မူးယစ်မှောင်ခို သင်္ဘောနှစ်စင်းကို အမေရိကန်စစ်ဘက်တိုက်ခိုက်၊ ငါးဦးသေဆုံး
အမေရိကန်စစ်ဘက်သည် မူးယစ်ဆေးဝါးများသယ်ဆောင်လာသည်ဟု စွပ်စွဲထားသော ရေယာဉ်နှစ်စင်းကို တိုက်ခိုက်ခဲ့ရာ လိုက်ပါလာသူ ငါးဦးသေဆုံးခဲ့ကြောင်း ဇန်နဝါရီ ၁ ရက်တွင် ထုတ်ပြန်သည်။
အမေရိကန် တောင်ပိုင်းစစ်ဌာနချုပ်ကနောက်ဆုံးတိုက်ခိုက်မှုများကို မည်သည့်နေရာတွင်ပြုလုပ်ခဲ့ကြောင်း ထုတ်ပြန်ခြင်း မရှိသော်လည်းအမေရိကန်တပ်ဖွဲ့များသည် ကာရစ်ဘီယံနှင့်အရှေ့ပစိဖိတ်ဒေသမှတစ်ဆင့် မူးယစ်ဆေးဝါးမှောင်ခိုတင်သွင်းသည်ဟု သံသယရှိသော ရေယာဉ်များကို လွန်ခဲ့သည့် သုံးလအတွင်း တိုက်ခိုက်မှုများပြုလုပ်ခဲ့သည်။
မူးယစ်မှောင်ခိုသင်္ဘောသုံးစင်းကို ပစ်မှတ်ထားခဲ့ပြီး အနည်းဆုံး လူသုံးဦး သေဆုံးခဲ့သည့် တိုက်ခိုက်မှုအပြီး တစ်ရက်အကြာတွင် လက်ရှိတိုက်ခိုက်မှုဖြစ်ပွားခဲ့ခြင်းဖြစ်သည်။ ထရန့်အစိုးရ၏ အဆိုပါ စစ်ဆင်ရေးများသည် ဥပဒေများကို ချိုးဖောက်နေကြောင်း ထောက်ပြဝေဖန်မှုများရှိနေသည်။
မူးယစ်ဆေးဝါးတိုက်ဖျက်ရေးစစ်ပွဲ တစ်စိတ်တစ်ပိုင်းအဖြစ် စက်တင်ဘာ ၂ ရက်တွင် အမေရိကန်က နိုင်ငံတကာရေပိုင်နက်အတွင်း ရေယာဉ်တစ်စင်းကို ပထမဆုံးအကြိမ် တိုက်ခိုက်ခဲ့ပြီးနောက်ပိုင်း တိုက်ခိုက်မှု ၃၀ ကျော် ပြုလုပ်ခဲ့ရာ လူ ၁၁၀ကျော် သေဆုံးခဲ့သည်။
အမေရိကန်က ပစ်မှတ်ထားခဲ့သည့် ရေယာဉ်များသည် မူးယစ်ဆေးဝါးများ သယ်ဆောင်လာကြောင်း အထောက်အထား မပြသနိုင်သော်လည်းအဆိုပါသင်္ဘောများသည် မူးယစ်ဆေးဝါး ရောင်းဝယ် ဖောက်ကားမှု လမ်းကြောင်းများတစ်လျှောက်ဖြတ်သန်းသွားလာနေပြီး မူးယစ်ဆေးဝါး ရောင်းဝယ်
မှုတွင် ပါဝင်ပတ်သက်နေသည်ဟု ထောက်လှမ်းရေးအဖွဲ့က အတည်ပြုနိုင်ခဲ့ကြောင်း ထုတ်ပြန်ထား
သည်။
