လေးမျက်နှာမှာ တိုက်ပွဲပြင်းထန်နေပြီး လေကြောင်းနဲ့ လက်နက်ကြီး ပစ်ခတ်မှုတွေ ရှိနေ
ဧရာဝတီတိုင်း၊ လေးမျက်နှာမြို့နယ် အစပ်မှာ တိုက်ပွဲ ပြင်းထန်နေပြီး လေကြောင်း တိုက်ခိုက်မှုနဲ့ လက်နက်ကြီး ပစ်ခတ်မှုတွေလည်း ရှိနေတယ်လို့ ဒေသခံတွေက ပြောပါတယ်။
လေးမျက်နှာမြို့နယ် ချင်းကုန်း၊ စောပြာရွာနဲ့ အနီးပတ်ဝန်းကျင်တွေမှာ အစိုးရတပ်နဲ့ AA ပူးပေါင်းတပ်တွေ တိုက်ပွဲ ဖြစ်ပွားနေခြင်းဖြစ်ပြီး နှစ်ဖက်ထိခိုက် သေဆုံးမှုတွေလည်း များပြားလျက်ရှိတယ်လို့ သိရပါတယ်။
“လေးမျက်နှာက AA ပူးပေါင်းတပ်တွေ သိမ်းထားတဲ့ နေရာတွေကို အစိုးရတပ်က ထိုးစစ်ဆင်နေတာပါ။ ဒီမြို့က ရွေးကောက်ပွဲ အပိုင်း (၃) မှာ ပါလာပြီဆိုတော့ အစိုးရတပ်ဘက်က ပိုပြီး ထိုးစစ်ပြင်လာမယ့် သဘောရှိတယ်။ နောက်ပိုင်းမှာ တိုက်ပွဲ ပိုပြီး ပြင်းထန်လာနိုင်တယ်” လို့ ဒေသခံတယောက်က ပြောပါတယ်။
လက်ရှိမှာ အစိုးရတပ်ဟာ လေကြောင်း ပစ်ကူတွေ အသုံးပြုပြီး ထိုးစစ်ဆင် တိုက်ခိုက်နေတာ ဖြစ်ပေမယ့် ထင်သလောက် ရှေ့တိုးနိုင်ခြင်း မရှိဘဲ မကြာခဏဆိုသလို တပ်ပြန်ဆုတ်နေရတဲ့ အနေအထားမှာ ရှိနေတယ်လို့ သူက ပြောပါတယ်။
“လေကြောင်း တိုက်ခိုက်မှု မလုပ်ခင် စက်တပ်လေထီးတွေနဲ့ တိုက်ခိုက်တာလည်း ရှိတယ်။ ဒရုန်းနဲ့ တိုက်ခိုက်တာတွေလည်း ရှိတယ်။ လက်နက်ကြီး ပစ်ခတ်မှုကလည်း နေ့တိုင်းလိုကို ရှိနေတာ” လို့ သူက ပြောပါတယ်။
မနေ့ ဒီဇင်ဘာ ၂၅ ရက်ကလည်း လေးမျက်နှာမြို့နယ်၊ ကညင်တိုင်းကျေးရွာအုပ်စုမှာ ညနေ ၄ နာရီမှ ၆ နာရီ ဝန်းကျင်အတွင်း လက်နက်ကြီး ကျရောက်မှု ဖြစ်ပွားခဲ့ပြီး နှစ်ယောက် သေဆုံးကာ ငါးယောက် ဒဏ်ရာရရှိခဲ့တယ်လို့ သိရပါတယ်။
ဒါအပြင် ဒီဇင်ဘာ ၂၀ ရက်နေ့ကလည်း အဲဒီ မြို့နယ်အတွင်းက စောပြာရွာမှာ လေကြောင်း တိုက်ခိုက်မှု ဖြစ်ပွားခဲ့ပြီး နေအိမ် ၁၀ လုံး ပျက်စီးခဲ့သလို ဒီဇင်ဘာ ၁၇ ရက်နေ့ကလည်း အဲဒီ စောပြာရွာမှာပဲ စက်တပ်လေထီးနဲ့ တိုက်ခိုက်ခဲ့မှုကြောင့် သုံးယောက် သေဆုံးကာ တယောက် ဒဏ်ရာရရှိခဲ့တယ်လို့ သိရပါတယ်။
ဒါအပြင် ဒီဇင်ဘာ ၁၆ ရက်နေ့ကလည်း လေးမျက်နှာမြို့နယ်၊ ခတ်ချိုကုန်းရွာမှာ လေကြောင်း တိုက်ခိုက်မှု ဖြစ်ပွားခဲ့ပြီး တယောက် သေဆုံးခဲ့တယ်လို့ သိရပါတယ်။
လက်ရှိမှာ တိုက်ပွဲဖြစ်ပွားနေတဲ့ နေရာနဲ့ အနီးပတ်ဝန်းကျင်ရှိ ဒေသခံတွေဟာ ဘေးလွတ်ရာကို တိမ်းရှောင်နေကြရပြီး စားနပ်ရိက္ခာနဲ့ ဆေးဝါး လိုအပ်ချက်တွေလည်း ရှိနေတယ်လို့ သိရပါတယ်။
လက်ရှိမှာ တိုက်ပွဲတွေဟာ လေးမျက်နှာမြို့နယ်နဲ့ ရေကြည်မြို့နယ်အစပ် ပုသိမ် - မုံရွာလမ်းပိုင်းက ကျေးရွာတွေမှာ ဖြစ်ပွားနေသလို ရေကြည်မြို့နယ် မြောက်စမ်းရွာ အမြောက်တပ် (အမတ - ၃၄၄) အနီးဝန်းကျင်မှာလည်း တိုက်ပွဲ ဖြစ်ပွားနေတယ်လို့ သိရပါတယ်။
ဒါအပြင် ရေကြည်မြို့နယ်၊ ဂွ - ငသိုင်းချောင်း လမ်းပေါ်ရှိ အမတ - ၃၄၄ ကာကင်းစခန်း တချို့ကိုလည်း AA နဲ့ ပူးပေါင်းတပ်တွေက အခုရက်ပိုင်းအတွင်း ထပ်မံ သိမ်းပိုက်ထားတယ်လို့လည်း သိရပါတယ်။
ဧရာဝတီတိုင်းထဲမှာ လေးမျက်နှာနဲ့ ရေကြည်မြို့နယ်အပြင် သာပေါင်းနဲ့ ရွှေသောင်ယံ မြိုနယ်တွေမှာလည်း တိုက်ပွဲတွေ ဖြစ်ပွားနေပြီး AA ပူးပေါင်းတပ်တွေဟာ သာပေါင်း၊ ရေကြည်နဲ့ လေးမျက်နှာ မြို့နယ်တွေထဲက ကျေးရွာတချို့ကို ထိန်းချုပ်ထားကာ အထူးသဖြင့် ပုသိမ် - မုံရွာ ကားလမ်းမကြီးကို ဖြတ်တောက်ထားနိုင်တာ ဖြစ်တယ်လို့ သိရပါတယ်။
