ခြေသလုံးရိုးကျိုးဒဏ်ရာကြောင့် ခွဲစိတ်ကုသမှုခံယူရမယ့် မန်စီးတီးရဲ့ ဂဗာဒီယောလ်
===================
မန်စီးတီးနောက်ခံလူဂျို့စ်ကိုဂဗာဒီယော်ဟာ တနင်္ဂနွေနေ့တုန်းက ချဲလ်ဆီးနှင့် တစ်ဂိုးစီသရေကျတဲ့ပွဲစဉ်တွင် ရရှိခဲ့တဲ့ ခြေသလုံးရိုးကျိုးဒဏ်ရာအား ခွဲစိတ်ကုသမှု ခံယူလာရပါတော့မယ်။
အသက် ၂၃ နှစ်ရှိ ခရိုအေးရှားနောက်ခံလူဟာ ချဲလ်ဆီးနှင့်ပွဲရဲ့ ပွဲချိန် ၅၁ မိနစ်တွင် လူစားလဲလှယ်ခဲ့ရပြီး ယင်းပွဲတွင်ပင် ဗဟိုနောက်ခံလူရူဘင်ဒီယာ့စ်မှာလည်း ဒဏ်ရာကြောင့် လူစားလဲလှယ်ခဲ့ရပါတယ်။
ဂဗာဒီယော်က "ခက်ခဲတဲ့ ကာလပါ။ ဒါပေမယ့် ကိုယ့်ကိုယ်ကို ဘယ်လိုလူလဲဆိုတာ သိပါတယ်။ ဘယ်ကလာလဲ သိပါတယ်။ သန်မာစွာ ပြန်လာနိုင်ဖို့ နေ့တိုင်း တိုက်ပွဲဝင်ပါမယ်။ ပိုကောင်းလာစေပါမယ်။ ပြန်တက်လာပါမယ်"လို့ အင်စတာဂရမ်တွင် ရေးသားသွားပါတယ်။
မန်စီးတီးဟာ ဂဗာဒီယော် ခြေထောက်ကျိုးဒဏ်ရာကြောင့် ကာလရှည်ကြာ အနားယူရမှုနှင့်အတူ ချန်ပီယံရှစ်ကလပ် ဝက်ဖို့ဒ်သို့ အငှားချထားတဲ့ အကယ်ဒမီကစားသမားမက်စ်အယ်လေနီကို ပြန်လည် ခေါ်ယူထားပါတယ်။ အယ်လေနီဟာ ဗုဒ္ဓဟူးနေ့ ဘရိုက်တန်နှင့် ကစားမယ့် ပရီးမီးယားလိဂ်ပွဲအတွက် မန်စီးတီးလူစာရင်းတွင် ပါဝင်လာဖို့ ရှိပါတယ်။
အသက် ၂၀နှစ်ရှိ နောက်ခံလူဟာ ချန်ပီယံရှစ်ကလပ် ဝက်ဖို့ဒ်တွင် အငှားဖြင့် ကစားစဉ်အတွင်း ပွဲ ၂၀ ကစားခွင့်ရခဲ့သူလည်း ဖြစ်ပါတယ်။
လက်ရှိအချိန်တွင် မန်စီးတီးဟာ ဗဟိုနောက်ခံလူဂျွန်စတုန်းကိုလည်း ဒဏ်ရာကြောင့် ဆုံးရှုံးထားရရာ ဇန်နဝါရီအပြောင်းအရွှေ့ဈေးကွက်တွင် ပဲလေ့စ်အသင်းခေါင်းဆောင်မာ့ခ်ဂူဟီကို ခေါ်ယူရေး ကြိုးပမ်းနေကြောင်း သတင်းထွက်နေပါတယ်။
