အီရန်စစ်သင်္ဘောကို အိန္ဒိယက ကမ်းကပ်ခွင့်ပြု

အိန္ဒိယနိုင်ငံသည် လူသားချင်းစာနာထောက်ထားမှုဆိုင်ရာ လုပ်ဆောင်ချက်တစ်ရပ်အနေဖြင့် အီရန်စစ်သင်္ဘောတစ်စင်းကို ကမ်းကပ်ခွင့်ပြုခဲ့ကြောင်း နိုင်ငံခြားရေးဝန်ကြီး ဆူဘရာမန်ယမ် ဂျေးရှန်ကာက စနေနေ့တွင် ပြောကြားခဲ့သည်။ အိမ်နီးချင်း သီရိလင်္ကာနိုင်ငံကမ်းလွန်တွင် နောက်ထပ်အီရန်ရေတပ်သင်္ဘောတစ်စင်းကို အမေရိက,က နှစ်မြှုပ်ခဲ့ပြီးနောက် အိန္ဒိယက ထိုကဲ့သို့ထုတ်ဖော်ပြောကြားလာခြင်းဖြစ်သည်။

အမေရိကန်ရေငုပ်သင်္ဘောက အီရန်ရေတပ်ဖရီးဂိတ်သင်္ဘော ဒီနာကို တိုက်ခိုက်နှစ်မြှုပ်ခဲ့သည့်နေ့တွင်ပင် တေရန်၏ အရေးပေါ်တောင်းဆိုချက်အရ လာဗန် သင်္ဘောသည် အိန္ဒိယတောင်ပိုင်း ကိုချီဆိပ်ကမ်းတွင် ဗုဒ္ဓဟူးနေ့က ကမ်းကပ်ခဲ့ခြင်းဖြစ်ကြောင်း အိန္ဒိယအစိုးရသတင်းရင်းမြစ်တစ်ခုက ရိုက်တာသတင်းဌာနကို ပြောကြားခဲ့သည်။

ရက်သတ္တတစ်ပတ်ကြာလာပြီဖြစ်သည့် အမေရိကနှင့် အစ္စရေးတို့၏ အီရန်ကိုစစ်ခင်းမှုတွင် အီရန်ရေတပ်ကို ဖျက်ဆီးခြင်းသည် စစ်ပွဲ၏ အဓိကရည်ရွယ်ချက်တစ်ခုဖြစ်ကြောင်း အမေရိကန်သမ္မတ ဒေါ်နယ်ထရမ့်ပ်က ပြောကြားခဲ့သည်။

အမေရိကန်ရေတပ်အင်စတီကျူ့၏ အွန်လိုင်းသတင်းဝက်ဘ်ဆိုက်တွင် ဖော်ပြချက်အရ ကုန်းလမ်း‌ေရာ ရေ လမ်းပါ နှစ်လမ်းသုံး ကမ်းတက်သင်္ဘော လာဗန်နှင့် အခြားစစ်သင်္ဘောနှစ်စင်းသည် သင်္ဘောအုပ်စု ပြန်လည်စစ်ဆေးခြင်းအတွက် လာရောက်ခဲ့ပြီးနောက်တွင်ပိတ်မိနေခဲ့သည်ဟု ဂျေးရှန်ကာက နှစ်ပတ်လည် ရိုင်ဆီနာဒိုင်ယာလော့ အခမ်းအနားတွင် ပြောကြားခဲ့သည်။

ဥပဒေရေးရာကိစ္စများထက် လူသားဆန်မှု ရှုထောင့်မှ မိမိတို့ က ချဉ်းကပ်ခဲ့သည်ဟု ယူဆကြောင်း ၎င်းက ပြောကြားခဲ့ပြီး မိမိတို့လုပ်ရပ်သည် မှန်ကန်သည်ဟု ထင်ကြောင်း ပြောကြားခဲ့သည်။

အိန္ဒိယနိုင်ငံသည် စစ်ပွဲစတင်သည့်နေ့ဖြစ်သည့် ဖေဖော်ဝါရီလ ၂၈ ရက် နေ့တွင် လာဗန်အတွက် ကမ်းကပ်ခွင့်ပြုရန် တောင်းဆိုမှုကို လက်ခံရရှိခဲ့ကြောင်း သတင်းရင်းမြစ်က သောကြာနေ့အနှောင်းပိုင်းတွင် ပြောကြားခဲ့သည်။ သင်္ဘောသည် စက်ချို့ယွင်းသောကြောင့် အရေးတကြီး တောင်းဆိုမှုဖြစ်ကြောင်း ၎င်းက ဆက်လက်ပြောကြားခဲ့သည်။

Ref: စီအင်န်အေ