ဂွါဒီယိုလာရဲ့ နှုတ်ဆက်ပါတီပွဲတွင် ဂျော်ဒန်အပါအဝင် စတားများ ဂုဏ်ပြုခဲ့ကြ
===================
ဘတ်စကက်ဘောဂန္ထဝင်မိုက်ကယ်ဂျော်ဒန်အပါအဝင် နာမည်ကျော်များ ပက်ဂွါဒီယိုလာရဲ့ မန်စီးတီးနှုတ်ဆက်ပါတီပွဲတွင် ဂုဏ်ပြုခဲ့ကြပါတယ်။
အသက် ၅၅ နှစ်ရှိ ပက်ဂွါဒီယိုလာဟာ ပြီးခဲ့တဲ့အပတ်တုန်းက ကလပ်ကို ဆုဖလား ၂၀ ရရှိအောင် စွမ်းဆောင်ပြီးနောက် ရာသီအကုန်တွင် ထွက်ခွာမယ်လို့ ကြေညာခဲ့သူ ဖြစ်ပါတယ်။
NBA သမိုင်းတွင် အကြီးကျယ်ဆုံးကစားသမားများထဲမှ တစ်ဦးဖြစ်တဲ့ မိုက်ကယ်ဂျော်ဒန်၊ မန်စီးတီးအသင်းခေါင်းဆောင်ဟောင်းဗင်းဆင့်ကွန်ပနီတို့ဟာ ပရိသတ် ၁၉၀၀၀ တက်ရောက်ခဲ့ကြတဲ့ Co-Co Live တွင် ပြုလုပ်တဲ့ ဂွါဒီယိုလာရဲ့ နှုတ်ဆက်ပါတီပွဲအား မထင်မှတ်ဘဲ ဂုဏ်ပြုလာကြတာပါ။
မိုက်ကယ်ဂျော်ဒန်ဟာ ဗီဒီယိုမက်ဆေ့ချ်မှ တဆင့် ဂွါဒီယိုလာကို ဂုဏ်ပြုလာတာလည်း ဖြစ်ပါတယ်။
ချီကာဂိုဘူးလ်ဂန္ထဝင်က "မယံ့ကြည်နိုင်စရာကောင်းတဲ့ နည်းပြဘဝအတွက် ဂုဏ်ပြုချင်လို့ ရောက်လာတာပါ။ အနားယူချိန်မှာ ပျော်ပါစေ။ ဆက်သွယ်မှုများနှင့် အဆင်ပြေချောမွေ့ပါစေ။ တည့်တည့်မတ်မတ်ထားပါ။ ဂုဏ်ပြုပါတယ်"လို့ ပြောကြားသွားပါတယ်။
ဂွါဒီယိုလာဟာ ဘတ်စကက်ဘော၊ ဂေါက်ရိုက် အားကစားနည်းများအပေါ်တွင် သဘောကျတဲ့သူဖြစ်ပါတယ်။
ဒါ့အပြင် ဗြိတိန်ဂေါက်အကျော်အမော်တွမ်မီဖလက်ဝုဒ်ကလည်း "ခင်ဗျား နောက်ထပ် ဘာပဲလုပ်လုပ် ဘာနဲ့မဆို ထိုက်တန်ပါတယ်။ မင်းကို သူငယ်ချင်းလို့ ခေါ်ခွင့်ရတာ ဂုဏ်ယူပါတယ်။ ဂုဏ်ပြုပါတယ်။ မင်းက အရမ်းအံ့ဩစရာကောင်းတယ်"လို့ ပြောကြားသွားပါတယ်။
ဝါရင့်နည်းပြနေးလ်ဝါနော့ခ်ကလည်း "မင်းရဲ့ ထွက်ခွာမှုအပေါ် မယံ့ကြည်နိုင်အောင် ဖြစ်ရတယ်။ နည်းပြတွေ အများကြီး ထွက်ခွာသွားတာ မြင်ရဖူးတယ်။ ဒါပေမဲ့ မင်းက တကယ့်ထိပ်တန်းပါ။ ငါမြင်ဖူးသမျှ မန်နေဂျာတွေထဲမှာ အတော်ဆုံးပါ"လို့ ပြောကြားသွားပါတယ်။
ဂွါဒီယိုလာဟာ မန်စီးတီးနောက်ဆုံးပွဲအဖြစ် အီတီဟတ်တွင် ဗီလာအား ၂-၁ ဖြင့် ရှုံးနိမ့်တဲ့ပွဲအား ကိုင်တွယ်ခဲ့ပြီး ပွဲအပြီးတွင် မျက်ရည်ကျနေခဲ့တာ တွေ့ရပါတယ်။
တနင်္လာနေ့ အစောပိုင်းတွင် ထောင်ပေါင်းများစွာ မန်စီးတီးပရိသတ်များဟာ မန်ချက်စတာလမ်းများပေါ် ထွက်ကာ ဂွါဒီယိုလာအား နှုတ်ဆက်ခဲ့ကြပါတယ်။
ယခုရာသီတွင် အောင်မြင်မှုများ ရယူနိုင်ခဲ့တဲ့ အမျိုးသားအသင်း၊ အမျိုးသမီးအသင်းနှင့် အကယ်ဒမီအသင်းတို့ဟာ ဘတ်စ်ကားများဖြင့် အီတီဟတ်ကွင်းသို့ ရောက်လာခဲ့ပြီး ပရိသတ်များရဲ့ ကြိုဆိုမှုခံရပြီးနောက် Co-Co Live သို့ ထွက်ခွာခဲ့တာပါ။
ဂွါဒီယိုလာရဲ့ နှုတ်ဆက်ပွဲသို့ အသင်းခေါင်းဆောင်ဟောင်းဗင်းဆင့်ကွန်ပနီ၊ အလယ်တန်းကစားသမားဂျက်ဂရဲလ်လစ်၊ အသင်းခေါင်းဆောင်ဟောင်းဖာနန်ဒင်ဟို၊ ဂိုးသမားဟောင်းအီဒါဆင်၊ အားကစားဒါရိုက်တာဟောင်းတီကီဘီဂီရက်စတိန်တို့လည်း တက်ရောက်ခဲ့ကြပါတယ်။
ဂွါဒီယိုလာဟာ အိုအေစစ်စတားနိုရယ်ဂယ်လာဂါနှင့် အင်တာဗျူးပြုလုပ်ပြီး နောက်ဆုံးအကြိမ်အဖြစ် နှုတ်ဆက်ခဲ့ပါတယ်။
