ဂျပန်မြောက်ပိုင်းနဲ့ အရှေ့ပိုင်းတွေမှာ ငလျင်ကြီးလှုပ်ခတ်နိုင်ခြေ သတိပေးချက် ရုပ်သိမ်း
ဂျပန်အစိုးရဟာ နိုင်ငံမြောက်ပိုင်းနဲ့ အရှေ့ပိုင်းဒေသတွေမှာ ငလျင်ကြီးလှုပ်ခတ်နိုင်ခြေအတွက် သတိပေးချက်ကို အဆုံးသတ်လိုက်ပါတယ်။ ဒါပေမယ့်လည်း ပြည်သူတွေအနေနဲ့ သတိရှိကြဖို့ တိုက်တွန်းထားပါတယ်။
ပြီးခဲ့တဲ့ သီတင်းပတ်အတွင်းက ပြင်းအား ၇ ဒဿမ ၅ အဆင့်ရှိ ငလျင်လှုပ်ခတ်ပြီးနောက် ဒီဇင်ဘာ ၉ ရက်မှာ ဟော့ကိုင်းဒိုးနဲ့ ဆန်ရီကူကမ်းရိုးတန်းတလျှောက်မှာ နောက်ဆက်တွဲငလျင်သတိပေးချက် ကို ဂျပန်မိုးလေဝသအေဂျင်စီက ထုတ်ပြန်ခဲ့ပါတယ်။
ငလျင်ကြီးလှုပ်ခတ်နိုမှု သတိပေးချက်ကို ရပ်ဆိုင်းလိုက်ပြီဖြစ်ပေမယ့် ဖြစ်နိုင်ခြေကို အဆုံးသတ်လိုက်တာမဟုတ်ဘဲ ကြီးမားတဲ့ ငလျင်တခု ရုတ်တရက်ဖြစ်ပွားနိုင်တာကြောင့် ပြည်သူတွေအနေနဲ့ အသင့်ပြင်ထားစေလိုတယ်လို့ အစိုးရတာဝန်ရှိသူ အီဂါရာရှီက ဆိုပါတယ်။
ပြီးခဲ့တဲ့အပတ်က ငလျင်အခြေအနေနဲ့ ပတ်သက်ပြီး သူက ပြောကြားရာမှာ နန်ကိုင်းကျောက်လွှာမှာ ကြီးမားတဲ့ ငလျင်လှုပ်ခတ်မှုတခုအတွက် သတိပေးချက်ကို ပြီးခဲ့တဲ့နှစ်က ထုတ်ပြန်ခဲ့စဉ်က အခြေအနေနဲ့ နှိုင်းယှဉ်ခဲ့ပါတယ်။
လက်ရှိမှာတော့ အာအိုမီရီ စီရင်စုရဲ့ အရှေ့ဘက်ကမ်းရိုးတန်းမှာ ငလျင်လှုပ်ရှားမှုတွေဟာ အချိန်နဲ့အမျှ လျော့နည်းလာနေကြောင်း မိုးလေဝသတာဝန်ရှိသူက ပြောပါတယ်။ ။ ဒါပေမယ့်လည်း နောက်ဆက်တွဲ လှုပ်ခတ်မှုတွေကတော့ ရှိနေဦးမယ်လို့ ဆိုပါတယ်။
ဂျပန်ရေလက်ကြားနဲ့ ချီရှီမား ရေလက်ကြားတလျှောက်မှာ အချိန်မရွေး အင်းအားပြင်း မြေငလျင် လှုပ်ခတ်မှု ဖြစ်ပွားနိုင်ကြောင်းနဲ့ အသင့်ပြင်ဆင်ထားဖို့ မိုးလေဝသဌာနက တိုက်တွန်းထားပါတယ်။
