တိုင်းနှင့် ပြည်နယ် (၅) ခုရှိ အခြေခံပညာကျောင်းများ၌ Pilot Project အနေဖြင့် Smart School နှင့် Football For School Program အကောင်အထည်ဖော်မည်

နိုင်ငံတော်သမ္မတ ဦးမင်းအောင်လှိုင်၏ လမ်းညွှန်ချက်အရ ရက် (၁၀၀) အတွင်း Pilot Project အနေဖြင့် Smart School နှင့် Football For School Program များကို ရန်ကုန်တိုင်း၊ မန္တလေးတိုင်း၊ ဧရာဝတီတိုင်း၊ ပဲခူးတိုင်းနှင့် ရှမ်းပြည်နယ်တို့ရှိ အခြေခံပညာကျောင်းများ၌ အကောင်အထည်ဖော်သွားမည်ဖြစ်ကြောင်း သိရသည်။
ထိုသို့ အကောင်အထည်ဖော်နိုင်ရန် အားကစားရေးရာဝန်ကြီးဌာန ပြည်ထောင်စုဝန်ကြီးဦးရဲမြင့်ထွန်းက ရန်ကုန်တိုင်း၊ သင်္ဃန်းကျွန်းမြို့နယ်ရှိ အမျိုးသားအားကစားပြိုင်ပွဲရုံ (၁) ၌ မြန်မာနိုင်ငံဘောလုံးအဖွဲ့ချုပ်မှ တာဝန်ရှိသူများ၊ အားကစားနှင့်ကာယပညာဦးစီးဌာနမှ အရာထမ်း၊ အမှုထမ်းများနှင့် ဧပြီ ၂၆ ရက်တွင်တွေ့ဆုံခဲ့ကြောင်း သိရသည်။
အားကစားမြှင့်တင်ရေးနှင့် ဘောလုံးအားကစား အဆင့်အတန်းပိုမိုတိုးတက်စေရေးအတွက် အားကစားရေးရာဝန်ကြီးဌာန၊ လူငယ်ရေးရာဝန်ကြီးဌာန၊ ပညာရေးဝန်ကြီးဌာနနှင့် မြန်မာနိုင်ငံဘောလုံးအဖွဲ့ချုပ်တို့ပူးပေါင်း၍ ရက် (၁၀၀) အတွင်း အထက်ပါ တိုင်းနှင့် ပြည်နယ် (၅) ခုရှိ အခြေခံပညာကျောင်းများ၌ Pilot Project အနေဖြင့် အကောင်အထည်ဖော်ဆောင်ရွက်သွားမည်ဟုပြောကြားခဲ့ကြောင်း သိရသည်။
ထို့နောက် မြန်မာနိုင်ငံဘောလုံးအဖွဲ့ချုပ်မှတာဝန်ရှိသူက အဖွဲ့ချုပ်အနေဖြင့် ရက် (၁၀၀) အတွင်း ဆောင်ရွက်မည့် Smart School နှင့် Football For School Program လုပ်ငန်းစဉ်များ၊ တိုင်းနှင့် ပြည်နယ်များရှိ အခြေခံပညာကျောင်းများတွင် အခြေခံဘောလုံးသင်တန်းဖွင့်လှစ်နိုင်ရေး၊ နည်းပြမွမ်းမံသင်တန်းများဖွင့်လှစ်နိုင်ရေး၊ မျိုးဆက်သစ်အားကစားသမားအသစ်များရွေးချယ်နိုင်ရေး၊ ပြိုင်ပွဲများကျင်းပနိုင်ရေး၊ ဘောလုံးများထောက်ပံ့ပေးနိုင်ရေး၊ PE ဆရာ/ ဆရာမများနှင့်ဆက်သွယ်၍ တာဝန်ပေးဆောင်ရွက်နိုင်ရေးတို့ကို ဆွေးနွေးတင်ပြခဲ့ကြောင်း သိရသည်။