ဟာလန်းကို ခေါင်းဖြင့် ဆောင့်ခဲ့တဲ့ ဂါဘရီရယ် အနီကတ်ပြထုတ်ပယ်ခံရသင့်ကြောင်း ပရီးမီးယားလိဂ်ဝန်ခံလာ
========================

ပရီးမီးယားလိဂ်က အာလင်းဟာလန်းကို ခေါင်းဖြင့် ဆောင့်တိုက်ခဲ့တဲ့ ဂါဘရီရယ်မှာ အနီကတ်ပြထုတ်ပယ်ခံရသင့်ကြောင်း ဝန်ခံလာပါတယ်။
ဧပြီလ ၁၉ ရက်နေ့ ပွဲစဉ်တွင် အာဆင်နယ်နောက်ခံလူဂါဘရီရယ်ဟာ မန်စီးတီးတိုက်စစ်မှူးအာလင်းဟာလန်းနှင့် အချင်းများခဲ့ပြီး ခေါင်းဖြင့် ဆောင့်တိုက်ခဲ့ပေမယ့်လည်း ဒိုင်လူကြီးအန်တိုနီတေလာက အဝါကတ်သာ ပြခဲ့ပါတယ်။
တေလာဟာ ဂါဘရီရယ်မှာ အာလင်းဟာလန်းကို ရန်လိုတဲ့စိတ်ဖြင့် ပြုမူခဲ့တာ မဟုတ်ဘူးလို့ ယုံကြည်ခဲ့တာလည်း ဖြစ်ပါတယ်။
တဖက်တွင် VAR ကလည်း တေလာရဲ့ ဆုံးဖြတ်ချက်ကို ကန့်ကွက်ခဲ့ခြင်း မရှိပါဘူး။
ဒါပေမယ့် ယခုအခါမှာတော့ ပရီးမီးယားလိဂ်ရဲ့ Key Match Incidents Panel က တေလာရဲ့ ဆုံးဖြတ်ချက်မှာ မှားယွင်းကြောင်း ၃/၂ မဲဖြင့် ဆုံးဖြတ်လာပါတယ်။
သမာဓိခုံအဖွဲ့ဝင်များက ဂါဘရီရယ်မှာ အာလင်းဟာလန်းကို ရည်ရွယ်ချက် ရှိရှိ ရန်လိုတဲ့ အပြုအမူဖြင့် ပြုလုပ်ခဲ့တာလို့ မဲပေးခဲ့ကြတာပါ။
တဖက်တွင် သမာဓိခုံအဖွဲ့ဝင် ၅ ဦးမှ ၄ ဦးတို့က ယင်းအဖြစ်အပျက်တွင် VAR ဒိုင်က ဝင်ရောက် စွက်ဖက်ခဲ့ခြင်း မရှိမှုမှာ မှန်ကန်တဲ့ ဆုံးဖြတ်ချက်လို့ မဲပေးခဲ့ကြပြန်ပါသေးတယ်။
အဆိုပါပွဲစဉ်တွင် မန်စီးတီးတို့က ၂-၁ ဖြင့် အနိုင်ရခဲ့ရာ ဂါဘရီရယ် အထုတ်မခံရမှုက ပွဲရလဒ်အပေါ် ရိုက်ခတ်ခြင်း မရှိပါဘူး။
ဒါပေမယ့် အနီကတ်သာ ပြသခြင်းခံလာရပါက ဂါဘရီရယ်မှာ ရန်လိုတဲ့ အပြုအမူကြောင့် ၃ ပွဲအထိ ပွဲပယ်ခံလာရမှာ ဖြစ်ပါတယ်။