မျက်မမြင်နှင့် နားမကြားသောကလေးများကျောင်းများတွင် ကျောင်းသားသစ်များခေါ်ယူ၊ စားသောက်နေထိုင်စရိတ် နိုင်ငံတော်မှ အခမဲ့ထောက်ပံ့မည်
လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန လက်အောက်ရှိ မျက်မမြင်ကျောင်းများနှင့် နားမကြားသောကလေးများကျောင်းများတွင် ယခု ၂၀၂၆-၂၀၂၇ ပညာသင်နှစ်အတွက် ကျောင်းသား၊ ကျောင်းသူသစ်များကို လက်ခံခေါ်ယူနေပြီဖြစ်ကြောင်း ယနေ့ (မေလ ၁၃ ရက်) တွင် အသိပေးထုတ်ပြန်လိုက်သည်။
လျှောက်ထားနိုင်သည့် ကျောင်းများ
မျက်မမြင်ကျောင်းများ
ရန်ကုန်မြို့ (ကြည့်မြင်တိုင်) နှင့် စစ်ကိုင်းမြို့ရှိ မျက်မမြင်ကျောင်းများတွင် လျှောက်ထားနိုင်သည်။
နားမကြားသောကလေးများကျောင်းများ
ရန်ကုန်ကျောင်းနှင့် မန္တလေးကျောင်းတို့တွင် သတ်မှတ်ချက်နှင့်ကိုက်ညီသည့် ကလေးငယ်များ တက်ရောက်ရန် လျှောက်ထားနိုင်သည်။
ခံစားခွင့်နှင့် ထောက်ပံ့မှုများ
အဆိုပါကျောင်းများတွင် တက်ရောက်မည့် ကျောင်းသား၊ ကျောင်းသူများအတွက် ကျောင်းဝင်ကြေးနှင့် ကျောင်းလခများ ပေးသွင်းရန် မလိုသည့်အပြင်၊ ကျောင်းအိပ်ကျောင်းစား နေထိုင်စရိတ်နှင့် စားသောက်စရိတ်များကိုလည်း နိုင်ငံတော်က အခမဲ့ထောက်ပံ့ပေးသွားမည် ဖြစ်သည်။
ဆက်သွယ်စုံစမ်းရန်
ကျောင်းဝင်ခွင့်အတွက် လိုအပ်သည့် အသေးစိတ်သတ်မှတ်ချက်များနှင့် သိရှိလိုသည့် အချက်အလက်များကို လူမှုဝန်ထမ်းဦးစီးဌာန၊ မသန်စွမ်းသူများ ဖွံ့ဖြိုးတိုးတက်ရေးဌာနခွဲ (သို့မဟုတ်) သက်ဆိုင်ရာကျောင်းများသို့ ရုံးချိန်အတွင်း လူကိုယ်တိုင်ဖြစ်စေ၊ ဖုန်းဖြင့်ဖြစ်စေ ဆက်သွယ်စုံစမ်းနိုင်ကြောင်း သတင်းရရှိသည်။
