လန်ချန်း-မဲခေါင် ပူးပေါင်းဆောင်ရွက်မှုအောက်တွင် မြန်မာနိုင်ငံ၏ ဆိုလာ PV စံချိန်စံညွှန်းနှင့် စမ်းသပ်ရေးစင်တာ စီမံကိန်း စတင်
လန်ချန်း-မဲခေါင် ပူးပေါင်းဆောင်ရွက်မှု ပထမဆုံးအကြိမ် နိုင်ငံ့ခေါင်းဆောင် အစည်းအဝေးကျင်းပခဲ့သည့် (၁၀) နှစ်ပြည့်အခါသမယအဖြစ် လန်ချန်း-မဲခေါင် ပူးပေါင်းဆောင်ရွက်မှု အထူးရန်ပုံငွေဖြင့် ပံ့ပိုးကူညီသည့် “Establishing Myanmar’s Solar PV Industry Technical Standards and Solar PV Testing Center” စီမံကိန်း စတင်ခြင်းအခမ်းအနားနှင့် ဆိုလာလုပ်ငန်း စံချိန်စံညွှန်း သတ်မှတ်ရေး အလုပ်ရုံဆွေးနွေးပွဲကို မတ်လ ၄ ရက်နေ့တွင် နေပြည်တော်၌ ကျင်းပခဲ့သည်။
အခမ်းအနားသို့ မြန်မာနိုင်ငံဆိုင်ရာ တရုတ်သံရုံးမှ သံမှူးကြီး ဒေါက်တာ Zheng Zhihong၊ မြန်မာနိုင်ငံ သိပ္ပံနှင့်နည်းပညာဝန်ကြီးဌာန ဒုတိယဝန်ကြီး ဒေါက်တာ အောင်ဇေယျ၊ နိုင်ငံခြားရေးဝန်ကြီးဌာန အပြည်ပြည်ဆိုင်ရာအဖွဲ့အစည်းများနှင့် စီးပွားရေးဦးစီးဌာန ဒုတိယညွှန်ကြားရေးမှူးချုပ်နှင့် မဲခေါင်–လန်ချန်း ပူးပေါင်းဆောင်ရွက်မှု ညှိနှိုင်းကွပ်ကဲရေးအဖွဲ့ ဒုတိယဥက္ကဋ္ဌ ဦးအောင်ကျော်မိုး အပါအဝင် သက်ဆိုင်ရာ အစိုးရအရာရှိများ၊ နိုင်ငံတကာ ကျွမ်းကျင်ပညာရှင်များနှင့် ဧည့်သည်တော်ပေါင်း ၁၀၀ နီးပါး တက်ရောက်ခဲ့ကြသည်။
အခမ်းအနားတွင် သံမှူးကြီး ဒေါက်တာ Zheng Zhihong က အမှာစကားပြောကြားရာ၌ တရုတ်နိုင်ငံသည် ကမ္ဘာပေါ်တွင် အပြည့်စုံဆုံး ဆိုလာစက်မှုလုပ်ငန်း ဂေဟစနစ်ကို တည်ဆောက်ထားနိုင်ပြီးဖြစ်ကြောင်း၊ မြန်မာနိုင်ငံအပါအဝင် လန်ချန်း-မဲခေါင် မိတ်ဖက်နိုင်ငံများနှင့်အတူ ဆိုလာလုပ်ငန်း အရည်အသွေးမြင့် ဖွံ့ဖြိုးတိုးတက်ရေးကို ဆက်လက် တွန်းအားပေးဆောင်ရွက်လိုကြောင်းနှင့် စွမ်းအင်သစ်ကဏ္ဍတွင် အကျိုးတူ ပူးပေါင်းဆောင်ရွက်မှုများကို တက်ကြွစွာ ချဲ့ထွင်လိုကြောင်း ပြောကြားခဲ့သည်။
မြန်မာနိုင်ငံဘက်မှလည်း တရုတ်နိုင်ငံ၏ ပံ့ပိုးကူညီမှုများအတွက် ကျေးဇူးတင်ရှိကြောင်း ပြောကြားခဲ့ပြီး၊ ယင်းစီမံကိန်းသည် မြန်မာနိုင်ငံတွင် ဆိုလာထုတ်ကုန်များ၏ ဘေးကင်းလုံခြုံမှုကို အာမခံနိုင်ရန်၊ ဆိုလာလုပ်ငန်း ဖွံ့ဖြိုးတိုးတက်မှုကို အရှိန်မြှင့်တင်နိုင်ရန်၊ စွမ်းအင်လွတ်လပ်မှု ရရှိစေရန်နှင့် ရေရှည်တည်တံ့သော ဖွံ့ဖြိုးတိုးတက်ရေးကို အကောင်အထည်ဖော်နိုင်ရန် အထောက်အကူပြုမည်ဖြစ်ကြောင်း ပြောကြားခဲ့သည်။
