ဗန်းမောက် စစ်ရှောင်တွေ မြို့တွင်း နေရပ်ပြန်လည် ဝင်ရောက်နေထိုင်မှုများလာ
စစ်ကိုင်းတိုင်း ၊ ဗန်းမောက်မြို့မှာ စစ်ရှောင် ဒေသခံတွေ နေရပ် ပြန်လည်ဝင်ရောက် နေထိုင်မှု ရှိနေပြီဖြစ်တယ်လို့ ဒေသခံတွေဆီက သိရပါတယ် ။
ရှမ်းနီအမျိုးသားများတပ်မတော် (SNA) က
ဗန်းမောက်မြို့တွင်းမှာ မိုင်းရှင်းလင်းရေးလုပ်ဆောင်မှုကို ထိုက်သင့်သလောက် လုပ်ဆောင်ပြီးဖြစ်တဲ့အတွက် စစ်ဘေးရှောင် ပြည်သူတွေကို မတ် ၁၈ ရက်နေ့ကစပြီး မြို့တွင်းပြန်လည်နေထိုင်ခွင့် ပြုလိုက်တာဖြစ်တယ်လို့ သိရပါတယ် ။
ဒါကြောင့် လက်ရှိမှာ စစ်ရှောင်ပြည်သူတချို့က နေရပ်ပြန်လည် နေထိုင်မှုရှိလာသလို တချို့ကတော့ နေရပ်မပြန်သေးဘဲ အခြေအနေကို စောင့်ကြည့်နေကြဆဲ ဖြစ်တယ်လို့ သိရပါတယ် ။
" မနေ့ကစပြီး မြို့ထဲပြန်ဝင်လို့ရပြီ ပြောလို့ အခြေအနေကို သွားကြည့်ကြတဲ့သူတွေရှိသလို အိမ်ပြန်နေကြသူတွေလည်းရှိတယ်။ စစ်ရှောင်အကုန်လုံးတော့ နေရပ်မပြန်ကြသေးဘူး ။ SNA ကလည်းအခုမိုင်းရှင်းတာတွေ လုပ်ထားတယ်ဆိုပေမယ့် တမြို့လုံးအကုန်တော့ မလုပ်နိုင်သေးဘူးဆိုတော့လေ ။ အိမ်ပြန်နေသူတွေကို သူတို့ကအသိပေးထားတယ်။ ထူးခြားတာ ၊မသင်္ကာစရာပစ္စည်း ၊ ဗုံး တခုခုနဲ့တွေ့ရင် အကြောင်းကြားဖို့ ပြောထားတယ် သိရတယ် ။ " လို့ စစ်ရှောင်ကူညီနေသူ ဒေသခံက ပြောပါတယ် ။
စစ်ရှောင်ဒေသခံ တွေအနေနဲ့ ဗန်းမောက်မြို့တွင်းကို နေရပ်ပြန်လည် နေထိုင်ခွင့်ရပေမယ့်လည်း မြို့တွင်းမှာရှိတဲ့ လူနေအဆောက်အဦးတွေအနေနဲ့ တိုက်ပွဲကြောင့် လက်နက်ထိမှန် ပျက်စီးမှုရှိခဲ့တာကြောင့် ပြန်လည်ထူထောင်ရေးအတွက် အကူအညီတွေ လိုအပ်တယ်လို့ သိရပါတယ်။
" တိုက်ပွဲကြောင့် မြို့ထဲမှာ တော်တော်များများ ပျက်စီးမှုရှိထားတယ်။ နေရပ်ပြန်ခွင့်ရပေမယ့် တိုက်ပွဲကြောင့် အိမ်မရှိတော့တဲ့သူတွေ အများကြီးရှိတယ်။တချို့လည်း ပျက်စီးကုန်တယ်။ အဲဒီလိုလူတွေအတွက် အကူအညီတွေလိုအပ်ပါတယ်။" လို့ သူက ထပ်မံပြောပါတယ်။
ဗန်းမောက်မြို့ကို ပြီးခဲ့တဲ့ ဖေဖော်ဝါရီ ၈ ရက်နေ့မှာ အစိုးရတပ်နဲ့ SNA ပူးပေါင်းတပ်တွေက ပြန်လည်ထိန်းချုပ်ခဲ့တာဖြစ်ပါတယ်။ မြို့ကို ပြန်လည်သိမ်းပိုက်ပြီးနောက်မှာ နယ်မြေရှင်းလင်းရေးကို ဆက်လက်လုပ်ဆောင်ခဲ့ပြီး မိုင်းရှင်းလင်းရေးကိုပါ လုပ်ဆောင်ခဲ့တာ ဖြစ်တယ်လို့ သိရပါတယ်။
ဗန်းမောက်မြို့ကို KIA ပူးပေါင်းတပ်တွေဟာ ၂၀၂၅ ခုနှစ် စက်တင်ဘာ ၁၅ ရက်မှာ စတင်တိုက်ခိုက်ခဲ့ပြီး ၂၀ ရက်မှာ မြို့ကိုထိန်းချုပ်နိုင်ခဲ့တာ ဖြစ်ကြောင်း အဲဒီနောက် အောက်တိုဘာမှာ အစိုးရတပ်နဲ့ SNA တပ်တွေက ပြန်လည် ထိုးစစ်ဆင်တိုက်ခိုက်ခဲ့တာကြောင့် မြို့ကို ပြန်လည်ထိန်းချုပ်နိုင်ခဲ့တာ ဖြစ်တယ်လို့ သိရပါတယ်။
ဗန်းမောက်မြို့မှာဖြစ်ပွားခဲ့တဲ့ တိုက်ပွဲကြောင့် မြို့တွင်းရှိ အဆောက်အဦးတွေမှာ လက်နက်ကြီး ၊ ဗုံးထိမှန်မှုကြောင့် ၈၀ ရာခိုင်နူန်းလောက်အထိ ပျက်စီးမှုရှိခဲ့တယ်လို့ သိရပါတယ် ။
