၂၀၂၆ ကမ္ဘာ့ဖလားအုပ်စုတွင် အင်္ဂလန်နှင့် ခရိုအေးရှား၊ ဘရာဇီးနှင့် စကော့တလန် တွေ့ဆုံ
=====================

၂၀၂၆ ကမ္ဘာ့ဖလားအုပ်စုမဲခွဲမှု ပြုလုပ်ခဲ့ရာ အင်္ဂလန်ဟာ ခရိုအေးရှားနှင့် အုပ်စုအဖွင့်ပွဲ ကစားလာရမှာ ဖြစ်ပြီး စကော့တလန်မှာလည်း ဘရာဇီးနှင့် တစ်အုပ်စုတည်း ကျရောက်နေပါတယ်။
သောမတ်စ်တူချယ်ရဲ့အင်္ဂလန်အသင်းဟာ ဇွန်လ ၁၇ ရက်နေ့ ဗုဒ္ဓဟူးနေ့တွင် ဒဲလ်လက်စ် (သို့မဟုတ်) တိုရွန်တိုတွင် အုပ်စုအဖွင့်ပွဲ ကစားလာရမှာ ဖြစ်ပြီး အုပ်စု(L) တွင် ဂါနာ၊ ပနားမားတို့နှင့်လည်း တစ်အုပ်စုတည်း ကျရောက်နေပါတယ်။
စကော့တလန်ကတော့ ၂၈ နှစ်တွင်း ပထမဆုံး ကမ္ဘာ့ဖလားပွဲအဖြစ် ဇွန်လ ၁၃ ရက်နေ့ စနေနေ့တွင် ဘော်စတွန် သို့မဟုတ် နယူးယောက်တွင် ဟေတီနှင့် ကစားရမှာ ဖြစ်ပါတယ်။ စကော့တလန်ဟာ အုပ်စု(C) တွင် မော်ရိုကို၊ ဘရာဇီးတို့နှင့်လည်း ကစားလာရပါမယ်။
လက်ရှိ ကမ္ဘာ့ဖလားချန်ပီယံ အာဂျင်တီးနားမှာ အယ်ဂျီးရီးယား၊ ဩစတြီးယား၊ ဂျော်ဒန်တို့နှင့် အုပ်စု(J) တွင် ကျရောက်နေပြီး ခရစ္စတီယာနိုရော်နယ်ဒို ဦးဆောင်လာမယ့် ပေါ်တူဂီအသင်းမှာလည်း အုပ်စု(K) တွင် ဖီဖာပလေးအော့ဖ် (၁)၊ ဥဇဘက်ကစ္စတန်၊ ကိုလံဘီယာတို့နှင့် ကျရောက်နေပါတယ်။
ယူရို ၂၀၂၄ ချန်ပီယံ စပိန်အသင်းမှာ အုပ်စု(H) တွင် ကိတ်ဗာဒီ၊ ဆော်ဒီ၊ ဥရုဂွေးတို့နှင့် ကျရောက်နေပြီး ကိုင်လီယန်ဘက်ပေးရဲ့ ပြင်သစ်အသင်းမှာ အုပ်စု(I) တွင် ဆီနီဂေါ၊ ဖီဖာပလေးအော့ဖ် ၂ ၊ နော်ဝေတို့နှင့် ထိပ်တိုက်တွေ့နေပါတယ်။ နယ်သာလန်အသင်းမှာ အုပ်စု(F) တွင် ဂျပန်၊ ယူအီးအက်ဖ်အေပလေးအော့ဖ် (ခ)၊ တူနီးရှားတို့နှင့် တွေ့ဆုံနေပါတယ်။
ပူးတွဲ အိမ်ရှင် မက္ကဆီကိုမှာ အုပ်စု(A) တွင် တောင်အာဖရိက၊ တောင်ကိုရီးယား၊ ယူအီးအက်ဖ်အေပလေးအော့ဖ် (ဃ)တို့နှင့် တွေ့ဆုံနေပြီး ပူးတွဲအိမ်ရှင် ကနေဒါမှာ အုပ်စု( တွင် ယူအီးအက်ဖ်အေပလေးအော့ဖ်(က)၊ ကာတာ၊ ဆွစ်ဇာလန်တို့နှင့်လည်းကောင်း တွေ့ဆုံနေသလို ပူးတွဲအိမ်ရှင် အမေရိကန်မှာ အုပ်စု(D) တွင် ပါရာဂွေး၊ ဩစတြေးလျ၊ ယူအီးအက်ဖ်အေပလေးအော့ဖ် (ဂ)တို့နှင့် ကျရောက်နေပါတယ်။
ကမ္ဘာ့ဖလားပြိုင်ပွဲအသင်းများရဲ့ ပွဲကစားမယ့် နေရာနှင့် အချိန်ကို လာမယ့် စနေနေ့တွင် ထပ်မံ မဲခွဲမှု ပြုလုပ်လာပါမယ်။
ဖီဖာဟာ ၂၀၂၆ ကမ္ဘာ့ဖလားအုပ်စုမဲခွဲရာတွင် ဆီဒင်စနစ်ကို ပထမဆုံးအသုံးပြုမဲခွဲလာခဲ့ပြီး ဆီဒင် ရရှိတဲ့အသင်းများဖြစ်ကြတဲ့ (ဖီဖာအဆင့်အမြင့်ဆုံးအသင်းများ) စပိန်၊ အာဂျင်တီးနား၊ ပြင်သစ်နှင့် အင်္ဂလန်အသင်းတို့ဟာ နိုင်ပွဲကိုယ်စီဖြင့် ကျော်ဖြတ်လာနိုင်ပါက ဆီမီးဖိုင်နယ်အဆင့်သို့ ရောက်တဲ့အထိ ထိပ်တိုက်တွေ့ကြမှာ မဟုတ်ပါဘူး။
ဒါပေမယ့် ယူရို ၂၀၂၄ ဗိုလ်လုပွဲရောက် အင်္ဂလန်အသင်းဟာ ကွာတားဖိုင်နယ်တွင် ဘရာဇီးအုပ်စုမှ အုပ်စုဗိုလ်နှင့် ထိပ်တိုက်တွေ့ရနိုင်ပါတယ်။
ဖီဖာဟာ ၂၀၂၆ ကမ္ဘာ့ဖလားပြိုင်ပွဲမှ စတင်ကာ အသင်း ၄၈ သင်းဖြင့် တိုးမြှင့်ကျင်းပလာတာ ဖြစ်ပြီး အသင်း ၄ သင်းပါ အုပ်စု ၁၂ ခုမဲခွဲလာပါတယ်။
အုပ်စုတစ်ခုစီမှ ထိပ်ဆုံး ၂ သင်းက တတိယအကောင်းဆုံးအသင်း ၈ သင်းနှင့်အတူ ရှုံးထွက်အဆင့်သို့ တက်ရောက်ပါမယ်။
အင်္ဂလန်နည်းပြသောမတ်စ်တူချယ်ကတော့ ခရိုအေးရှား၊ ဂါနာတို့နှင့် တစ်အုပ်စုတည်း ကျရောက်နေမှုနှင့်အတူ အုပ်စုကြပ်အတွင်း ကျရောက်နေကြောင်း ဆိုသွားပါတယ်။
တူချယ်က "ခက်ခဲတဲ့အုပ်စု၊ ခက်ခဲတဲ့အဖွင့်ပွဲ ကစားရမယ်။ ခရိုအေးရှားနဲ့ ဂါနာက ကမ္ဘာ့ဖလားမှာ ပုံမှန်ပါဝင်နေကြအသင်းတွေပါ။ နှစ်သင်းလုံးက တောင့်တင်းကြတယ်။ ပနားမားနဲ့ပတ်သက်ပြီး သိပ်မသိသေးဘူး။ ဒါပေမယ့် ပြိုင်ပွဲမစတင်ခင် သိလာမှာပါ။ ကျွန်တော်က ချန်ပီယံလိဂ်မဲခွဲတဲ့ အတွေ့အကြုံပဲ ရှိဖူးတယ်။ ကြီးမားတဲ့ လေးစားမှုနဲ့ ပွဲတွေကို ချဉ်းကပ်မယ်။ အုပ်စုဗိုလ်ဖြစ်ဖို့ အာရုံစိုက်မယ်။ အခု ကျွန်တော်တို့ ကျတဲ့ အုပ်စုဆို အုပ်စုကြပ်လိုမျိုးဆိုတော့ ခက်ခဲလာမှာပါ။ ဒါပေမယ့် ယုံကြည်မှု ရှိပါတယ်။ ရောက်တာနဲ့ ပြင်ဆင်သွားမယ်"လို့ဆိုသွားပါတယ်။