ဝက်လက်နဲ့ ခင်ဦးမြို့နယ်မှာ လေကြောင်း တိုက်ခိုက်မှုကြောင့် ၁၀ ယောက် သေဆုံးပြီး ၁၀ ယောက်ကျော် ဒဏ်ရာရ
စစ်ကိုင်းတိုင်း၊ ဝက်လက်နဲ့ ခင်ဦးနယ်မှာ နှစ်ရက်အတွင်း လေကြောင်း တိုက်ခိုက်မှုတွေကြောင့် ၁၀ ယောက် သေဆုံးပြီး ၁၀ ယောက်ကျော် ဒဏ်ရာရရှိခဲ့တယ်လို့ မြေပြင်ကယ်ဆယ်ရေး လုပ်ဆောင်နေသူတွေနဲ့ ဒေသခံတွေဆီက သိရပါတယ်။
ဝက်လက်မြို့နယ်မှာ ဒီကနေ့ ဇန်နဝါရီ ၆ ရက်၊ မနက် ၉ နာရီ ၄၇ မိနစ်ဝန်းကျင်ကနေ စတင်ကာ မြို့အရှေ့တောင်ခြမ်းက ပေါက်ကံဘူတာ ဘောလုံးကွင်း အနောက်ဘက်ရှိ ရပ်ကွက်တွေနဲ့ ရေသောက်ကန်ရွာ ဘုန်းကြီးကျောင်းမှာ လေကြောင်း တိုက်ခိုက်မှုတွေ ဖြစ်ပွားခဲ့တာလို့ သိရပြီး ငါးယောက် သေဆုံးကာ တယောက် ဒဏ်ရာ ရရှိခဲ့တယ်လို့ သိရပါတယ်။
“လေကြောင်းတိုက်ခိုက်မှု သုံးကြိမ် ဖြစ်သွားတာပါ။ လူထိခိုက် သေဆုံးတာတွေအပြင် စာသင်ကျောင်း၊ ဘုန်းကြီးကျောင်းနဲ့ နေအိမ် ပျက်စီးသွားတာတွေလည်း ရှိတယ်” လို့ ဒေသတွင်း သတင်းရင်းမြစ် တယောက်က ပြောပါတယ်။
အဲဒီလိုပဲ ခင်ဦးမြို့နယ်မှာလည်း မနေ့ ဇန်နဝါရီ ၅ ရက်၊ ညပိုင်းက လေကြောင်း တိုက်ခိုက်မှု ဖြစ်ပွားခဲ့ပြီး ငါးယောက် သေဆုံးကာ ၁၀ ယောက်ကျော် ဒဏ်ရာရရှိခဲ့တယ်လို့ မြေပြင်ကယ်ဆယ်ရေး လုပ်ဆောင်နေသူတွေက ပြောပါတယ်။
ခင်ဦးနယ် အရှေ့ခြမ်း၊ လမ်းဆုံအရှေ့ဘက်ရှိ ကုန်းကြီးကျေးရွာ စာသင်ကျောင်းနဲ့ အဲဒီကျောင်းနဲ့ ကပ်လျက်က ဆီသိုလှောင်ခြံမှာ မနေ့ ည ၈ နာရီ ၂၈ မိနစ်ဝန်းကျင်က လေကြောင်း တိုက်ခိုက်မှု ဖြစ်ပွားခဲ့တာလို့ သိရပါတယ်။
“သေဆုံး ငါးယောက်က နေရာမှာတင် ပွဲချင်းပြီး ဖြစ်သွားတာ။ ဒီနေ့ပဲ သင်္ဂြိုဟ်ဖို့ လုပ်နေပါပြီ။ ဒဏ်ရာရတဲ့ သူတွေထဲမှာလည်း ပြင်းထန်အဆင့်တွေ တော်တော်များများပါတယ်။ အခု လုံခြုံတဲ့နေရာမှာ လိုအပ်တဲ့ ဆေးကုသမှုတွေ လုပ်ပေးနေပါတယ်” လို့ မြေပြင်ကယ်ဆယ်ရေး လုပ်ဆောင်နေသူက ပြောပါတယ်။
မနေ့ ဇန်နဝါရီ ၅ ရက်နေ့က ခင်ဦးမြို့နယ်အပြင် ကောလင်း၊ ကျွန်းလှနဲ့ ကသာမြို့နယ်တွေမှာလည်း လေကြောင်း တိုက်ခိုက်မှုတွေ ဖြစ်ပွားခဲ့တယ်လို့ သိရပါတယ်။
ကသာမြို့အတွင်း မနေ့ နေ့လယ် ၁ နာရီ ၄၆ မိနစ်ဝန်းကျင်နဲ့ ၁ နာရီ မိနစ် ၅၀ ဝန်းကျင်က ဖြစ်ပွားခဲ့တဲ့ လေကြောင်း တိုက်ခိုက်ခံရမှုတွေမှာတော့ တယောက် သေဆုံးကာ တယောက် ထိခိုက်ဒဏ်ရာ (စိုးရိမ်ရ) ရရှိခဲ့တယ်လို့ သိရပါတယ်။
အဲဒီ လေကြောင်း တိုက်ခိုက်မှုဟာ ကသာမြို့ မြောက်ဘက်ခြမ်းက အောင်မြေသာစည်၊ စေတီကုန်းကျေးရွာတွေနဲ့ ကသာမြို အရှေ့ဘက်ကမ်း ပုလွေကျေးရွာတွေဘက်မှာ ဖြစ်ပွားခဲ့တာလို့ သိရပြီး ပုလွေကျေးရွာက နေအိမ် လေးလုံးလည်း ထိခိုက် ပျက်စီးခဲ့တယ်လို့ သိရပါတယ်။
ပြီးခဲ့တဲ့ ၂၀၂၅ ခုနှစ်၊ နှစ်ကုန်ပိုင်းဖြစ်တဲ့ ဒီဇင်ဘာလ အတွင်းကလည်း စစ်ကိုင်းတိုင်းရှိ စစ်ကိုင်း၊ ရွှေဘို၊ မုံရွာ၊ ချောင်းဦး၊ ယင်းမာပင်၊ ကနီ၊ မင်းကင်း၊ ရေဦး၊ ဘုတလင်၊ ဝက်လက်၊ ဒီပဲယင်း၊ ကောလင်း၊ ကန့်ဘလူ၊ ကျွန်းလှ၊ ကသာနဲ့ ဗန်းမောက် စတဲ့ မြို့နယ် ၁၆ မြို့နယ်မှာ လေကြောင်း တိုက်ခိုက်မှုတွေ ဆက်တိုက်ဆိုသလို ဖြစ်ပွားခဲ့ပြီး စုစုပေါင်း သေဆုံးသူ ၈၈ ယောက်ဝန်းကျင် ရှိခဲ့ကာ ဒဏ်ရာရသူ အယောက် ၁၇၀ ဝန်းကျင် ရှိခဲ့တယ်လို့ သိရပါတယ်။
