ဗန်းမော်မှ စစ်ဘေးရှောင်များအတွက် ဆေးကုသမှုလုံလောက်ခြင်းမရှိဟုဆို
ကချင်ပြည်နယ်၊ဗန်းမော်မြို့မှ စစ်ဘေးရှောင်များအတွက် ဆေးကုသမှုလုံလောက်ခြင်းမရှိသည့်အခြေအနေနှင့် ကြုံတွေ့နေရကြောင်း သုညသုခပရဟိတလူငယ်အသင်းကဆိုသည်။
အဆိုပါ စစ်ဘေးရှောင်များမှာ ဗန်းမော်မှမန္တလေးနှင့်ပြင်ဦးလွင်တဝိုက်သ်ို့ စစ်ဘေးရှောင်ရင်း ရောက်ရှိနေသူများဖြစ်ပြီး လူဦးရေအနေဖြင့်အိမ်ထောင်စု ၃၁၇၉ စုရှိကြောင်းသိရသည်။
သုညသုခပရဟိတလူငယ်အသင်း၏ တာဝန်ရှိသူတစ်ဦးက "သူတို့ရဲ့ ကျန်းမာရေးအခြေအနေကို ကျွန်တော်တို့အသင်းကနှစ်ပိုင်းတော့ ကူညီစောင့်ရှောက်ပေးနေတာရှိတယ်။ ပထမအပိုင်းက စစ်ရှောင်အများစုမှီခိုတဲ့ ဘုန်းကြီးကျောင်းမှာ အစိုးရဘက်ကလည်း ကျန်းမာရေးဝန်ကြီးဌာနနဲ့ချိတ်ဆက်ထားပြီးမှ နှစ်ပတ်တစ်ခါလောက် mobile team လုပ်ပြီး အခမဲ့ ဆေးလာကုပေးတာရှိတယ်ပေါ့။နောက်တစ်ခုက ဘုန်းကြီးကျောင်းမှာပဲ ပရဟိတဆေးခန်းပုံစံဖွင့်ထားပြီးမှ ပြင်ပကဆရာဝန်တွေ ဖိတ်ပြီး အပတ်စဉ် တနင်္ဂနွေနေ့တိုင်း အခမဲ့ ကုသပေးတာမျိုးလည်းရှိပါတယ်။ ဒီလိုကျန်းမာရေးစောင့်ရှောက်မှုတွေတော့လုပ်ပေးနေပါတယ်။ လုံလောက်မှုတော့မရှ်ိဘူး။
ကျွန်တော်တို့နိုင်သလောက်ပဲပေါ့နော်။အကုန်လုံးကိုစောင့်ရှောက်နိုင်တာတော့မဟုတ်ဘူးပေါ့။ဘာလို့ဆို အထွေထွေလောက်ပဲကြည့်နိုင်တာပေါ့ ဒီမှာလာတဲ့လူကျ။တချို့ကျလည်း သွေးတိုး၊ဆီးချိုဆိုရင်တောင်သူ့ရဲ့စစ်ရတာကအများကြီးရှိတော့လေ။တခြားရောဂါတွေလည်းအများကြီးရှိတာပေါ့'' ဟု စံတော်ချိန်ဒစ်ဂျစ်တယ်သို့ပြောသည်။
လက်ရှိအချိန်တွင် စစ်ဘေးရှောင် အိမ်ထောင်စု ၃၁၇၉ စုသည် မြောက်ပြင်စုရပ်၊ ကမ်းနားတဝိုက်စုရပ်၊ မြို့ထဲတဝိုက်စုရပ်၊ စက်မှုတဝိုက်စုရပ်၊ အမရပူရစုရပ်၊ ပုသိမ်ကြီးစုရပ်၊ အုန်းချောစုရပ်၊ပြင်ဦးလွင်စုရပ်၊ အနီးစခန်းစုရပ်နှင့် ပြင်စာစုရပ် အစရှိသည့် စုရပ် ၁၀ နေရာရှိ သတ်မှတ်ထားသည့် ဘုန်းကြီးကျောင်းဓမ္မာရုံများတွင် နေထိုင်လျက်ရှိကြောင်းသိရသည်။
