စစ်တွေနဲ့ ပုဏ္ဏားကျွန်းမြို့နယ်အစပ် နေရာတွေမှာ တိုက်ပွဲ ပြန်လည်ဖြစ်ပွားနေ

ရခိုင်ပြည်နယ်ရှိ စစ်တွေနဲ့ ပုဏ္ဏားကျွန်းမြို့နယ်အစပ် နေရာတွေမှာ အခုရက်ပိုင်းအတွင်း တိုက်ပွဲ ပြန်လည် ဖြစ်ပွားနေတယ်လို့ စစ်ရေး သတင်းရင်းမြစ်တွေက ပြောပါတယ်။
ပြီးခဲ့တဲ့ ဇန်နဝါရီ ၁၃ ရက်နေ့ကတည်းက တိုက်ပွဲ ရပ်တန့်နေခဲ့တာ ဖြစ်ပေမယ့် ဇန်နဝါရီ ၂၅ ရက်နေ့ကစပြီး နှစ်ဖက် အပြန်အလှန် ပစ်ခတ်မှုတွေ ရှိလာတာဖြစ်တယ်လို့ သိရပါတယ်။
“ဇန်နဝါရီ ၂၅ ရက်၊ မနက်ပိုင်းကတည်းက လက်နက်ကြီး၊ လက်နက်ငယ်တွေနဲ့ ပစ်ခတ်သံတွေ ပြန်ကြားနေရတာ ဒီနေ့အထိပါပဲ။ စစ်တွေနဲ့ ပုဏ္ဏားကျွန်း အစပ်က ကျေးရွာတွေဘက်ရော၊ စစ်တွေ ဒေသကွပ်ကဲမှု စစ်ဌာနချုပ်နားနဲ့ ကျားမသောက် တပ်ရင်းတွေဘက်မှာရော တိုက်ပွဲဖြစ်နေတာ။ ဒီနေ့မနက် အစောပိုင်းကလည်း လေကြောင်းတိုက်ခိုက်တာ ဖြစ်သေးတယ်” လို့ စစ်ရေး သတင်းရင်းမြစ် တယောက်က ပြောပါတယ်။
ပုဏ္ဏားကျွန်းမြို့နယ် ရန်ကုန် - စစ်တွေ ကားလမ်းမဘေးရှိ ပက်ခွက်ဆိပ်ကျေးရွာသစ် (အောင်မင်္ဂလာ) ကျေးရွာ အနီးမှာ ဒီကနေ့ မနက် ၁ နာရီခွဲဝန်းကျင်က လေကြောင်း တိုက်ခိုက်မှု ဖြစ်ပွားခဲ့တာလို့ ဆိုပါတယ်။
“အဲဒီ နေရာက ဒေသခံတွေအတွက် အင်တာနက် ဝန်ဆောင်မှုပေးနေတဲ့ နေရာပါ။ နိုင်ငံခြားမှာ ရောက်နေတဲ့ သူတို့ရဲ့ မိသားစုဝင်တွေနဲ့ အဆက်အသွယ် ရနိုင်ဖို့ပါ။ AA က ပေးထားတာပါ။ အဲဒီနေရာ လေကြောင်း တိုက်ခိုက်ခံရတာ။ ဒါပေမယ့် တိုက်ခိုက်မှု ဖြစ်တဲ့အချိန် လူမရှိတဲ့အတွက် ထိခိုက်တာတော့ မရှိပါဘူး။ အဆောင်ကတော့ ပျက်စီးသွားတယ်” လို့ သူက ပြောပါတယ်။
AA က အဲဒီနေရာမှာ မနက် ၆ နာရီလောက်နေ ညနေပိုင်းလောက်အထိ အင်တာနက် ဖွင့်ပေးထားတာလို့ သိရပြီး ညပိုင်းအချိန် ရောက်ရင်တော့ စက်တွေအကုန်လုံး ပြန်သိမ်းသွားတာ ဖြစ်တယ်လို့ သိရပါတယ်။
“တိုက်ပွဲတွေ ဖြစ်နေတော့ လူတွေလည်း စီးပွားရေးကအစ ကျပ်တည်းလာကြတာပေါ့။ ဘယ်သူမှ စစ်မဖြစ်စေချင်ပါဘူး။ ကိုယ့်အိမ်၊ ကိုယ့်နေရာမှာပဲ အတတ်နိုင်ဆုံး အေးအေးချမ်းလေးပဲ နေချင်ကြတာ။ လက်ရှိ ပုံစံအတိုင်းဆို AA က စစ်ရေးနယ်မြေ ချဲ့ထွင်မယ့်သဘော ရှိနေတယ်။ တိုက်ပွဲကတော့ ဆက်ဖြစ်လာနိုင်တဲ့ သဘော ဖြစ်နေတယ်။ ပြည်သူတွေအတွက်ကတော့ အုပ်ချုပ်တဲ့ နေရာမှာ ဘယ်သူပဲ ဖြစ်နေပါစေ။ ဒေသကောင်းဖို့၊ နယ်မြေအေးချမ်းဖို့ကိုပဲ လိုလားပါတယ်” လို့ ဒေသခံ တယောက်က ပြောပါတယ်။
AA တပ်တွေဟာ စစ်တွေမြို့အခြေစိုက် ဒကစ ကာကင်းစခန်း တချို့ကို ပြီးခဲ့တဲ့ ဇန်နဝါရီ ၉ ရက်က သိမ်းပိုက်လိုက်ပြီးတဲ့နောက် ထိန်းချုပ်နယ်မြေတွေ တိုးချဲ့နိုင်ဖို့ ကြိုးပမ်းလာနေခြင်း ဖြစ်တယ်လို့ သိရပါတယ်။
ချင်းပြည်နယ် ပလက်ဝနဲ့ ရခိုင်ပြည်နယ်အတွင်းက မြို့နယ်ပေါင်း ၁၄ ခုကို ထိန်းချုပ်ထားတဲ့ AA ဟာ ရခိုင် ဒေသတခုလုံးကို ဆက်လက် သိမ်းပိုက်သွားမှာ ဖြစ်တယ်လို့ အသိပေး ပြောဆိုထားပြီး စစ်တွေမြို့ ပတ်ဝန်းကျင်ကို ပြီးခဲ့တဲ့ ၂၀၂၅ ခုနှစ်၊ ဇန်နဝါရီလ အစပိုင်းကနေ စတင် တိုက်ခိုက်နေခြင်း ဖြစ်တယ်လို့ သိရပါတယ်။
“အရင် တိုက်ပွဲတွေ မဖြစ်ခင်တုန်းကတော့ စားဝတ်နေရေး ကျပ်တည်းတာတွေ မရှိခဲ့ဘူးပေါ့။ ကုန်သွယ်ရေး၊ စီးပွားရေး ပုံမှန်အတိုင်း ဆက်လုပ်နေလို့ရတယ်။ အခုကတော့ တိုက်ပွဲတွေ မရပ်မနား ရှိလာတာနဲ့အမျှပါပဲ၊ ကုန်ဈေးနှုန်းတွေ တောက်လျှောက် တက်လာတယ်။ ပစ္စည်းတွေ ရှားပါးတယ်၊ ဝယ်မရ ဖြစ်လာတယ်။ စစ်ဖြစ်ရင်တော့လည်း ဘယ်နေရာမှ မကောင်းဘူးပေါ့။ ပြည်သူတွေ သေရကြေရနဲ့ စားသောက်၊ နေထိုင်ရေး အကုန် ဒုက္ခရောက်ကြရတယ်။ ကိုယ့်နေရာမှာကိုယ် အေးအေးချမ်းချမ်း ရှာမစားနိုင်တော့ဘူးပေါ့” လို့ နောက်ထပ် ဒေသခံ တယောက်က ပြောပါတယ်။
တိုက်ပွဲတွေကြောင့် လက်ရှိ စစ်တွေမြို့မှာ ပေါ်ဆန်မွှေးဆန် တအိတ် ကျပ် နှစ်သိန်းခြောက်သောင်း၊ ဆန်ကြမ်း တအိတ် ကျပ် တသိန်းခွဲ၊ အမဲသား တပိဿာ ကျပ် ခုနှစ်သောင်းကျော်၊ ဝက်သား တပိဿာ ခြောက်သောင်းကျပ်၊ ငါး တပိဿာ ကျပ် ငါးသောင်းဝန်းကျင် ရောက်ရှိနေပြီး ကုန်ဈေးနှုန်းတွေ မြင့်တက်လာနေတယ်လို့ သိရပါတယ်။
ဒါအပြင် လျှပ်စစ်မီးလည်း မရရှိတော့တာကြောင့် မြို့နေ ပြည်သူတွေဟာ နေ့စဉ် ထမင်း၊ ဟင်း ချက်ပြုတ်နိုင်ဖို့အတွက် ထင်း၊ မီးသွေး၊ ဖယောင်းတိုင်၊ ဆိုလာ၊ ဘတ္ထရီအိုး စတာတွေကို အသုံးပြုနေရပြီး အဲဒီ ကုန်ပစ္စည်းတွေဟာလည်း ဈေးနှုန်း အဆမတန် မြင့်တက်နေတယ်လို့ သိရပါတယ်။