ဂါဇာတွင် အစိုးရအုပ်ချုပ်မှုစနစ်သစ်မကြာခင်ပေါ်ထွက်လာမည်--ရူဘီယို
ဂါဇာဒေသတွင် အစိုးရ၏အုပ်ချုပ်ပုံ စနစ်အသစ်(နိုင်ငံတကာဘုတ်အဖွဲ့နှင့် ပါလက်စတိုင်းပညာရှင်များပါဝင်အုပ်ချုပ်သောအဖွဲ့) တစ်ခု မကြာခင်ပေါ်ထွက်လာမည်ဖြစ်ပြီး ပြည်ပတပ်ဖွဲ့များ ကြိလည်း ဖြန့်ကျက်ချထားမည်ဖြစ်ကြောင်း အမေရိကန်နိုင်ငံခြားရေးဝန်ကြီး မာကို ရူဘီယိုက သောကြာနေ့တွင် ပြောကြားခဲ့သည်။
သမ္မတ ဒေါ်နယ်ထရမ့်ပ်အစိုးရ၏ ကြားဝင်ညှိနှိုင်းမှုဖြင့် အောက်တိုဘာလတွင် ငြိမ်းချမ်းရေးသဘောတူညီချက်ရရှိခဲ့ပြီးနောက်ပိုင်း ဟားမတ်စ်ပစ်မှတ်များကို အစ္စရေးက ဆက်လက်တိုက်ခိုက်နေသကဲ့သို့ စစ်သွေးကြွအဖွဲ့ကလည်း ၎င်းတို့၏ ထိန်းချုပ်မှုကို ပြန်လည်ရယူထားသည့် ဂါဇာတွင် လက်ရှိအနေအထားသည် တည်တံ့ခိုင်မြဲမည်မဟုတ်ကြောင်း နှစ်ကုန်သတင်းစာရှင်းလင်းပွဲတွင် ရူဘီယိုက ပြောကြားခဲ့သည်။
သို့ဖြစ်၍ ပထမအဆင့်ကို အပြည့်အဝပြီးမြောက်အောင် ဆောင်ရွက်ရန် အရေးတကြီးလိုအပ်ကြောင်း၊ ယင်းအဆင့်သည် ငြိမ်းချမ်းရေးဘုတ်အဖွဲ့ကို တည်ထောင်ခြင်းနှင့် ပါလက်စတိုင်းပညာရှင်များအဖွဲ့ တည်ထောင်ခြင်းဖြစ်ကြောင်းနှင့် ထို့နောက်တွင် ငြိမ်းချမ်းရေး ထိန်းသိမ်းရေးတပ်ဖွဲ့က ထပ်ကြပ်မကွာပါလာမည်ဖြစ်ကြောင်း ရူဘီယိုက ပြောကြားခဲ့သည်။
အမေရိကန် ဗဟိုကွပ်ကဲရေးဌာနချုပ်သည် ဂါဇာအတွက် နိုင်ငံတကာတည်ငြိမ်ရေးတပ်ဖွဲ့(အိုင်အက်စ်အက်ဖ်) ကို စီစဉ်ရန် ယခုသီတင်းပတ်တွင် ဒိုဟာ၌ မိတ်ဖက်နိုင်ငံများနှင့်အတူ ကွန်ဖရင့်တစ်ရပ်လက်ခံကျင်းပခဲ့ပြီးနောက် ရူဘီယိုက ယခုကဲ့သို့ ပြောကြားခဲ့ခြင်းဖြစ်သည်။ ကုလသမဂ္ဂလုံခြုံရေးကောင်စီသည် အဆိုပါ တပ်ဖွဲ့ကို ခွင့်ပြုချက်ပေးရန် နိုဝင်ဘာလတွင် မဲပေးခဲ့ပြီးနောက် အစောဆုံးအားဖြင့် နောက်လ ခန့်တွင် နိုင်ငံတကာတပ်များကို ဂါဇာကမ်းမြောင်တွင် တပ်ဖြန့် ကြက်ချထား နိုင်ဖွယ်ရှိသည်ဟု အမေရိကန်အရာရှိနှစ်ဦးက ပြီးခဲ့သည့်သီတင်းပတ်တွင် ရိုက်တာကို ပြောကြားခဲ့သည်။
ပါလက်စတိုင်းစစ်သွေးကြွအဖွဲ့ ဟားမတ်စ်ကို မည်သို့မည်ပုံလက်နက်ဖြုတ်သိမ်းမည်နှင့်ပတ်သက်၍ ရှင်းရှင်းလင်းလင်းမသိရသေးဘဲ အိုင်အက်စ်အက်ဖ်သို့ တပ်ဖွဲ့ဝင်များ ကို စေလွှတ်ပေးရန် စဉ်းစားနေသည့် နိုင်ငံများအနေဖြင့် ဟားမတ်စ်တို့က ၎င်းတို့စစ်သားများကို တိုက်ပွဲအတွင်း ဆွဲသွင်းလာစေမည့်အခြေအနေမျိုးကို စိုးရိမ်မှုရှိနေသည်။
