CEIR စနစ်သည် အသုံးပြုနေသော ဆင်းကတ်နှင့် မသက်ဆိုင်ဘဲ ဖုန်းကိုသာ မှတ်ပုံတင်ခြင်း ဖြစ်
ပြည်တွင်း၌ မိုဘိုင်းဖုန်းများကို အခွန်ကောက်နိုင်ရန် ဗဟိုမိုဘိုင်းစက်ပစ္စည်း သက်သေခံမှတ်ပုံတင်စနစ် (Central Equipment Identity Register- CEIR)ကို စတင်ကျင့်သုံးသည့် စနစ်သည် လက်ရှိအသုံးပြုနေသော ဆင်းကတ်နှင့် မသက်ဆိုင်ဘဲ ဖုန်းကိုသာ မှတ်ပုံတင်ခြင်း ဖြစ်သည်ဟု အော်ပရေတာတွင် လုပ်ဆောင်နေသူများက ပြောသည်။
“အဓိကကတော့ အခု ကိုယ်သုံးနေတဲ့ ဖုန်းမှာ ဆင်းကတ်နှစ်နေရာစာရှိတယ်၊ ကိုယ်ကလည်း ဆင်းကတ်နှစ်ခုစလုံးကို လက်ရှိသုံးစွဲနေတယ်ဆို အစိုးရရဲ့ မှတ်ပုံတင်စနစ်ထဲမှာ အော်တိုမှတ်ပုံတင်ပြီးသားဖြစ်တယ်” ဟု ဖုန်းအော်ပရေတာလုပ်ငန်းလုပ်ဆောင်နေသူတစ်ဦးက ပေါ်ပြူလာကို ပြောသည်။
ယနေ့သည် အသုံးပြုနေသော ဖုန်းများ၏ IMEI ကို နောက်ဆုံး မှတ်ပုံတင်ရမည့် နေ့ဖြစ်သောကြောင့်လည်း ရနိကုန်မြို့ရှိ ဆင်းကတ်အရောင်းဆိုင်များတွင် တန်းစီဝယ်ယူသူလည်းများပြားနေသည်။
“တကယ်လို့ ကိုယ့်ဖုန်းမှာ ကိုယ်က SIM card slot ၂ နေရာမှာ ဒီကိုယ်သုံးနေတဲ့ ဆင်းကတ်နံပတ်ကိုပဲ စွဲစွဲမြဲမြဲသုံးတယ်ဆိုလည်း အဲဒိဆင်းကတ်ထည့်ထားတဲ့ slot က auto မှတ်ပုံတင်ပြီးသားဖြစ်နေမှာပါ၊ ဒါပေမယ့် နောက်ပိုင်းမှာကိုယ်က အကြောင်းအမျိုးမျိုးကြောင့် နောက်ဆင်းကတ်တခုကိုပါ ကိုယ့်ဖုန်းထဲက နောက် slot တခုမှာ ထည့်သုံးချင်တယ်ဆို မရတော့ဘူး၊ အခွန်ပြန်ဆောင်ပြီးမှ အဲ slot ကို သုံးလို့ရမယ်၊ အဲသဘောပဲ၊ အဲတော့ ကိုယ့်ဖုန်းမှာ ဆင်းကတ်နှစ်နေရာစာရှိတယ်ဆို ကိုယ့်မှာလည်း ဆင်းကတ်တခုပဲရှိတယ်ဆို လွတ်နေတဲ့ တနေရာအတွက် တခြားဆင်းကတ်တခုခုကို နှစ်နာရီလောက်ထည့်ထားပြီး ဖုန်းအဝင်အထွက် ပြောပေးလိုက်ရင်လည်း ဖုန်းမှတ်ပုံတင်ပြီးသား ဖြစ်တယ်” ဟု သူက ပေါ်ပြူလာကို ပြောသည်။
ထို့အတူ e sim နှင့် ပက်သက်၍လည်း “ဖုန်းတချို့မှာက Physical sim နဲ့ e simဆိုပြီး ရှိတတ်တယ်၊ ကိုယ်က physical sim ပဲသုံးနေကြဆို ကိစ္စမရှိဘူး၊ ဒီတိုင်းဆက်သုံးသွားလို့ရတယ်၊ နောက်ပိုင်း e sim ကို ပြောင်းသုံးချင်တယ်ဆို အခွန်ဆောင်ရမယ်ပေါ့နော်၊ အဲတော့ e sim အတွက်ပါ ဖုန်းကို မှတ်ပုံတင်ချင်ရင် ကိုယ်အခုသုံးနေတဲ့ ကတ်ကို သက်ဆိုင်တဲ့ sim application မှာe sim ပြောင်းလိုက်ပြီး မှတ်ပုံတင်ထားပြီးသားဖြစ်တယ်” ဟု ၄င်းက ဆက်လက်ပြောကြားသည်။
ထို့ကြောင့် e-sim ကို မဖြစ်မနေပြောင်းရန် မလိုအပ်ဘဲ မိမိစိတ်ဆန္ဒနှင့်သာ ဆိုင်မည်ဖြစ်ကာ မိမိက အခုဖုန်းတွင် ဆင်းကတ်နှစ်နေရာအတွက် ဆင်းကတ်နှစ်ခုသုံးနေပါကလည်း အဆင်ပြေမည်ဖြစ်သည်။
ထို့အတူ e-sim မပြောင်းဘဲ မိမိအခုသုံးနေသည့် Physical sim ကိုသာ ဆက်လက်အသုံးပြုပါကလည်း ရမည်ဖြစ်ပြီး နောက်ပိုင်း မိမိက e sim အသုံးပြုချင်ပါမှသာ အခွန်ပေးဆောင်ရမည် ဖြစ်သည်။
မိမိ၏ ဖုန်း မှတ်ပုံတင်ခြင်းရှိမရှိ စစ်ဆေးလိုပါက CEIR ဝက်ဘ်ဆိုဒ်မှာ ဂဏန်း ၁၅ လုံး ရှိတဲ့ မိုဘိုင်းဖုန်းရဲ့ မူရင်းအမှတ်အသား (IMEI) ကို ရိုက်ထည့်၍ စစ်ဆေးနိုင်သည်ဟုလည်း သိရသည်။
