ကသာမြို့ မြို့ပြင်ပတ်လည် တိုက်ပွဲ ဆက်လက်ဖြစ်နေ
စစ်ကိုင်းတိုင်း ဒေသကြီး အထက်ပိုင်း၊ ကသာမြို့ မြို့ပြင် ပတ်လည်မှာ ဒီဇင်ဘာလ ၂၈ ရက် ကနေ ဒီနေ့ ဒီဇင်ဘာလ ၃၀ ရက်နေ့ အထိ တိုက်ပွဲ ဆက်လက် ဖြစ်ပွားနေကြောင်း ဒေသခံတွေဆီက သိရပါတယ်။
"တိုက်ပွဲ ဖြစ်တာက မြို့ပြင် ပတ်လည်မှာဖြစ်နေတာပါ။ မြို့တွင်းထဲတော့ ဒီနေ့ထိ တိုက်ပွဲမရှိသေးပါဘူး။" ဒေသခံ အမျိုးသား တယောက်က ပြောပါတယ်။
ကသာမြို့ကိုဒီဇင်ဘာလ(၂၉)ရက်ည၉နာရီ၄၅မိနစ်က ကသာတောင်အရပ်ကဝင်လာတဲ့ လေယာဥ်ပေါ်ကနေ ဗုံးအလုံးပေါင်း ၅၀နီးပါးပစ်ချတာ ကြားရတယ်လို့ ကသာမြို့ခံက ပြောပါတယ်။
လူ တွေ၊ထိခိုက်တာရှိနိုင်ပေမယ့် ဖုန်းလိုင်းတွေခက်ခဲနေတာမို့ သတင်းအတိအကျရနိုင်ဖို့မလွယ်ကူနိုင်သေးပါဘူး။
မြို့ပတ်ပတ်လည် ပစ်ခတ်သံတွေကြားနေရပြီး မြို့အထွက် လမ်းပိတ်ထားတာကြောင့် မြို့ထဲကလူတွေကတော့ လမ်းပွင့်ရင် မြို့ကနေထွက် ကြမယ့်သူတွေ၊ မြို့အထွက် လမ်းတွေ ပိတ်နေ တာရှိသလို တိုက်ပွဲ ဧရိယာဖြစ်နေလို့ အခြေအနေ စောင့်ကြည့်နေသူတွေ ရှိနေတယ်လို့ သူက ပြောပါတယ်။
မဖြစ်မနေထွက်ရမယ်ဆိုရင် ထွက်ကြမှာ ဖြစ်ပေမယ့် ကလေးသူငယ် သက်ကြီးရွယ်အိုတွေနဲ့ အရမ်းအေးလို့ လမ်းကြော မသေချာပဲနဲ့ မစွန့်စားချင်ကြသလို စစ်ရှောင်ကာလ စားဖို့သောက်ဖို့ စရိတ် အခက်အခဲ ရှိကြလို့ ကြိုတင် မတိမ်းရှောင်နိုင်ပဲ အခြေအနေ စောင့်ကြည့်နေကြသူတွေလည်း အများအပြားရှိနေတယ်လို့ သူက ပြောပါတယ်။
တိုက်ပွဲ နဲ့ နီးတဲ့ မြို့စွန် ဒေသခံ တချို့က တိုက်ပွဲနဲ့ နည်းနည်းဝေးတဲ့ ဘုန်းကြီးကျောင်းတွေမှာ ရှောင်တိမ်း ခိုလှုံ နေကြတယ်လို့ ဆိုပါတယ်။
"ဒီနေ့ နေ့လယ်ပိုင်းအထိ မြို့ပေါ် ငြိမ်နေဆဲပါ။ မြို့စွန်တွေဘက်တော့ ပစ်ခတ်သံတွေ ကြားနေရတယ်။ မနေ့ကလည်း တနေကုန် ပစ်လိုက် ငြိမ်လိုက်ပဲ။ မနေ့ညပိုင်းကတော့ မြို့ပတ်လည် လေယာဉ် ဗုံးကြဲတာရှိတယ်" လို့ နောက်ထပ် ဒေသခံ တယောက်က ပြောပါတယ်။
ဒီနေ့မနက်ဒီဇင်ဘာ(၃၀)ရက် မနက်၁၀နာရီမှာလည်း ဂျက်ဖိုက်တာ တစီးလာခဲ့ပြီး ကသာမြို့အထက်ဘက်ကိုဗုံး၂လုံး၊ကသာမြို့ထွက်တစ်နေရာကိုတစ်လုံးကျဲသွားတယ်လို့ နောက်တယောက်ကပြောပါတယ်။
ရပ်ကွက် ၉ သံလမ်းနားတဝိုက်က ဒေသခံတွေကို ရှောင်ခိုင်းလို့ မြို့ထဲပြေးလာကြတာရှိပြီး သဖန်းကိုင်းကနေ ရှောင်တိမ်းထွက်ခွာလာတဲ့ ဒေသခံအများစု ကျောက်ပုံ ဝန်းကျင်မှာ ပိတ်မိနေတာရှိပေမယ့် လမ်းပြန်ပြန်ဖွင့်ပေးတာရှိကာ မြို့ထဲကနေ ထွက်သွားပြီးရင် မြို့ထဲ ပြန်အဝင်မခံတော့ဘူးလို့ သိရတယ်လို့ သူက ပြောပါတယ်။
အရှေ့ဘက်ကမ်းနဲ့ ကသာဘက် မြစ်ကူးလမ်းကြောင်းတွေ အားလုံးပိတ်ထားဆဲ ဖြစ်ပြီး ယမန်နေ့ မွန်းလွဲ ၂ နာရီခန့်က ကျန်တောရွာဘက် မီးခိုး အလိပ်လိုက် တွေ့မြင်နေရကာ စိုးရိမ်ရ သလို နတ်ရေတွင်းဘက်လည်း အခြေအနေ မကောင်းဘူး လို့ ဒေသခံတွေက ပြောပါတယ်။
ကသာမြို့ကို ဒီဇင်ဘာလ ၂၈ ရက်နေ့ကစ PDF နဲ့ ပူးပေါင်း တပ်ဖွဲ့တွေ စတင် ထိုးစစ်ဆင် တိုက်ခိုက်လာတာ ဖြစ်ကြောင်း ဒေသခံတွေဆီက သိရပါတယ်။
