ဒဏ်ရာပြဿနာများကြောင့် အလွန်အန္တရာယ်များတဲ့ စက်ဝိုင်းအတွင်း အာဆင်နယ်ရောက်ရှိနေ
=====================
မီခေးလ်အာတီတာက ဒဏ်ရာပြဿနာများကြောင့် အာဆင်နယ်မှာ အလွန်အန္တရာယ်များတဲ့ စက်ဝိုင်းအတွင်း ကျရောက်နေကြောင်း ဆိုလာပါတယ်။ ဒါပေမယ့် စပိန်လူမျိုးနည်းပြက အာဆင်နယ်ကစားသမားများ ဒဏ်ရာပြဿနာများ ကြုံနေရမှုမှာ အလွန်အကျွံလေ့ကျင့်ခန်းပြုလုပ်ရခြင်းကြောင့်မဟုတ်ကြောင်း ငြင်းဆိုသွားပါတယ်။
အာဆင်နယ်ဟာ ယခုရာသီတွင် ဒဏ်ရာပြဿနာများစွာနှင့် ကြုံလာရတဲ့အသင်း ဖြစ်ပါတယ်။ ၎င်းတို့ဟာ ယနေ့ည ကလပ်ဘရုဂျက်နှင့်ပွဲစဉ်တွင်လည်း အရေးပါတဲ့ ကစားသမားများဖြစ်ကြတဲ့ ဒီကလန်ရိုက်၊ ဝီလီယမ်ဆာလီဘာ၊ ထရိုဆတ်တို့ မပါဝင်ဘဲ ရင်ဆိုင်ကစားရပါမယ်။
ထရိုဆတ်မှာ ပြီးခဲ့တဲ့အပတ်တုန်းက ဗီလာနှင့်ပွဲတွင် ဒဏ်ရာမှ ပြန်လည်ကောင်းမွန်ကာ လူစားဝင်ရောက် ပြန်လည်ကစားလာနိုင်ခဲခြင်းဖြစ်ပြီး ဂိုးသွင်းနိုင်ခဲ့ပေမယ့် ဒုတိယပိုင်းနှောင်းပိုင်းတွင် ဒဏ်ရာကြောင့် လူစားလဲလှယ်ခဲ့ရပါတယ်။
တဖက်တွင် အာဆင်နယ်ဟာ တိုက်စစ်သမားကိုင်ဟာဗတ်ဇ်၊ နောက်ခံလူများဖြစ်ကြတဲ့ ဂါဘရီရယ်၊ ခရစ္စတီယန်မော့စ်ကွီရာတို့ကိုလည်း ဆုံးရှုံးထားရပါတယ်။ တိုက်စစ်မှူးဗစ်တာယိုကီရေးစ်မှာ ဒဏ်ရာမှ ပြန်လည်ကောင်းမွန်ကာ ပြန်ကစားနိုင်ပြီ ဖြစ်ပါတယ်။
အာဆင်နယ်တို့ ဒဏ်ရာပြဿနာများ ကြုံနေရမှုမှာ လေ့ကျင့်ခန်း အလွန်အမင်းလုပ်ဆောင်ရခြင်းကြောင့်လားလို့ မေးမြန်းလာမှုကို အာတီတာက "မဟုတ်ပါဘူး။ လေ့ကျင့်လို့ မဟုတ်ပါဘူး။ လေ့ကျင့်ဖို့ အချိန်မရှိဘူး။ ဒီတော့ လေ့ကျင့်ခန်းလည်း မရှိဘူး။ အဓိကကတော့ ဒဏ်ရာရကစားသမားများနေတော့ အခြားကစားသမားတွေ ပိုသုံး ပွဲပန်းစေတယ်။ တကယ့်ကို အန္တရာယ်များတဲ့ စက်ဝိုင်းတစ်ခုပါ"လို့ ဆိုသွားပါတယ်။
အာဆင်နယ်ဟာ အင်္ဂါနေ့တုန်းက မိနစ် ၂၀ တည်းသာ လေ့ကျင့်ခန်း ပြုလပ်ခဲ့တာပါ။
ဒါ့အပြင် အာတီတာက အသင်းရဲ့ ကစားသမားများ ဒဏ်ရာရရှိမှုများရဲ့ နောက်ကွယ်မှ အကြောင်းရင်းကို အမြဲတစေ လေ့လာဆန်းစစ်မှုများ ပြုလုပ်လာခဲ့ကြောင်းလည်း ဆိုသွားပါတယ်။
အာတီတာက "တချို့ ကစားသမားတွေက ပြီးခဲ့တဲ့နှစ်ရာသီမှာ ပွဲ ၁၅၀ ကစားလာခဲ့ရတော့ ပွဲစပန်းလာတယ်။ တဖက်မှာ သူတို့ကို ဆက်ပြီးတော့ အဖန်ဖန်တလဲလဲ ကစားခိုင်းနေရပြန်တယ်။ အဲဒီအခါ တချိန်ကျရင် သူတို့ အရုတ်ကျိုးပြတ်ကျတော့တာပဲ။ ဒါနဲ့ပတ်သက်ပြီး ကျွန်တော်တို့ အမြဲတစေ လေ့လာဆန်းစစ်လာခဲ့တယ်။ ကစားသမားတွေအများကြီး မပါဘဲ ပွဲတွေအများကြီး ကစားလာခဲ့ရတော့ ဖိအားလည်း အရမ်းများတယ်။ အဲဒီအခါ ဒဏ်ရာလည်း ပိုရလာတယ်"လို့ ပြောကြားသွားပါတယ်။
