ထရမ့်ပ်ခန့်ထားသောအဖွဲ့က သူ့ပုံပါ ရွှေဒင်္ဂါးပြား ထုတ်ဝေရန် အတည်ပြု
မတ် ၂၀ ရက်
ဒေါ်နယ်ထရမ့်ပ် ခန့်အပ်ထားသော အဖွဲ့ဝင်များဖြင့် ဖွဲ့စည်းထားသည့် ဖက်ဒရယ်အနုပညာကော်မတီသည် ၎င်း၏ရုပ်ပုံပါ အထိမ်းအမှတ် ရွှေဒင်္ဂါးပြား ကို ထုတ်ဝေရန် ကြာသပတေးနေ့တွင် တညီတညွတ်တည်း အတည်ပြုခဲ့ကြသည်။ အဆိုပါလုပ်ဆောင်ချက်မှာ အမေရိကန်သမ္မတကို ဂုဏ်ပြုရန် အစိုးရအဖွဲ့၏ကြိုးပမ်းမှုတစ်ခု ဖြစ်သည်။
ဒီမိုကရက်များနှင့် အခြားဖက်ဒရယ် အနုပညာကော်မတီဝင်များ အပါအဝင် ဝေဖန်သူများကမူ လက်ရှိတာဝန်ထမ်းဆောင်ဆဲ သမ္မတတစ်ဦး၏ ရုပ်ပုံဖြင့် ဒင်္ဂါးပြားသွန်းလုပ်ခြင်းသည် အမေရိကန် တန်ဖိုးထားမှုများနှင့် ဆန့်ကျင်နေကြောင်း ပြောကြားခဲ့ကြသည်။ အထူးသဖြင့် ယခုနှစ်သည် အမေရိကန်နိုင်ငံ၏ အနှစ် ၂၅၀ ပြည့် မွေးနေ့ဖြစ်သကဲ့သို့ ဗြိတိသျှ ဘုရင်စနစ် အုပ်ချုပ်မှု ကို အဆုံးသတ်ခြင်းကို ဆင်နွှဲနေသည့် အချိန်လည်း ဖြစ်သည်။
အနုပညာကော်မရှင် သို့ အမေရိကန်ဒင်္ဂါးသွန်းစက်ရုံ အရာရှိတစ်ဦး၏ တင်ပြချက်တွင် ၂၄ ကာရက်ရွှေဒင်္ဂါး၏ အချင်းမှာ အများဆုံး ၃ လက်မ (၇.၆၂ စင်တီမီတာ) အထိ ရှိနိုင်ကြောင်း ဆွေးနွေးခဲ့ကြသည်။
ယခုနှစ်အတွင်း ကော်မရှင်တွင် ထရမ့်ပ်ခန့်အပ်ခဲ့သည့် အသက် ၂၆ နှစ်အရွယ် အိမ်ဖြူတော် လက်ထောက် ချမ်ဘာလိန်း ဟဲရစ် က အကြီးဆုံးဖြစ်နိုင်မည့် ဒင်္ဂါးအရွယ်အစားမှာ ထရမ့်ပ် အကြိုက်ဆုံးဖြစ်လိမ့်မည်ဟု ပြောကြားခဲ့သည်။
“ပိုကြီးလေ ပိုကောင်းလေပါပဲ” ဟု ၎င်းက ပြောကြားခဲ့ပြီးနောက် မကြာမီမှာပင် ကော်မတီတစ်ခုလုံးက ဒင်္ဂါးပြားထုတ်ဝေရန် အတည်ပြုခဲ့ခြင်း ဖြစ်သည်။
ယခုအခါ အမေရိကန်ဒင်္ဂါးသွန်းစက်ရုံသည် ဒင်္ဂါးပြား၏ နောက်ဆုံးအရွယ်အစား သတ်မှတ်ချက်များကို ထုတ်ပြန်မည်ဖြစ်သည်။ ထရမ့်ပ်ကိုယ်တိုင်ကလည်း ဒီဇိုင်းကို အတည်ပြုပြီးဖြစ်သည်။ ထရမ့်ပ်အပေါ် သစ္စာရှိသူ ဘဏ္ဍာရေးဝန်ကြီး စကော့ ဘဲဆင့် က ဒင်္ဂါးပြားသွန်းလုပ်ရန် အမိန့်ထုတ်ပြန်လိမ့်မည်ဖြစ်ကြောင်း သိရသည်။
Ref: ဆော့သ်ချိုင်းနားမောနင်းပို့စ်
