တစ်နိုင်ငံလုံးယာဉ်မောင်းနှင်မှု ကန့်သတ်ရန် တောင်ကိုရီးယားချိန်ဆနေ

အမေရိက-အစ္စရေးနှင့် အီရန်စစ်ပွဲကြောင့် ထောက်ပံ့ဖြည့်တင်းမှုဆိုင်ရာအခက်အခဲများအကြား စွမ်းအင်ဝယ်လိုအားကို ထိန်းချုပ်ရန် အာဏာပိုင်များက ကြိုးပမ်းနေချိန်တွင် ကမ္ဘာ့ရေနံဈေးနှုန်းများ ထပ်မံမြင့်တက်လာပါက တောင်ကိုရီးယားအစိုးရသည် အများပြည်သူဆိုင်ရာ ယာဉ်မောင်းနှင်မှု ကန့်သတ်ချက်များကို တိုးချဲ့ရန် စဉ်းစားနေကြောင်း အကြီးတန်းအရာရှိများက ပြောကြားခဲ့သည်။

လက်ရှိတွင် တစ်စည်လျှင် ဒေါ်လာ ၁၀၀ မှ ၁၁၀ အထိရှိနေသော ရေနံစိမ်းဈေးးနှုန်းများသည် ဒေါ်လာ ၁၂၀ မှ ၁၃၀ အထိ မြင့်တက်လာပါက အစိုးရသည် အစိုးရဌာနများကိုသာမက ခရီးသည်တင်ကားအသုံးပြမှုကိုပါ ကန့်သတ်ရနိုင်ကြောင်း ဘဏ္ဍာရေးဝန်ကြီး ကိုးယွန်ချိုးလ်က တနင်္ဂနွေနေ့တွင် ပြောကြားခဲ့သည်။

စွမ်းအင်ချွေတာရန်အတွက် ၁၀ ရက်ကြာ ယာဉ်အလှည့်ကျစနစ်ကို ကျင့်သုံးခဲ့သည့် ၁၉၉၁ ခုနှစ် ပင်လယ်ကွေ့စစ်ပွဲနောက်ပိုင်း နိုင်ငံ၏ ပထမဆုံး တစ်နိုင်ငံလုံးအတိုင်းအတာဖြင့် မောင်းနှင်မှုကန့်သတ်ချက်ဖြစ်လာမည်ဖြစ်သည်။

“အရှေ့အလယ်ပိုင်းအခြေအနေပိုဆိုးလာခဲ့ရင် အကျပ်အတည်းသတိပေးချက်က တပ်လှန့်မှုအဆင့်ကို ရောက်သွားမှာဖြစ်ပြီး ဒီအချိန်မှာ ကျွန်တော်တို့ရဲ့ သုံးစွဲမှုကို ထိန်းချုပ်ဖို့ လိုအပ်မှာဖြစ်ပါတယ်” ဟု ကိုးက နိုင်ငံ၏ အဆင့်လေးဆင့်ရှိသော အရင်းအမြစ်ဖူလုံရေးဆိုင်ရာ အကျပ်အတည်းသတိပေးချက်စနစ်တွင် တတိယအမြင့်ဆုံးအဆင့်သို့ ရွေ့လျားမှုကို ရည်ညွှန်း၍ ဒေသတွင်းရုပ်သံတစ်ခုကို ပြောကြားခဲ့သည်။

အိမ်ထောင်စုများအပေါ် ဝန်ထုပ်ဝန်ပိုးကို လျှော့ချရန်အတွက် လောင်စာဆီအခွန် ထပ်မံလျှော့ချရန်ကို အစိုးရက စဉ်းစားနိုင်ကြောင်းလည်း ၎င်းက ဆက်လက်ပြောကြားခဲ့သည်။

တောင်ကိုရီးယားသည် ၎င်း၏ ရေနံစိမ်း၏ ၇၀ ရာခိုင်နှုန်းခန့်ကို အရှေ့အလယ်ပိုင်းဒေသမှ တင်သွင်းပြီး ဒေသတွင်းတင်းမာမှုများကြောင့် ထောက်ပံ့ဖြည့်တင်းမှုဆိုင်ရာ ပြတ်တောက်မှုများနှင့် ဈေးနှုန်းအတက်အကျများကို အလွန်အမင်းရင်ဆိုင်နေရသည်။

ပြီးခဲ့သည့် သီတင်းပတ်တွင် အစိုးရကဏ္ဍအတွက် မဖြစ်မနေလိုက်နာရမည့် ငါးရက်ကြာ ယာဉ်အလှည့်ကျမောင်းနှင်မှုစနစ်ကို ပြဌာန်းခဲ့ပြီး လိုင်စင်နံပါတ်များအပေါ် အခြေခံ၍ ယာဉ်အသုံးပြုမှုကို အစိုးရက ကန့်သတ်ခဲ့သည်။

Ref: သယ်စထရိတ်တိုင်းမ်စ်