တံကောက်ကြောဒဏ်ရာကြောင့် ရက်သတ္တပတ်အတန်ကြာ အနားယူရတော့မယ့် ချဲလ်ဆီးရဲ့ ရီစီဂျိမ်းစ်
===================
ချဲလ်ဆီးနောက်ခံလူရီစီဂျိမ်းစ်မှာ တံကောက်ကြောဒဏ်ရာကြောင့် ရက်သတ္တပတ်အတန်ကြာ အနားယူလာရတော့မှာ ဖြစ်ကြောင်း နည်းပြရိုဆင်နီယက အတည်ပြုလာပါတယ်။
ချဲလ်ဆီးအသင်းခေါင်းဆောင်ဟာ ပီအက်စ်ဂျီနှင့် ချန်ပီယံလိဂ် ၁၆ သင်း ရှုံးထွက်အဆင့် ဒုတိယအကျော့ပွဲစဉ်မှ စတင် လွဲချော်လာပါမယ်။ ချဲလ်ဆီးဟာ ပထမအကျော့တုန်းက ပဲရစ်တွင် ၅-၂ ဖြင့် ရှုံးနိမ့်ထားရာ ရီစီဂျိမ်းစ် မပါဝင်နိုင်မှုကြောင့် ကြီးမားတဲ့ ထိုးနှက်ချက် ကြုံလာရပါတယ်။
အသက် ၂၆ နှစ်ရှိ ရီစီဂျိမ်းစ်ဟာ ယခုလနှောင်းပိုင်းတွင် ဥရုဂွေး၊ ဂျပန်တို့နှင့် ကစားမယ့် အင်္ဂလန်ရဲ့ ခြေစမ်းပွဲများကိုလည်း လွဲလာပါမယ်။
သူဟာ စနေနေ့တုန်းက စတမ်းဖို့ဒ်ဘရစ်ချ်ကွင်းတွင် နယူးကာဆယ်အား ၁-၀ ဖြင့် ရှုံးနိမ့်တဲ့ ပွဲစဉ်တွင် ဒဏ်ရာရရှိလာတာလည်း ဖြစ်ပါတယ်။
ရီစီဂျိမ်းစ်ဟာ ပြီးခဲ့တဲ့ရာသီများတွင် ဒဏ်ရာပြဿနာများနှင့် ရုန်းကန်ရပြီးနောက် ယခုရာသီတွင် ဒဏ်ရာကင်းကင်းဖြင့် ကစားလာနိုင်မှုနှင့်အတူ မကြာသေးမီတုန်းက ကလပ်တွင် ၂၀၃၂ ခုနှစ်အထိ ရှိနေမယ့် ၇ နှစ်စာချုပ်သစ်အား ချုပ်ဆိုခဲ့သူလည်း ဖြစ်ပါတယ်။
ဒါ့အပြင် ချဲလ်ဆီးရဲ့တောင်ပံကစားသမားဂျေမီဂတ်တန်၊ ဂိုးသမားဖီးလစ်ဂျော်ဂျင်ဆင်၊ နောက်ခံလူလီဗီကိုလ်ဝဲလ်တို့မှာလည်း ပီအက်စ်ဂျီနှင့်ပွဲတွင် ပါဝင်လာမှာ မဟုတ်ပါဘူး။
ဒါပေမယ့် ဘရာဇီးတိုက်စစ်သမားအက်စတီဗာအိုဝီလီယံမှာ လေ့ကျင့်ခန်းပြန်ဆင်းလာနိုင်မှုနှင့်အတူ ပီအက်စ်ဂျီနှင့်ပွဲတွင် ပါဝင်လာဖို့ ရှိနေပါတယ်။
ပထမအကျော့တုန်းက ပဲရစ်တွင် ကစားတုန်းက ဘောကောက်လူငယ်အား တွန်းခဲ့တဲ့ နီတိုမှာလည်း ယူအီးအက်ဖ်အေရဲ့ သတိပေးခြင်းသာ ခံရမှုနှင့်အတူ စတမ်းဖို့ဒ်ဘရစ်ချ်ပွဲစဉ်တွင် ပါဝင်လာပါမယ်။
