တပ်မတော်သည် နိုင်ငံသားအားလုံးလိုလားသည့် ဒီမိုကရေစီစနစ်ကို စတင်အသက်သွင်းနိုင်ခဲ့
တပ်မတော်သည် နိုင်ငံသားအားလုံးလိုလားသည့် ဒီမိုကရေစီစနစ်ကို စတင်အသက်သွင်းနိုင်ခဲ့သည်ဟု နိုင်ငံ တော်ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ မတ် ၁၃ ရက်ကကျင်းပသည့် မြန်မာ့မျက်နှာစာသစ်ဖိုရမ်ဖွင့်ပွဲတွင် ပြောကြားခဲ့ခြင်းဖြစ်သည်။
" ဘယ်လိုဘဲဖြစ်ဖြစ် တပ်မတော်ဟာ နိုင်ငံသားအားလုံးလိုလားတဲ့ ဒီမိုကရေစီစနစ်ကို စတင်အသက်သွင်းနိုင်ခဲ့သလို အရေးကြီးတဲ့ နိုင်ငံရေးအလှည့်အပြောင်းကြီးတစ်ခုကိုလည်း အောင်အောင်မြင်မြင်နဲ့ဆောင်ရွက်နိုင်ခဲ့ပြီဖြစ်ပါတယ်"ဟု နိုင်ငံတော်ယာယီသမ္မတက ပြော သည်။
ထို့ကြောင့် ရရှိထားပြီးဖြစ်သည့် နိုင်ငံရေး၊ စီးပွားရေးဖြစ်ထွန်းမှုများကို ငြိမ်းချမ်းရေးတည်ဆောက်မှုဖြစ်စဥ်များနှင့်ပေါင်းစပ်ဆောင်ရွက်နိုင်ရန် မိမိတို့အားလုံးကြိုးစားဆောင်ရွက်သွားရမည်ကာ ယနေ့ မြန်မာနိုင်ငံတွင် နိုင်ငံရေးအရ လွတ်လပ်မှုရှိနေပြီး ယခင်က မပြောနိုင်သည့်ကိစ္စများ၊ မပြောရဲသည့်ကိစ္စများကို ပြောရဲဆိုရဲ ပြောနိုင်ဆိုနိုင်ရှိလာပြီဖြစ်ကာ ယခင်က မမျှော်လင့်ရဲခဲ့သည်များကို မျှော်လင့်နိုင်သကဲ့သို့ ယခင်က မမက်ရဲခဲ့သည့် အိမ်မက်များကိုလည်း မက်ခွင့်ရနေပြီဟု ပြော သည်။
" ကမ္ဘာ့နိုင်ငံအားလုံးနီးပါး မျက်နှာမူရာဖြစ်တဲ့ ဒီမိုကရေစီစနစ်ကို စနစ်တကျပြောင်းလဲနိုင်ခဲ့ပြီး နိုင်ငံရေးအ သစ်၊ ယဥ်ကျေးမှုအသစ်တွေကိုလည်း ပြောင်းလဲပေးနိုင်ခဲ့ပြီဖြစ်ပါတယ်"ဟု နိုင်ငံတော်ယာယီသမ္မတက ပြောသည်။
အစိုးရအဆက်ဆက်မှ ပြည်တွင်းငြိမ်းချမ်းရေးရရှိရန် ကြိုးစားခဲ့ကြပြီး လုံးဝအဆုံးသတ်အောင်မြင်သည်အထိ မဆောင်ရွက်နိုင်ခြင်းမှာ ပြည်တွင်း/ပြည်ပမှ သွေးထိုးနှောင့်ယှက်မှုများကြောင့်ဖြစ်ပြီး ပြည်တွင်းငြိမ်းချမ်းရေးရရှိရန် အပစ်အခတ်ရပ်စဲရေးတစ်ခုတည်းသာမက လက်နက်ကိုင်ပဋိပက္ခများ၏ ဇစ်မြစ်ကိုပါဖြေရှင်းနိုင်အောင်ကြိုးစားရမည်ဖြစ်ရာ နိုင်ငံရေးနည်းလမ်းဖြင့်သာ ဖြေရှင်းပေးကြရမည်ဟု ပြောသည်။
ထို့ကြောင့် တိုင်းရင်းသားအချင်းချင်း၊ တစ်ဦးနှင့်တစ်ဦး အပြန်အလှန်လေးစားမှု၊ နားလည်မှု၊ စာနာမှုများမွေးမြူပြီး အနာဂတ်နိုင်ငံတော်ကို အနာဂတ်မျိုးဆက်သစ်များအတွက် အမျိုးသားစည်းလုံးညီညွတ်ရေးလမ်းကြောင်းပေါ် အတူတကွလျှောက်လှမ်းကြရန်လည်း အစဥ်အမြဲဖိတ်ခေါ်ကမ်းလှမ်းခဲ့ကာ ယခုလည်း ဆက်လက်ဖိတ်ခေါ်သည်ဟု နိုင်ငံတော်ယာယီသမ္မတက ပြောကြားခဲ့သည်။
