ခရီးသွားဒေသ အများစု အားလပ်ရက်အတွက် ဟိုတယ်ဘိုကင် ထင်သလောက် မရသေး
လာမယ့် ဖေဖော်ဝါရီလ ပြည်ထောင်စုနေ့နဲ့ တရုတ်နှစ်သစ်ကူး ရုံးပိတ်ရက်ရှည် ကလအတွက် ခရီးသွားဒေသ အများစုမှာ ဟိုတယ်ဘိုကင်တွေ မပြည့်သေးဘူးလို့ ဟိုတယ်လုပ်ငန်းရှင်တွေနဲ့ ခရီးသွားလုပ်ငန်း လုပ်ကိုင်သူတွေက ပြောပါတယ်။
ဖေဖော်ဝါရီ ၁၂ ရက် (ပြည်ထောင်စုနေ့) ကစပြီး ဖေဖော်ဝါရီ ၁၇ ရက် (တရုတ်နှစ်သစ်ကူးနေ့) အထိ ခြောက်ရက်တာ တဆက်တည်း ပိတ်ရက်တွေ ရှိနေတာဖြစ်ပြီး အဲဒီ ပိတ်ရက်တွေအတွက် ပုဂံ၊ ချောင်းသာ၊ ငွေဆောင်၊ ရွှေသောင်ယံ၊ ပြင်ဦးလွင်၊ ကလော၊ အင်းလေး အစရှိတဲ့ ခရီးသွားဒေသတွေက ဟိုတယ်တွေမှာ လက်ရှိအချိန်အထိ အခန်းတွေ ကျန်ရှိနေသေးတယ်လို့ သိရပါတယ်။
ဒါနဲ့ပတ်သက်လို့ ပုဂံဒေသရှိ ဟိုတယ်လုပ်ငန်း လုပ်ကိုင်သူတယောက်က “ဟိုတယ် တော်တော်များများကတော့ အခုအချိန်အထိ ဘိုကင် မပြည့်သေးပါဘူး။ အခန်းတွေ ရှိနေပါသေးတယ်။ ပြည့်လုနီးပါးလို့တောင် ပြောလို့မရသေးတဲ့ အခြေအနေပါ” လို့ ပြောပါတယ်။
အဲဒီလိုပဲ ပုဂံဒေသအတွင်းရှိ ခရီးသွားဝန်ဆောင်မှု ကုမ္ပဏီတွေနဲ့ ချိတ်ဆက်ထားတဲ့ ဟိုတယ်တွေနဲ့ တည်းခိုရိပ်သာတွေမှာလည်း အခန်းတွေ များစွာ ကျန်ရှိနေသေးတယ်လို့ နောက်ထပ် ဟိုတယ်လုပ်ငန်း လုပ်ကိုင်သူတယောက်က ပြောပါတယ်။
VOM က ရရှိထားတဲ့ အချက်အလက်တွေအရ ဧရာဝတီတိုင်းအတွင်းရှိ ငွေဆောင်၊ ချောင်းသာ၊ ရွှေသောင်ယံ ကမ်းခြေရှိ ဟိုတယ်တွေမှာတော့ ၇၀ ရာခိုင်နှုန်းနီးပါး အခန်းကြိုတင် မှာယူမှုတွေ ရှိနေတယ်လို့ သိရပါတယ်။
ဒါပေမယ့်လည်း တနိုင်ငံလုံး အတိုင်းအတာအားဖြင့် ကြည့်မယ်ဆိုရင်တော့ ကမ်းခြေဒေသနဲ့ ပတ်သက်လို့ ပြည်တွင်း ခရီးသွားလာမှု ကျဆင်းနေသေးတယ်လို့ ဟိုတယ်လုပ်ငန်းရှင် တယောက်က ပြောပါတယ်။
“ပြည်တွင်းက ခရီးသွားတွေ အများဆုံး သွားကြတာက ကမ်းခြေဒေသတွေ ဖြစ်တယ်။ အရင်ကဆို ပွင့်လင်းရာသီ ရောက်ပြီဆိုတာနဲ့ ဟိုတယ်နေရာ တော်တော်များများက ဘိုကင်တွေ ပြည့်နေပြီ။ အခုလို ရုံးပိတ်ရက်ရှည် ရှိနေတာမျိုးဆို ပုံမှန်ဆို ဒီလိုအချိန်ကတည်းက ဘိုကင်အားလုံး ပြည့်နေရမှာ။ လက်ရှိ တွေ့နေရတဲ့ အနေအထားကတော့ အားရစရာ မရှိဘူး” လို့ သူက ပြောပါတယ်။
ဒါအပြင် ပြင်ဦးလွင်၊ ကလောနဲ့ အင်းလေးဒေသတွေက ဟိုတယ်တွေမှာလည်း လာမယ့် ရုံးပိတ်ရက်ရှည် ကာလအတွက် အခန်းကြိုတင် မှာယူမှုတွေ နည်းပါးနေသေးတယ်လို့ သိရပါတယ်။
“ပုံမှန်ဆိုရင်တော့ ဒီအချိန် အခန်းမကျန်တော့ဘူးပေါ့။ တချို့ နေရာတွေ၊ ဟိုတယ်တွေတော့ အခန်းပြည့်တာ ရှိကောင်း ရှိနိုင်ပါတယ်။ ဒါပေမယ့် အားလုံး ခြုံကြည့်မယ် ဆိုရင်တော့ ဘိုကင်အပြည့်မရသေးတဲ့ နေရာတွေ များပါတယ်။ ဘာလို့ နည်းနေတာလဲဆို အဓိက လမ်းခရီး အခြေအနေကြောင့် ဖြစ်မယ်။ လမ်းခရီး လုံခြုံစိတ်ချရမှုအပိုင်းပေါ့။ အဲဒါကြောင့်ပဲ တော်ရုံ မသွားချင်၊ မလာချင်ကြတော့ဘူး။ ဒီရုံးပိတ်ရက်မှာလည်း ကမ်းခြေဒေသတွေလောက်ပဲ လူစည်ကားနိုင်တယ်” လို့ သူက ပြောပါတယ်။
၂၀၂၁ ခုနှစ် နောက်ပိုင်းကတည်းက မြန်မာနိုင်ငံရဲ့ ခရီးသွားလုပ်ငန်းဟာ ကျဆင်းလျက်ရှိနေပြီး လက်ရှိကာလဟာ ခရီးသွားရာသီ စတင်တဲ့ ကာလဖြစ်ပေမယ့် ပြည်တွင်းခရီးသွား ဧည့်သည်တွေကိုသာ အဓိက ဝန်ဆောင်မှု ပေးနေကြရကာ နိုင်ငံခြားဧည့်သည် ဝင်ရောက်မှုနှုန်း နည်းပါးတယ်လို့ ခရီးသွားလုပ်ငန်း လုပ်ကိုင်သူတွေက ပြောပါတယ်။
