ငလျင်ဒဏ်ကြောင့် ပျက်စီးခဲ့သည့် စစ်ကိုင်းမြို့ ရတနာဆင်များရှင်ဘုရား စိန်ဖူးတော်နှင့် ငှက်မြတ်နားတော် တင်လှူပူဇော်ပွဲကျင်းပ
---------------------------
မန္တလေးငလျင်ကြီးဒဏ်ကြောင့် ထိခိုက်ပျက်စီးခဲ့တဲ့ စစ်ကိုင်းမြို့ရှိ သမိုင်းဝင် ရတနာဆင်များရှင် စေတီတော်ကြီး စိန်ဖူးတော်နဲ့ ငှက်မြတ်နားတော် တင်လှူပူဇော်ပွဲကို ၂၀၂၆ ဇန်နဝါရီ ၂ရက်က ကျင်းပပါတယ်။
မတ်လ၂၈ရက်ကလှုပ်ခတ်ခဲ့တဲ့ မန္တလေးငလျင်ကြီးဒဏ်ကြောင့် ရတနာဆင်များရှင် စေတီတော်ကြီးရဲ့ စိန်ဖူးတော်ပြုတ်ကျခဲ့ပြီး ငှက်မြတ်နားတော် ပြတ်ကျခဲ့ရပါတယ်။
အခုအခါ ဘက်စုံပြုပြင်မွမ်းမံတဲ့လုပ်ငန်းတွေ ဆောင်ရွက်ပြီးစီးခဲ့တာကြောင့် စိန်ဖူးတော်နဲ့ ငှက်မြတ်နားတော် တင်လှူပူဇော်ပွဲကို ကျင်းပတာဖြစ်ပါတယ်။
အခမ်းအနားကို ရွှေကျင်နိကာယသာသနာပိုင်၊ နိုင်ငံတော်ဩဝါဒါစရိယ၊ အဘိဓဇမဟာရဋ္ဌဂုရု၊ အဂ္ဂမဟာပဏ္ဏိတ၊ သီတဂူဗုဒ္ဓတက္ကသိုလ်များနှင့် သီတဂူဆေးရုံတော်များ၏အဓိပတိ သီတဂူဆရာတော်ကြီး ဒေါက်တာဘဒ္ဒန္တဉာဏ္ဏိဿရအမှူးပြုတဲ့ ဆရာတော်၊ သံဃာတော်တွေ ကြွရောက်တော်မူကြပြီး စစ်ကိုင်းတိုင်းဒေသကြီးဝန်ကြီးချုပ် ဦးမြတ်ကျော်၊ စစ်ကိုင်းမဲဆန္ဒနယ် ပြည်သူ့လွှတ်တော်ကိုယ်စားလှယ်လောင်း ဦးသက်ပုံ၊ စစ်ကိုင်းတိုင်းဒေသကြီးအစိုးရအဖွဲ့ဝင်တွေ၊ ဌာနဆိုင်ရာတာဝန်ရှိသူတွေ၊ ဂေါပကအဖွဲ့ဝင်တွေ၊ မြို့မိမြို့ဖတွေ တက်ရောက်ကြပါတယ်။
အခမ်းအနားကို နမောတဿသုံးကြိမ်ရွတ်ဆို ဘုရားကန်တော့ ဖွင့်လှစ်ခဲ့ကြပြီး ကြွရောက်လာတဲ့ဧည့်ပရိသတ်တွေက သီတဂူဆရာတော်ကြီးထံမှငါးပါးသီလခံယူဆောက်တည်ကြကာ ရတနာစေတီဆင်များရှင်စေတီတော်မြတ်ကြီး ဩဝါဒါစရိယ ဆရာတော်ကြီးများထံမှ အန္တရာယ်
ကင်း ပရိတ်တရားတော်များ နာယူကြည်ညိုကြပါတယ်။
ဆက်လက်ပြီး သီတဂူဆရာတော်ကြီးနဲ့ ဩဝါဒါစရိယ ဆရာတော်ကြီးတွေကို တိုင်းဒေသကြီး ဝန်ကြီးချုပ်နဲ့ဇနီး၊ တိုင်းဒေသကြီး အစိုးရအဖွဲ့ဝင်တွေ၊အလှူရှင်တွေက ရတနာစိန်ဖူးတော်၊ ငှက်မြတ်နားတော်နဲ့ လှူဖွယ်ပစ္စည်းတွေကို ဆက်ကပ်လှူဒါန်းကြပါတယ်။
အဲဒီနောက် တိုင်းဒေသကြီး ဝန်ကြီးချုပ်နဲ့ တိုင်းဒေသကြီး အစိုးရအဖွဲ့ဝင်တွေက ငလျင်လှုပ် ခတ်မှုကြောင့် ထိခိုက်ပျက်စီးခဲ့တဲ့ စစ်ကိုင်းမြို့ရှိ “မဟိယင်္ဂဏ” စေတီတော်မြတ်ကြီး ပြုပြင်မွန်းမံဖို့အတွက် အလှူငွေကျပ် သိန်း ၁၀၀၀နဲ့ “ရတနာထွဋ်ခေါင်” စေတီတော်ပြုပြင်ဖို့အတွက် ငွေကျပ် သိန်း၁၀၀တို့ကို လှူဒါန်းခဲ့ကြပါတယ်။
ဆက်လက်ပြီးတော့လည်း ဩဝါဒဆရာတော်ကြီးတွေ၊ တိုင်းဒေသကြီး ဝန်ကြီးချုပ်ဦးမြတ်ကျော်၊ စစ်ကိုင်းမဲဆန္ဒနယ်ပြည်သူ့လွှတ်တော်ကိုယ်စားလှယ်လောင်း ဦးသက်ပုံနဲ့ တာဝန်ရှိသူတွေက ရတနာစိန်ဖူးတော်နဲ့ ငှက်မြတ်နားတော်တို့ကို အမွှေးနံ့သာရေတွေ ပတ်ဖျန်းပေးပြီး စေတီတော်ကြီး လက်ျာရစ် တစ်ပတ် လှည့်လည်ပူဇော်ကြပါတယ်။
အဲဒီနောက် မင်္ဂလာအချိန်ကျရောက်တာနဲ့တစ်ပြိုင်နက် စေတီတော်ကြီးအထက်ကို တင်လှူပူဇော်ခဲ့ကြပြီး အမွှေနံ့သာရေတွေပတ်ဖျန်းကာ ရွှေမိုး၊ငွေမိုးများ ရွာသွန်းဖြိုးခဲ့ကြပါတယ်။
ကြွရောက်တော်မူလာတဲ့ ဆရာတော်ကြီးတွေကို နေ့ဆွမ်းဆက်ကပ်လှူဒါန်းခဲ့တယ်လို့လည်း သိရပါတယ်။
