El Clasico ပွဲတွင် ဖရီးကစ်ဂိုးသွင်းကာ မက်ဆီရဲ့ခြေရာကို နင်းလာတဲ့ ရက်ဖို့ဒ်
==================
မားကပ်စ်ရက်ဖို့ဒ်ဟာ တနင်္ဂနွေနေ့ညတုန်းက နူးကမ့်တွင် ရီးရဲလ်မက်ဒရစ်အား အနိုင်ရတဲ့ El Clasico ပွဲစဉ်တွင် ဖရီးကစ်မှ တဆင့် တိုက်ရိုက်ဂိုးသွင်းယူပြီးနောက် လီယွန်နယ်မက်ဆီရဲ့ခြေရာကို နင်းလာနိုင်ခဲ့ပါတယ်။
ယူနိုက်တက်စတားဟောင်းဟာ ပွဲအစ ၉ မိနစ်တွင် ဖရီးကစ်မှ တဆင့် ထောင့်ကျဉ်းထဲသို့ ကန်သွင်းကာ ဂိုးသွင်းယူပြီးနောက် ၂၀၁၂ ခုနှစ်တုန်းက မက်ဆီနောက်ပိုင်းတွင် El Clasico ပွဲတွင် ဖရီးကစ်မှ တဆင့် ဂိုးသွင်းနိုင်တဲ့ ပထမဆုံးကစားသမားဖြစ်လာပါတယ်။
ဘာစီလိုနာဟာ El Clasico ပွဲတွင် ရက်ဖို့ဒ်၊ ဖာရန်တောရက်စ်တို့ရဲ့ဂိုးဖြင့် ၂-၀ ဖြင့် အနိုင်ရရှိကာ လာလီဂါချန်ပီယံဘွဲ့အား ကာကွယ်လာနိုင်ခဲ့ပါတယ်။
ဒါ့အပြင် ရက်ဖို့ဒ်ဟာ ၂၁ ရာစုအတွင်းတွင် ရီးရဲလ်မက်ဒရစ်နှင့် El Clasico ပွဲတွင် ဖရီးကစ်မှတဆင့် ဂိုးသွင်းယူနိုင်တဲ့ တတိယမြောက်ကစားသမားအဖြစ်လည်း သမိုင်းမှတ်တိုင်စိုက်ထူလာပါတယ်။
ရက်ဖို့ဒ်ဟာ ယခုရာသီတွင် ဘာစီလိုနာသို့ အငှားဖြင့် လာရောက်ကစားစဉ်အတွင်း ပြိုင်ပွဲအရပ်ရပ် ၄၇ ပွဲကစားထားရာမှာ ၁၄ ဂိုးသွင်းပြီး ၁၄ ကြိမ် ဖန်တီးထားနိုင်ပါတယ်။
အသက် ၂၈ နှစ်ရှိ ရက်ဖို့ဒ်ဟာ ခြေစွမ်းပြကစားနိုင်မှုနှင့်အတူ နူးကမ့်သို့ အပြီးသတ်ပြောင်းရေး အခြေအနေကောင်းနေပါတယ်။
ဘာစီလိုနာဟာ ရက်ဖို့ဒ်ရဲ့ အငှားစာချုပ်တွင် နွေရာသီမှာ ယူရိုသန်း ၃၀ ဖြင့် အပြီးသတ်ခေါ်ယူရေးစာချုပ်ပါဝင်ပေမဲ့ ဘဏ္ဍာရေးပြဿနာကြောင့် အငှားဖြင့် နောက်ထပ်တစ်ရာသီခေါ်ယူရေး ဆွေးနွေးနေပါတယ်။
ဒါပေမဲ့ ယူနိုက်တက်ဘက်ကတော့ အငှားဆက်ချထားလိုခြင်း မရှိဘဲ ရက်ဖို့ဒ်ကို အပြီးသတ်သာ ရောင်းချလိုနေပါတယ်။
