရဲလ်လစ်ရှ်က ပေါင်သန်း ၁၀၀ ဖြင့် ရပ်တည်နေပါတယ်။
အင်ဒါဆင်ဟာ လက်ရှိအချိန်တွင် အင်္ဂလန်အသင်းနှင့်အတူ ဖလိုရီဒါတွင် ကမ္ဘာ့ဖလားပြိုင်ပွဲအတွက် စခန်းသွင်းလေ့ကျင့်မှု ပြုလုပ်နေပါတယ်။
