ဘော့စနီးယားအား ကမ္ဘာ့ဖလားခြေစစ်ပွဲအောင်မြင်အောင် နောက်ကွယ်မှ ကူညီခဲ့တဲ့ အသက် ၁၄ နှစ်အရွယ် ဘောကောက်အား ကမ္ဘာ့ဖလားလူစာရင်းတွင် ရွေးချယ်ရန် တောင်းဆိုနေကြ
===================
ဘော့စနီးယားဟာ အီတလီကို ကမ္ဘာ့ဖလားပလေးအော့ဖ်ဗိုလ်လုပွဲတွင် အနိုင်ရရှိအောင် နောက်ကွယ်မှ ကူညီခဲ့တဲ့ သူရဲကောင်းသစ် အသက် ၁၄ နှစ်အရွယ် ဘောကောက်လူငယ်လေးအား ကမ္ဘာ့ဖလားလူစာရင်းတွင် ရွေးချယ်ရန် တိုက်တွန်းခြင်းခံနေရပါတယ်။
ဘောကောက် အေဖန်စီမစ်ဟာ ပြီးခဲ့တဲ့အပတ်တုန်းက အီတလီကို အနိုင်ရတဲ့ ကမ္ဘာ့ဖလားပလေးအော့ဖ် ပင်နယ်တီ အဆုံးအဖြတ်တွင် အီတလီဂိုးသမားဒွန်နာရမ်မာအား ပင်နယ်တီမှတ်စု မရှိအောင် ဉာဏ်သုံးကာ ဘော့စနီးယားအား ကူညီခဲ့သူလည်း ဖြစ်ပါတယ်။
စီမစ်ဟာ ဂိုးသမားနှစ်ဦး အချင်းများနေစဉ် အခွင့်ကောင်းယူကာ ဒွန်နာရမ်မာရဲ့ ဘော့စနီးယားကစားသမားများရဲ့ပင်နယ်တီကန်မှု မှတ်စုအား ခိုးယူခဲ့ပါတယ်။
ဘော့စနီးယားနံပါတ်တစ်ဂိုးသမားနီကိုလာဗာဆယ်ရဲ့ ပင်နယ်တီမှတ်စု ဆုတ်ဖြဲခံရချိန်တွင် စီမစ်က ဂိုးပိုက်တွင် ဝှက်ထားတဲ့ ဒွန်နာရမ်မာရဲ့ ပင်နယ်တီမှတ်စုအား ခိုးယူခဲ့တာလည်း ဖြစ်ပါတယ်။
ဒွန်နာရမ်မာဟာ ပင်နယ်တီမှတ်စုအခိုးခံရမှုအတွက် အကြီးအကျယ်ဒေါသထွက်ကာ ဒိုင်လူကြီးအား စောဒကတက်ခဲ့ပါသေးတယ်။
ဒွန်နာရမ်မာဟာ ပင်နယ်တီမှတ်စု မရှိမှုနှင့်အတူ အီတလီအတွက် ပင်နယ်တီတစ်ကြိမ်မျှ ကာကွယ်နိုင်ခဲ့ခြင်းမရှိမှုနှင့်အတူ ကမ္ဘာ့ဖလား ၃ ကြိမ်ဆက် လွဲခဲ့ရပါတယ်။
ဒွန်နာရမ်မာရဲ့ ပင်နယ်တီမှတ်စုအား ခိုးယူခဲ့မှုနှင့်ပတ်သက်ပြီး NK Celik လူငယ်အသင်းတိုက်စစ်မှူးက "စာရွက်အပိုင်းအစမြင်လိုက်တယ်။ ချက်ချင်းပဲ ဘာလဲဆိုတာ သိလိုက်တယ်။ အဲဒါကို ရယူပြီး ဝှက်ထားလိုက်တယ်။ အဲဒီမှာ ကျုပ်တို့ ကစားသမားတွေရဲ့ အချက်အလက်တွေ ရေးထားတယ်။ မှတ်စု မရှိတော့ ဒွန်နာရမ်မာလည်း ကိုယ့်ပါရမီကိုပဲ အားကိုးရတော့တယ်"လို့ ပြောကြားသွားပါတယ်။
ဆက်လက်ပြီး ၎င်းက "သူ(ဒွန်နာရမ်မာ) အရမ်းစိတ်ပျက်သွားတယ်။ ပြီးတော့ ဒေါသလည်း ထွက်တယ်။ ပုဝါကိုလည်း ယူလိုက်ရော စာရွက်မရှိတော့မှန်း သိသွားတယ်။ သူ ရှာသေးတယ်။ ဒါပေမယ့် မရှိတော့ဘူးလေ"လို့ ဆိုသွားပါတယ်။
ယခုအခါ စီမစ်ဟာ ဆိုရှယ်မီဒီယာတွင် ပျံ့နှံ့ကာ နာမည်ကျော်ကြားနေပြီ ဖြစ်ပါတယ်။
စီမစ်ဟာ ဒွန်နာရမ်မာရဲ့ ပင်နယ်တီမှတ်စုအား လေလံတင် ရောင်းချရန် စီစဉ်ထားပြီး ရရှိတဲ့ ငွေကြေးများကို ပရဟိတအဖွဲ့များသို့ လှူဒါန်းသွားပါမယ်။
တဖက်တွင် ပရိသတ်အမြောက်အမြားတို့ကလည်း စီမစ်ကို ကံကောင်းခြင်း အဆောင်အဖြစ် ၂၀၂၆ ကမ္ဘာ့ဖလားသို့ ခေါ်ဆောင်သွားရန် တိုက်တွန်းနေပါတယ်။
ဘော့စနီးယားဟာ ကမ္ဘာ့ဖလားအုပ်စု(ခ)တွင် ပူးတွဲအိမ်ရှင်ကနေဒါ၊ ကာတာ၊ ဆွစ်ဇာလန်တို့နှင့် ကျရောက်နေပါတယ်။
