ရွေးကောက်ပွဲအပိုင်း(၃)အတွက် မဲဆွယ်စည်းရုံးခြင်းအား ဇန်နဝါရီ ၁၂ ရက်မှစတင်ကာဆောင်ရွက်နိုင်
လွတ်လပ်၍ တရားမျှတသည့် ပါတီစုံဒီမိုကရေစီအ ထွေထွေရွေးကောက်ပွဲအပိုင်း(၃)တွင်ပါဝင်သည့် မြို့နယ်(၆၃)မြို့နယ်၌ ရွေးကောက်ပွဲ ဆိုင်ရာစုဝေးဟော ပြောခြင်းနှင့် မဲဆွယ်စည်းရုံးခြင်းကို ဇန်နဝါရီ ၁၂ ရက်မှစတင်ကာဆောင်ရွက်နိုင်သည်ဟု ပြည်ထောင်စုရွေး ကောက်ပွဲကော်မရှင်(UEC)မှ ယနေ့ ဒီဇင်ဘာ ၃၀ ရက်က ထုတ်ပြန်ခဲ့သည်။
ထိုသို့ ဆောင်ရွက်ခွင့်ပြုခဲ့သော်လည်း ဇန်နဝါရီ ၂၃ ရက်ည ၁၂ နာရီမှ ဇန်နဝါရီ ၂၅ ရက် ရွေးကောက်ပွဲအပိုင်း(၃)ကျင်းပပြီးချိန်အထိ ရပ်နားထားရမည်ဖြစ်ကာ မဲဆွယ်စည်းရုံးသည့် ကြော်ငြာ၊ ပိုစတာများကိုလည်း ဇန်နဝါရီ ၂၃ ရက်ည ၁၂ နာရီနောက်ဆုံးထား၍ ဖြုတ်သိမ်းရမည်ဟု အသိပေးခဲ့သည်။
ထို့ပြင် မဲဆွယ်စည်းရုံးခွင့်သတ်မှတ်ကာလအတွင်း လက်ကမ်းစာစောင်များရေးသားပုံနှိပ်ထုတ်ဝေဖြန့်ချိခြင်း၊ ကြော်ငြာဆိုင်းဘုတ်များ၊ ဗွီနိုင်းပိုစတာများစိုက်ထူချိတ်ဆွဲခြင်း၊ ဟောပြောခွင့်နှင့် မီဒီယာများမှမဲဆွယ်စည်းရုံးခွင့်တို့ကို သက်ဆိုင်ရာလွှတ်တော်ရွေးကောက်ပွဲ ဥပဒေပုဒ်မ ၃၀-က နှင့် နည်းဥပဒေ အခန်း(၁၀)ပါ ပြ ဋ္ဌာန်းချက်များနှင့်အညီဆောင်ရွက်ရမည်ဟု အသိပေးခဲ့သည်။
ထို့အတူ ရွေးကောက်ပွဲအပိုင်း(၁)နှင့် (၂)မြို့နယ်များအတွက် မဲဆွယ်စည်းရုံးသည့် ကြော်ငြာ၊ ပိုစတာများကိုလည်း မဲဆွယ်စည်းရုံးခွင့်ပြုထားသည့် နောက်ဆုံးရက်တွင်ဖြုတ်သိမ်းရမည်ဖြစ်ကာ ဖြုတ်သိမ်းထားခြင်းမရှိပါက မြို့နယ်ကော်မရှင်အဖွဲ့ခွဲများက သက်ဆိုင်ရာ မြို့ တော်စည်ပင်သာယာရေးကော်မတီ(သို့)မြို့နယ်စည်ပင်သာယာရေးကော်မတီများနှင့်ညှိနှိုင်း၍ ကြော်ငြာ၊ ပိုစတာများအားဖြုတ်သိမ်းသွားမည်ဖြစ်သည်။
ထိုသို့ ဖြုတ်သိမ်းရာ၌ ကုန်ကျစရိတ်ကျသင့်ငွေအား သက်ဆိုင်ရာနိုင်ငံရေးပါတီ(သို့)လွှတ်တော်ကိုယ်စား လှယ်လောင်းမှ ပေးချေရမည်ဟုလည်း UEC က အသိ ပေးထုတ်ပြန်ခဲ့သည်။
