တနင်္ဂနွေနေ့ ဘရိုက်တန်နှင့် အက်ဖ်အေဖလားပွဲတွင်လည်း ယူနိုက်တက်ကို ကိုင်တွယ်မယ်လို့ ဖလက်ချာအတည်ပြုလာ
====================
ဒါရင်းဖလက်ချာက လာမယ့် တနင်္ဂနွေနေ့ အိုးထရက်ဖို့ဒ်ကွင်းတွင် ဘရိုက်တန်အား ဧည့်ခံကစားရမယ့် အက်ဖ်အေဖလားတတိယအဆင့်ပွဲစဉ်တွင် ယူနိုက်တက်အား ယာယီနည်းပြအဖြစ် ကိုင်တွယ်ကြီးကြပ်သွားမယ်လို့ အတည်ပြုလာပါတယ်။
ဖလက်ချာဟာ ယခုအပတ်အစောပိုင်းတုန်းက ရူဘင်အမိုရမ် ထုတ်ပယ်ခြင်းခံရပြီးနောက် ယာယီနည်းပြအဖြစ် ခန့်အပ်ခြင်းခံရပြီး ဗုဒ္ဓဟူးနေ့ညတုန်းက ဘန်လေနှင့် နှစ်ဂိုးစီသရေကျတဲ့ ပွဲစဉ်အား ကြီးကြပ်ခဲ့ပါတယ်။
ဖလက်ချာက "တနင်္ဂနွေနေ့ပွဲကိုလည်း ကြီးကြပ်စေချင်တဲ့အကြောင်း သူတို့ ကျွန်တော့်ကို သတင်းပို့ထားပါတယ်။ ဘန်လေပွဲကိုပဲ အာရုံစိုက်ထားချင်ခဲ့တာပါ။ တနင်္ဂနွေနေ့မှာ အသင်းကို ဦးဆောင်သွားပါဦးမယ်။ အခု ကျွန်တော့်အာရုံစိုက်မှုနဲ့ စွမ်းအင်တွေက ဒီပွဲအတွက် ဖြစ်နေပါတယ်။ သူတို့ဆိုတာက ယူနိုက်တက်အမှုဆောင်ချုပ်အိုမာဘာရီဒါနဲ့ ဘောလုံးဒါရိုက်တာဂျေဆင်ဝဲလ်ကော့စ်ကို ပြောချင်တာပါ"လို့ ပြောကြားသွားပါတယ်။
ယူနိုက်တက်ဟာ နိုဝင်ဘာလအစပိုင်းမှ စတင်ကာ ပရီးမီးယားလိဂ်အမှတ်ပေးဇယားအောက်ပိုင်း ၈ သင်းစာရင်းဝင် အသင်းများနှင့် ၁၀ ပွဲကစားခဲ့ရာတွင် ၂ ပွဲတည်းသာ အနိုင်ရထားပါတယ်။
၎င်းတို့ဟာ နောက်ဆုံး ၃ ပွဲတွင် တန်းမဆင်းရရေး တိုက်ပွဲဝင်နေတဲ့ အသင်းများဖြစ်ကြတဲ့ ဝုဗ်၊ လိဒ်၊ ဘန်လေတို့နှင့် ရင်ဆိုင်ခဲ့ရာမှာ ၃ ပွဲလုံး သရေကျထားပါတယ်။
ဒါ့အပြင် ယူနိုက်တက်ဟာ မနေ့ညက ပွဲတွင် ဆက်စ်ကိုရဲ့ သွင်းဂိုး ၂ ဂိုးဖြင့် ဦးဆောင်နိုင်ခဲ့ပေမယ့်လည်း ချေပဂိုး ပြန်လည် ပေးရမှုနှင့်အတူ သရေကျလာခဲ့တာလည်း ဖြစ်ပါတယ်။ ဆက်စ်ကိုဟာ နွေရာသီတွင် လိုက်ဇစ်မှ ပေါင် ၇၃.၇ သန်းဖြင့် ပြောင်းလာပြီးနောက် ပထမဆုံးအကြိမ်အဖြစ် တစ်ပွဲတည်း ၂ ဂိုးသွင်းလာနိုင်ခြင်း ဖြစ်သလို အောက်တိုဘာနှောင်းပိုင်း ပထမဆုံးဂိုးသွင်းလာနိုင်ခဲ့ပါတယ်။
ယူနိုက်တက်ဟာ ယခုတစ်ရာသီလုံးတွင် ၂ ပွဲတည်းသာ ဂိုးမပေးထားရတဲ့ပွဲ ပိုင်ဆိုင်ထားကာ ခံစစ်ပြဿနာကြုံနေရတုန်း ဖြစ်ပါတယ်။
ဒါကြောင့် ယာယီနည်းပြဖလက်ချာဟာ ရူဘင်အမိုရမ် ခေတ်အလွန်တွင် ၃-၄-၃ ကစားကွက်ကို ချန်ထားခဲ့ပြီး ၄-၂-၃-၁ ကစားကွက် ပြောင်းကစားခဲ့ပေမယ့် ပြဿနာများစွာ ရှိနေဆဲ ဖြစ်နေတာ တွေ့ရပါတယ်။
တဖက်တွင် ယူနိုက်တက်ဟာ ဘန်လေနှင့်ပွဲတွင် ဂိုးပေါက်ကန်ချက် အကြိမ် ၃၀ အထိ ရှိခဲ့ပေမယ့်လည်း ဂိုးပေါက်တည့်ကန်ချက် ၁၀ကြိမ် သာ ပြုလုပ်နိုင်ခဲ့ကာ ၂ ဂိုးတည်းသာ ရခဲ့ပါတယ်။
ဆက်လက်ပြီး ဖလက်ချာက "ဘာကြောင့်လဲ ကျွန်တော် မသိပါဘူး။ တကယ်ဆို ကျုပ်တို့ အနိုင်ရခဲ့သင့်တာ"လို့ ပြောကြားသွားပါတယ်။
ယူနိုက်တက်အတွက် ယခုရာသီ တစ်ခုတည်းသော ဆုဖလားမျှော်လင့်ချက်အဖြစ် အက်ဖ်အေဖလားပြိုင်ပွဲသာ ရှိပြီး ဘရိုက်တန်နှင့်ပွဲတွင် စတင် စမ်းသပ်မှု ခံယူရပါမယ်။
တဖက်တွင် ယူနိုက်တက်ဟာ ဘရိုက်တန်နှင့် ရင်ဆိုင်ပြီးပါက ခက်ခဲတဲ့ ပရီးမီးယားလိဂ်အဝေးကွင်းပွဲစဉ်များအဖြစ် မန်စီးတီး၊ အာဆင်နယ်တို့အား ဆက်တိုက်ရင်ဆိုင်ရပါမယ်။
